1 SAATE nwu ɔlaa lawa kuatɛɛ alɛ: 2 "Otii obi, buɛ ɔlaa fatɛ kuoyila di Israel ɔlaababuɛtɛtɛ ba nfɛ nikobuɛ sɛlaa mantɛ ni suoto. Tɔkɔ mba nikobuɛ sɛlaa mantɛ mankyeko ni mma bamu asibu kamɛ falɛ: ‘Binu SAATE nwu ɔlaa! 3 Nnya ɔlaa wɔ di SAATE Kplɛ nwu kobuɛ ni alɛ: Babuutɛ ɔlaababuɛtɛtɛ bayɔɔsa, mba nintikanko ni mma bamu ninwuna kafɔɔ manan-nya ni lɛsalɛsaa! 4 Oo Israel, ɔlaababuɛtɛtɛ lee nte fɛle lepoo kamɛ baweewee di n-yiɛkuu suoto. 5 Biɛɛkata bikyɛ osi bilalolaa aba ya niebiɛ ni di seyoyiɛ nwu bita Israel batii alɛ kuayila kpinkpĩ di kakpɛ kamɛ di SAATE nwu dii suoto. 6 Odiki otuo lɛma nwu nle sɛlaa ku afunu, asaa lɛma ɔnya nwu kafɔɔ nle sɛlaa ku afunu. Mambuɛ alɛ, "SAATE nwu alɛ," di obe wɔ di SAATE nwu diekpee ma nii; kafɔɔ man-nyu osuku alɛ sɛlaa lɛma nwu kawa kaanya. 7 Diele anyapɛ min-nya, minka kafɔɔ sɛlaa ku afunu sɛlaa di obe wɔ mimbuɛ ni bilɛ, "SAATE nwu alɛ," nu di ami ninkakatɛ ni?

8 " ‘Nkpo oso yi, nnya ɔlaa wɔ di SAATE Kplɛ nwu kobuɛ ni alɛ: Ta sɛlaa ku afunu ku kakyɔnkyɔ sɛlaa ku anyapɛ lee nwu oso yi, lɛtaka n-yɛ ye di suoto, SAATE Kplɛ nwu niebuɛ. 9 Kɔnɛɛ nii kamataka di ɔlaababuɛtɛtɛ ba nin-nya ni sɛlaa ku afunu odiki otuo, mambuɛ ni kafɔɔ sɛlaa ku afunu sɛlaa. Blɔbasiɛ di batii nii bawo kalɛɛkɔ ee bakpana ayooto lɛma bakpee di Israel leyo akũ kamɛ, ee babuo Israel batii kasɔ suoto. Ninfɛ bibatofo bilɛ ami ninle SAATE Kplɛ nwu nɛ.

10 " ‘Ta bɛɛkpaa batii nii, beeyu ni osuku oso, mambuɛ ni alɛ, "Atoko ɔkyɛ ole nkpe," obe wɔ di atoko ɔkyɛ ole nnaa nii, diekye nse batii letofo oyoyiɛ wɔ ninaa ni osie yi, ɔlaababuɛtɛtɛ nkpiitaa nwu ku akaaloo. 11 Nkpo oso tɔkɔ batii ba ninkpiitaa ni oyoyiɛ nwu ku akaaloo falɛ oyoyiɛ nwu kɔwa ɔbabiɛ. Kanto kplɛ kamanɔɔ, kamata kafɔɔ atubakani nkpakpaa, afɛɛfɔ siene kafɔɔ kamakpɛ. 12 Nse seyoyiɛ nwu lebiɛ, batii dilɔbakaalɛ ye alɛ, "Ɔfɛ di akaaloo nwu biekpiitaa ni oyoyiɛ nwu nkpe?"

