1 Ni di SAATE nwu ɔlaa lawa kuatɛɛ alɛ: 2 "Otii obi, tɔkɔ Tiro ɔka falɛ, ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Di otu lɛfɔ lɛkanta kamɛ

faabuɛ falɛ, "Yaa nle;

nsi di yaa lɛkakpomii suoto

di lekpo ntɛɛntɛɛ."

Kafɔɔ otii fale, diele yaa,

kuntɛ foonyu falɛ feebe anu fɛ yaa.

3 Feebe anu falenke Daniel?

Owofalaa kuonwii diewofa fɔ?

4 Di ninumbe ku lɛsɔnu lɛfɔ kamɛ

feesiisa lɛsaawɛ fɛɛta suoto lɛfɔ,

feesiisa kafɔɔ koto sɛɛle ku koto fututu

fɛɛtɛ di asaa lɛfɔ ntɛkɔ.

5 Di lɛsaatofo kplɛ le fakpe ni di asaa osunsũ kamɛ, ni

di lɛsaawɛ lɛfɔ lakpɛ diakyakaa nɛ.

Ta lɛsaawɛ lɛfɔ kafɔɔ oso,

otu lɛfɔ lakanta.

6 " ‘Nkpo oso, nnya ɔlaa wɔ di SAATE Kplɛ nwu kobuɛ ni alɛ:

" ‘Ta feenyu falɛ feebe ni anu,

fɛ mmle di yaa lebe ni anu oso yi,

7 kamatakatɛ bafɔɔ nkpee fɔ,

nnle be ninkpe amumu balenke nii;

babananfi mpamii lɛma di sɛlɛ lɛfɔ ku ninumbe lɛfɔ suoto,

nimadudufu lɛklɛɛ lɛfɔ nwu nikɔkpa nii.

8 Babasoosa fɔ mankpee di ɔkya kamɛ,

fabakpi kafɔɔ fɛ otii wɔ niɛnɔɔ ni kakpɛ

di lekpo ntɛɛntɛɛ.

9 Ni fabakple fambuɛ falɛ, "Yaa nle,"

di mba nielo fɔ ni anu?

Otii lete fabale, diele yaa,

di mba nielo fɔ ni nnɛɛ.

10 Fabakpi batii ba ninankyɛlɛnsa ni suoto kukpi

di bafɔɔ nnɛɛ.

Ntɔɔkakatɛ, SAATE Kplɛ nwu niebuɛ.’ "

11 Ni di SAATE nwu ɔlaa lawa kuatɛɛ alɛ: 12 "Otii obi, wola okunu di Tiro ɔka suoto faatɔkɔ nwɔ falɛ: ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Faawo nimu di ɔtɛ onyu kamɛ,

di ninumbe ku sɛlɛ se niawo nimu layii fɔ ni kamɛ.

13 Faawɛ di Eden,

Yaa kɔba nwu kamɛ;

difuɔ le niefũ ni kɔya biala niale fɔ sɛlɛ:

afuɔ ya manlɛɛ ni rubi, topas ku emerad,

krisolite, oniks ku yaspa,

safir, turkuoise ku beril.

Koto sɛɛle baayɔ baabla asaa lɛfɔ ya baatɛ ni ku n-ya baasesee nii;

baabla nya di dii le baabla fɔ ni suoto.

14 Baapɛ fɔ ɔfɔɔ fɛ nyuntɛ kerubi,

diekye nkpo kanya lase fɔ nɛ.

Faawɛ di Yaa kobokote klekle nwu suoto;

faakyɛ di ɔtɔ afuɔ kamɛ.

15 Ole kuonwii ditawɛ di sisuku lɛfɔ suoto,

diayɔ ni di dii le baabla fɔ ni

dialaase ni di obe wɔ baanya ni amumu ablasaa di kamɛ lɛfɔ.

16 Diafe ni di asaa lɛfɔ kpinwu osunsũ okyi kamɛ

di disiensie ɔbla layii fɔ ni kamɛ,

ni faabla okpile nɛ.

Nioso latososa fɔ di Yaa kobokote nwu ku sinunsɔ,

Oo nyuntɛ kerubi, latososa fɔ ladiki,

di ɔtɔ afuɔ nwu kamɛ.

17 Lɛkanta labayii otu lɛfɔ kamɛ

ta sɛlɛ lɛfɔ oso,

ni faalalaasa ninumbe lɛfɔ

ta lɛklɛɛ lɛfɔ oso nɛ.

Nioso lafuki fɔ layu kaasɔ;

labla fɔ ninyunsaa di baka anu.

18 Di sikpile lɛfɔ kpinwu ɔbla ku onukwale ɔtanle asaa osunsũ kamɛ

faakpɔnɔfɔsa nkleklekɔ lɛfɔ.

Nioso lata ɔtɔ ladie kuakye kamɛ lɛfɔ,

ni kuafiɛ fɔ nɛ,

ni lawakosa fɔ kasɔ faabla ntɔ̀ di kasɔ suoto

di batii ba bamuu niatoonyu fɔ ni anu nɛ.

19 Ɔlaa lɛfɔ lakpɛ nyaami kuata

nnle be mmuu niatofo fɔ nii;

fatɔɔwa kayɛntɛkɔ ka ninkpe ni difu,

flɔbasinwɛ kafɔɔ diidii.’ "

20 Ni di SAATE nwu ɔlaa lawa kuatɛɛ alɛ: 21 "Otii obi, munikĩisa anu lɛfɔ fakyɔɔ Sidon; faabuɛ ɔlaa fatɛ di suoto nɔɔ 22 falɛ: ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Oo Sidon, lɛtaka n-yɛ fɔ di suoto,

kamawɛ dibu kafɔɔ di kamɛ lɛfɔ.

Babatofo alɛ ami ninle SAATE nwu,

nse lɛyɔ letokonanfi lɛwako di suoto nɔɔ,

lediki kafɔɔ leklekle nii letuo di kamɛ nɔɔ.

23 Kamata ofiɛ kpile n-wa di suoto nɔɔ,

nta kafɔɔ ntɔ mbiɛ ninfe di akpaka nɔɔ.

Batii ba beelo ni kamanɔɔ mante di kamɛ nɔɔ,

di kapamii ka bɛɛyɔ ni di suoto nɔɔ nte ni di ɔfankyi biala suoto.

Ninfɛ babatofo alɛ ami ninle SAATE nwu nɛ.

24 " ‘Sɛlaa ku afunu nnle be ninle ni kakɔtɔkɔtɔ mantotofo ni ku siwuu piɔnpiɔ dilɔbasinwɛ di Israel batii kamɛ. Ninfɛ babatofo alɛ ami ninle SAATE Kplɛ nwu nɛ.

25 " ‘Nnya ɔlaa wɔ di SAATE Kplɛ nwu kobuɛ ni alɛ: Nse lesiisa Israel batii lekyeko nnle nwu kamɛ, di nfũ baasamiisa ma baakpete ni yi, kamadiki suoto nii leklekle ntuo di kamɛ lɛma di nnle nwu anu. Ni babasiɛ di mma bamu kasɔ suoto, nka layɔ lata ni kpɛmblatɛ nii Yakob. 26 Babasiɛ ninfa di atoko ɔkyɛ ole kamɛ, mantofo kafɔɔ ayo, mankpɛ kafɔɔ nta awosobi afe; babasiɛ di atoko ɔkyɛ ole kamɛ nse lɛyɔ letokonanfi lɛwako di nnle be mmuu ninkaako ma ni man-nyu ma ni nyakatãa suoto. Ninfɛ babatofo alɛ ami ninle SAATE Yaa lɛma nɛ.’ "