1 Ni di SAATE nwu ɔlaa lawa kuatɛɛ alɛ: 2 "Otii obi, yɔ anu lɛfɔ fakyɔɔ di Amon batii suoto, faabuɛ ɔlaa fatɛ di suoto lɛma. 3 Tɔkɔ ma falɛ, ‘Binu SAATE Kplɛ nwu ɔlaa. Nnya ɔlaa wɔ di SAATE Kplɛ nwu kobuɛ ni alɛ: Ta nle biabuɛ ni bilɛ, "Ɛhɛɛ!" di kakleklekɔ nii suoto, di obe wɔ baakpɔnɔfɔsa ka ni, biabuɛ ni di Israel kasɔ suoto, di obe wɔ kaate ni kafukuti, biabuɛ ni kafɔɔ di Yuda batii suoto di obe wɔ baasifi ni sɛlanle kamɛ oso yi, 4 nfɛ kɔmayɔ ye nta Kufĩkatunkɔ batii fɛ atesaa. Babatɛ nsiɛkɔ lɛma, mampɛ kafɔɔ akpaayo lɛma di kamɛ lee; babale awosobi lee mannyi kafɔɔ babɔkɛɛ lee nnyɛɛntu. 5 Kamamunikĩisa Raba okpoo kplɛ mbla sɛfa kaweekɔ nta kapu bapɔnkɔ, nimunikĩisa kafɔɔ Amon batii sekpoo kplɛ mbla ɔnyɛɛ katɛkɔ nta bafoso. Ninfɛ bibatofo bilɛ ami ninle SAATE nwu nɛ. 6 Diekye nnya ɔlaa wɔ di SAATE Kplɛ nwu kobuɛ ni alɛ: Ta biapɛ ni anɛɛkya, biatutufu ni nkpaa lee kaasɔ, biatɔɔnya ni suoto lɛyɔɔ ku amumu asaa amuu di situ lee kamɛ, biayila ni di Israel kasɔ suoto oso yi, 7 nkpo oso kamananfi kɔnɛɛ nii di suoto lɛfɔ, nin-yɔ fɔ nta nnle nwu fɛ kakpɛ kamɛ asaa. Kamabudi fɔ ndiki di nnle kamɛ, ninfiɛ fɔ kafɔɔ ndiki di nsɔ nwu suoto. Kamawɔɔsa fɔ, ni fabatofo falɛ ami ninle SAATE nwu nɛ.’ "

8 "Nnya ɔlaa wɔ di SAATE Kplɛ nwu kobuɛ ni alɛ: ‘Moab ku Seir labuɛ alɛ, "Nyu lo, Yuda batii nfɛ nte fɛle nnle bamba nwu mmuu." 9 Nkpo oso kamasɛkɛtɛ osuku ntɛ di Moab sekpoo suoto, kamakye kasɔ di amɛ nɔɔ sekpoo suoto- di Bet-Yesimot, Baal-Meon ku Kiriatiam- ninle ni kasɔ nwu dibu. 10 Kamayɔ Moab nkyakaa di Amon batii suoto nta kufĩkatunkɔ batii fɛ atesaa, di mmle manasinnyuma ni Amon batii di nnle nwu kamɛ; 11 kamananfi kafɔɔ Moab kootoko. Ninfɛ babatofo alɛ ami ninle SAATE nwu nɛ.’ "

12 "Nnya ɔlaa wɔ di SAATE Kplɛ nwu kobuɛ ni alɛ: ‘Ta di Edom labla ni Yuda batii baakyisa ni, baakpi ni lɛpɔɔ osie kanya di nle baabla ni oso yi, 13 nnya ɔlaa wɔ di SAATE Kplɛ nwu kobuɛ ni alɛ: Kamananfi kɔnɛɛ nii di Edom suoto, nlo kafɔɔ batii nɔɔ ku babɔkɛɛ lɛma. Kamata nwu kunte ofukuti, ni diɛyɔ ni kafɔɔ di Teman diɛlaadu ni Dedan babanɔɔ di kapamii kanya. 14 Kamayɔ batii nii Israel kɔnɛɛ mbla ɔbla okyisa di Edom suoto, bababla Edom suoto ɔkpɛ di ɔblɔ nii ku lɛblɔfiɛ yakayaka nii kanya; ni babatofo ɔbla okyisa nii nɛ, SAATE Kplɛ nwu niebuɛ.’ "

15 "Nnya ɔlaa wɔ di SAATE Kplɛ nwu kobuɛ ni alɛ: ‘Ta Filisti batii ladiki ni kɔkpaa di ɔbla okyisa kamɛ, baabla kafɔɔ baakyisa ni ku amumu di situ lɛma kamɛ, ku saa katiikyidi ka ninaa ni kaloo le baawɛ baata ni Yuda ɔwɔɔsa oso yi, 16 nkpo oso, nnya ɔlaa wɔ di SAATE Kplɛ nwu kobuɛ alɛ: Nfɛ kɔwa kɔnɛɛ nii ɔbananfi di Filisti batii suoto, nimbudi kafɔɔ Keret batii ndiki, nin-wɔɔsa kafɔɔ mba niebu basi ni nkpa di lekpo kotoko. 17 Kamabla ɔbla okyisa kplɛ di suoto lɛma, nnanfi ma kafɔɔ kootoko di ɔblɔ yakayaka nii kamɛ. Ni nse lɛbla ɔbla okyisa di suoto lɛma, ninfɛ babatofo alɛ ami ninle SAATE Kplɛ nwu nɛ.’ "