1 Di lɛlɛɛ nansinle kamɛ, di Israel batii kɔwɛntɛ fosile dii fosile suoto yi, SAATE nwu ɔlaa lawa kuatɛɛ alɛ: 2 Otii obi, tɛ dii le mmle nsũ, mmiɛ dii le mmle, diekye Babel ɔka ntɔɔmana Yerusalem eekyi di mmiɛ dii le mmle. 3 Pɛ otokopĩ leyo le mmle lɛkpa falɛ: ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Yɔ alesaa lɛwambukii nwu fatika di ɔtɔ; faayɔ ni fatika,

faakpete ntu ninni kamɛ.

4 Yɔ sina akudi fakpee kaamɛ,

sina akudi nwaa amuu- kutĩ ku kɔnɛɛ.

Yɔ akufi ya mmle biene fayiisa nwu kamɛ;

5 diki bafoso biene fase.

Kpee ntɔɔni ɔtɔ ninwu kalɔ fawa akufi nwu;

faata nya afuu

faawa akufi nwu ninwu kamɛ.

6 " ‘Diekye nnya ɔlaa wɔ di SAATE Kplɛ nwu kobuɛ ni alɛ:

" ‘Yɔɔsa bɔɔta okpoo kplɛ wɔ nin-wii ni ntɔ kaasɔ,

kunta ni lɛwambukii le niɛpɛ ni kɔsanka,

di kɔsanka nwu dilɔbayɛɛ ni ninni suoto!

Diki sina akudi kaamɛ ninwii, ninwii

tansɛsɛɛ sĩ kamɛ.

7 " ‘Diekye ntɔ be eewii ni kaasɔ nsi nwɔ kaamɛ:

Difuɔnkpaa fukiti suoto aanyɛɛnɛ mi aakpete;

atanyɛɛnɛ mi aakpete di kasɔ suoto,

di lɛba le di kudu katĩi ni ntɔ nwu.

8 Alɛ diakpee mi ɔblɔ yakayaka, ninta mbla nkyisa,

layɔ ntɔ nɔɔ nwu lakpete di difuɔnkpaa fukuti suoto,

di mmle manamatĩi mi nii.

9 " ‘Nkpo oso nnya ɔlaa wɔ di SAATE Kplɛ nwu kobuɛ ni alɛ:

" ‘Yɔɔsa bɔɔta okpoo kplɛ nwu nin-wii ni ntɔ kaasɔ!

Ami kafɔɔ, kamakpee ntɔɔni nintaka-kle.

10 Nioso siisa ntɔɔni nwu

faayiensa ɔtɔ.

Wa sina nwu nwaa,

faakpɔtɔɔsa kutu asaa kaamɛ;

faata akufi nwu abla akaa.

11 Faayɔ dibukii nwu fukuti fatika di akaa nwu suoto nfɛ,

dilaase di obe wɔ diefila ni kpankpa di lɛbɔɔsaa sɛɛle nɔɔ lɛsɛɛ ni bɔmbɔ

di mmle di kunusũ nikũ kanyanakĩi nii,

kɔsanka nikũ kafɔɔ nfiɛ kunloo nii.

12 Dibuo nii nimuu lɛbla kasakasa;

kɔsanka bɔblɔɔbɔ nwu nienu kuka ni ninwu suoto diedie,

bia ɔtɔ diefuo.

13 " ‘Kanunua yi, kunusũ lɛfɔ nwu ninle lɛkɔnsɔklee nɛ. Diekye lakpee kɔnyaabe nlɛ kokleklesa fɔ, kafɔɔ kunusũ lɛfɔ nwu lasĩ odie di suoto lɛfɔ, blɔbasinkleklesa fɔ, dilaase di obe wɔ di ɔblɔ yakayaka nii di suoto lɛfɔ kanya ntɔɔyɔɔ nii.

14 " ‘Ami SAATE nwu niebuɛ. Obe ntoowo alɛ kadiki kɔkpaa. Nɔmanyu sɛmaa; nɔmanya nyaami, ee mmunikĩisa disibu nii. Kamakanko fɔ di nkpa disiɛbi lɛfɔ ku ɔsaabla lɛfɔ kanya, SAATE Kplɛ nwu niebuɛ.’ "

15 Ni di SAATE nwu ɔlaa lawa kuatɛɛ alɛ: 16 "Otii obi, nyu lo, nfɛ kɔwa otii wɔ nimbuo fɔ ni anu ɔbakpaa di ɔkyɛ lɛfɔ nkyenkye. Kafɔɔ tan-wi sɛnyaami ee faawi kaku ee faawi nnumɛɛ kunwii. 17 Tũuni buɛɛ; tambla kaku faata kpi. Yɔ disi niniisaa fanii disi lɛfɔ, di nkpeele lɛfɔ kafɔɔ disiɛ fɔ ninkpaa; tantĩi kanya lɛfɔ ee faale akufansaa."

18 Nioso lakakatɛ lata batii nwu ku olesɛ, ni di ɔsɔfɔ nii lakpi ku kɔtɔɔfɔ nɛ. Ni di kaleesɛ ku oyita labla fɛ mmle baakpee mi ni kufiofa nɛ.

19 Ninfɛ di batii nwu lakaalɛ mi alɛ, "Flɔɔtɔkɔ wo asaa ya mmle fɔɔbla ni kasɔ?"

20 Nioso latɔkɔ ma nlɛ, "SAATE nwu ɔlaa lawa kuatɛɛ alɛ: 21 Tɔkɔ Israel batii falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Nfɛ kɔwa olekatakɔ nii ɔbakpɔnɔfɔsa- osie wɔ suoto minkanta nii, lɛbɔmbɔsaa lee le nimbuo ye ni anu. Babisuɔtɔbi ku babisankobi ba biediɛ biɛtɛ ni di sɛmaa kamanɔɔ di kapamii kanya. 22 Bibabla kafɔɔ fɛ mmle labla nii. Bilɔbatĩi nnya lee, ee bile akufansaa. 23 Bibanii asi lee aniisaa di asi lee, nkpeele lee kafɔɔ nsiɛ ye ninkpaa. Bilɔbasiɛ kaku ee biwi kaku, kafɔɔ bibakoso minfiɔni ta sikpile lee oso, mintũuni di kamɛ lee. 24 Hesekiel kamale nsũ lɛtɛsaa anta ye; bibabla fɛ mmle aabla ni kanya. Nse nle mmle lɛwa kaanya yi, bibatofo bilɛ ami ninle SAATE Kplɛ nwu.’

25 "Kafɔɔ afɔ, otii obi, di dii le suoto kamafũ ni osie lɛma nwu, suoto lɛyɔɔ ku dibu lɛma nwu, lɛsaa le nimbuo ma ni anu, otu lɛma dibiesaa, babisuɔtɔbi ku babisankobi lɛma yi- 26 di dii nwu kale, otii wɔ nikotososo ni nimawa amatɔkɔ fɔ ɔlaa wɔ niɛwa nii. 27 Di obe nwu nkpo kamɛ kanya lɛfɔ kamabɛ; fabakakatɛko nwɔ, flɔbasinlo kanana. Nioso fabale nsũ lɛtɛsaa fanta ma, ni babatofo alɛ ami ninle SAATE nwu nɛ."