1 Ni di SAATE nwu ɔlaa lawa kuatɛɛ alɛ: 2 "Otii obi, yɔ anu lɛfɔ fakyɔɔ Israel abokote suoto; faabuɛ ɔlaa kuoyila nya di suoto, 3 faabuɛ falɛ: ‘Oo Israel abokote, nu SAATE Kplɛ nwu ɔlaa. Nnya ɔlaa wɔ di SAATE Kplɛ nwu kobuɛ antɔkɔ ni abokote ku akpenkpe, awɛ ku sɛtaata alɛ: nfɛ kamayɔ kapamii di suoto lee, kamawɔɔsa kafɔɔ ntakalekɔ lee nwu. 4 Kamakpakpaa seleɔta akyikye lee, mbibiɛ kafɔɔ olufui seleɔta akyikye lee; kamalo batii lee di afiɔtii lee anu. 5 Kamayɔ Israel batii bakpi ntɛ di afiɔtii lɛma anu, masamiisa akufi lee kafɔɔ nkyakasa seleɔta akyikye lee. 6 Kakɔ lele bisi yi, sekpoo nwu kamate sifukuti, mambibiɛ kafɔɔ ntakalekɔ nwu, alɛ seleɔta akyikye lee kamate di kawɔɔ ku kalalaa kamɛ. Olufui seleɔta akyikye lee kamabiɛ ante kaasɔ, asaa ya biabla ni kafɔɔ kamawɔɔ. 7 Batii lee kamakpi mante kaamɛ lee, ni bibatofo bilɛ ami ninle SAATE nwu nɛ.

8 " ‘Kafɔɔ kamata batii bawo nsiɛ nkpa, diekye batii lee bawo kamatoso kapamii nwu, nse bɛɛsamiisa ye beekpee di nsɔ ku nnle nwu kamɛ. 9 Ni nnle be bɛɛkpaa ma beesifiko ni sɛlanle kamɛ, mba niatoso ni kamanyuma mi- mmle di afiɔtii osumu di situ lɛma lakpee mi ni sɛnyaami, situ se niakyisa kamaa siatɛɛ ni, ku anu lɛma ya niatika ni di afiɔtii lɛma suoto. Suoto lɛma kamakpɛ ma oyududu di akpilesaa ya baabla ni ku ayududusaa lɛma sɛsaabla simuu. 10 Ni babatofo alɛ ami ninle SAATE nwu nɛ; diele kasakasa lafunaa nlɛ kamawako ɔlaa kpile wɔ mmle di suoto lɛma.

11 " ‘Nnya ɔlaa wɔ di SAATE Kplɛ nwu kobuɛ ni alɛ: Pɛ anɛɛkya, faatufu kɔkpaa lɛfɔ kaasɔ, faawi fabuɛ falɛ "Ao!" ta Israel batii asaa kpile ku ayududusaa sɛsaabla simuu oso yi, babanɔɔ di kapamii kanya, kɔka ku ofiɛ kpile kamɛ. 12 Ofiɛ kpile kamalo nnwɔ ninkpe ni di kakyonkɔ, nnwɔ kafɔɔ niɛtɛɛtɛɛ ni kamanɔɔ di kapamii kanya, nnwɔ kafɔɔ nietoso ɛɛwɛ ni nkpa kamakpi ta kɔka oso. Nkpo kamasoosa ɔblɔ yakayaka nii di suoto lɛma nɛ. 13 Ni babatofo alɛ ami ninle SAATE nwu nɛ, nse batii lɛma lekpi bate di afiɔtii lɛma kamɛ, bɛɛmana seleɔta akyikye lɛma beekyi, di lekpenkpe takale biala suoto ku abokote amuu osi, di kowoso biala niefukuti ni ku kusiɛntu biala ninkpe ni afata kalɔ- di aba ya manta ni olufui kɔnɔnkɔnɔ manta ni afiɔtii lɛma amuu. 14 Ni kamananfi kɔnɛɛ nii di suoto lɛma, mbla kafɔɔ kasɔ lɛma kante kafukuti diɛyɔ ni di ɔfaafuu diɛlaadu ni Ribla-* kakɔ lele beesiɛ. Ni babatofo alɛ ami ninle SAATE nwu nɛ.’ "