13 " ‘Nkpo oso nnya ɔlaa wɔ di SAATE Kplɛ nwu kobuɛ ni alɛ: Kamata afɛɛfɔ siene nkpɛ di lɛblɔfiɛ yakayaka nii kamɛ, ninta kafɔɔ atubakani ku kanto kplɛ nnɔɔ anlalasa asaa di ɔblɔ nii kamɛ. 14 Kamabiɛ oyoyiɛ wɔ biekpiitaa ni ku akaaloo ntɛ kaasɔ, kamabiɛ nwu kafɔɔ nkyɛkyɛsa nkaasa kaasɔ alɛ lɛsɔse ninwu kamate temple. Nse kuobiɛ yi, bibawɔɔ ninwu kamɛ; ni bibatofo bilɛ ami ninle SAATE nwu nɛ. 15 Nkpo kamadiki lɛblɔfiɛ yakayaka nii ntuo di oyoyiɛ nwu ku batii ba niakpiitaa nwu ni ku akaaloo suoto nɛ. Kamatɔkɔ ye nlɛ, "Oyoyiɛ nwu nsinnaa, nkpo kafɔɔ di batii ba niakpiitaa nwu ni ku akaaloo nsinnaa nɛ. 16 Israel batii ɔlaababuɛtɛtɛ ba niabuɛ sɛlaa baatɛ baata ni Yerusalem, baanya ni atoko ɔkyɛ ole odiki otuo baata nwu ni, di obe wɔ di atoko ɔkyɛ ole nnaa nii, SAATE Kplɛ nwu niebuɛ." ’

17 "Nunua yi, otii obi, yɔ anu lɛfɔ fatika di batii lɛfɔ babisankobi suoto, mba nimbuɛ sɛlaa mantɛ mankyeko ni mma bamu asibu kamɛ. Buɛ ɔlaa fatɛ kuoyila suoto lɛma, 18 faabuɛ falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Biyɔɔsa, aye basanko ba ninnii ni sɛfakũ di nnɛɛtũ lɛma mmuu, bɛɛbla ni kafɔɔ bataku kaanale ateate bɛɛta ni asi lɛma alɛ baayɔ mankyɔɔ ni batii dikyĩ. Bibakyɔɔ batii nii nkpa dikyĩ, kafɔɔ minlolaa aye bamu nkpa minklee? 19 Bitɔɔkpɔnɔfɔsa mi leyooto di batii nii kamɛ, ta atitabi asɛɛ nnɛɛ dikusii kamɛ ku bloblo kɔkyɛɛ oso. Biɛlaa biɛta batii nii ba ninkyɔɔ ni sɛlaa ku afunu atoko, ni bitoolo batii ba ninankaatɛ alɛ baakpi nii, biediɛ mba kafɔɔ ninankaatɛ alɛ baasiɛ ni nkpa biɛtɛ nɛ.

20 " ‘Nkpo oso nnya ɔlaa wɔ di SAATE Kplɛ nwu kobuɛ ni alɛ: Lɛtaka n-yɛ di sɛfakũ lee nwu suoto, n-se min-yɔ minkyɔɔ ni batii akyĩ fɛle bakansiɛ, kamabudi sĩ kafɔɔ di nnɛɛtũ lee; kamafukuti batii ba biɛkyɔɔ ni akyĩ fɛle bakansiɛ. 21 Kamabɛbɛɛ bataku lee nwu, nindiki kafɔɔ batii nii nkyeko nnɛɛ lee, blɔbasinsiɛ di osie lee nwu kalɔ. Ninfɛ bibatofo bilɛ ami ninle SAATE nwu nɛ. 22 Diekye biayɔ sɛlaa ku afunu biafeesa batininitɛ nnɛɛ, di obe wɔ ditale ni sɛnyaami owi lawako ma nii, ta biakpee ni kafɔɔ akpisaa bablatɛ osie bilɛ batankyi ni di sisuku kpile lɛma suoto alɛ baafũ ma ni nkpa oso yi, 23 nioso bilɔbasinnya sɛlaa ku afunu odiki otuo ee bibla asaa ɔnya sɛsaabla nwu. Kamadiki batii nii nkyeko nnɛɛ lee. Ni bibatofo bilɛ ami ninle SAATE nwu nɛ.’ "