1 Ni di SAATE nwu ɔlaa lawa kuatɛɛ alɛ: 2 "Otii obi, fabakanko Yerusalem? Fabakanko okpoo kplɛ wɔ mmle nin-wii ni ntɔ? Ni diki ayududusaa sɛsaabla nɔɔ simuu fatuo nwɔ, 3 faabuɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Oo okpoo kplɛ wɔ nin-yɔ kawɔɔ anwako ni di suoto nɔɔ di ntɔ owii di kamɛ nɔɔ, ankpɔnɔfɔsa ni suoto nɔɔ kafɔɔ di afiɔ ɔbla kamɛ. 4 Fatookpi lɛpɔɔ ta ntɔ be fatoowii ni kaasɔ, fɛɛkpɔnɔfɔ kafɔɔ di afiɔ ya fatɔɔbla ni oso. Fatɔɔyɔ ayi lɛfɔ fɛɛwako sitũ, alɛɛ lɛfɔ kafɔɔ ntɔɔwa kayɛntɛkɔ. Nkpo oso kamayɔ fɔ mbla ɔfɔ̀ɔ-disifisaa nta nnle ku lɛmansaa nta nsɔ nwu mmuu. 5 Mba niɛtɛɛtɛɛ ni ku mba ninkpe ni ninkyonkɔ kamama fɔ alɛ, Oo okpoo kplɛ wɔ leyooto nitɔɔlalaa ni, di kudu oyiisa leyii nwu ni kamɛ pɔ.

6 " ‘Nyu mmle di Israel ɔka biala wɔ ninsi fɔ ni kaamɛ n-yɔ osie nɔɔ an-wii ni ntɔ kaasɔ. 7 Di kamɛ lɛfɔ batasimbu babi bate ku babi baya bakpee di lɛsalɛsaa kamɛ; di kamɛ lɛfɔ baanyinka bafɔɔ, baabla kafɔɔ bakuɛbi ku bakpisɔfɔ amumu. 8 Faanyu asaa nii klekle nyakatãa, ni faakpɔnɔfɔsa Anyɛɛtɛyi nii nɛ. 9 Kamɛ lɛfɔ di asaa balalaasatɛ nsi bɔɔtɛ man-wii ntɔ kaasɔ; kamɛ lɛfɔ di mba ninle ni alesaa di kobokote nfiofa nsi bɔɔbla kafɔɔ asaakuu. 10 Kamɛ lɛfɔ di mba ninkpɔnɔfɔsa ni bate lɛma atensaa nsi; kamɛ lɛfɔ di mba nintenko ni basanko di obe wɔ bɛɛpɛ ni kɔkpaa kaasɔ nsi, di obe wɔ manambla ni klekle di osuku kanya. 11 Di kamɛ lɛfɔ di osuɔtɔ owo mbla diyududusaa ku owo nɔɔ ɔsɔfɔ, ɔbamba mbla anunsɔsaa ku obi-sɔfɔ nɔɔ, ɔbamba kafɔɔ n-yɔ osie antenko obilɛma-sankobi, nnwɔɔ omu nɔɔ ote obisankobi. 12 Kamɛ lɛfɔ di batii nfũ ditunu kamɛ asaa alɛ boowii ntɔ kaasɔ; fanfɛnsa koto fanta otii fantikasa kafɔɔ lɛsaa kpinwu di osi fantɔɔ, fan-yɔ fanwɛ asaa ya ninankaatɛ ni fankyeko bawo lɛfɔ nfũ ninanle ni di osuku biene suoto. Fatooyee mi kafɔɔ, SAATE Kplɛ nwu niebuɛ.

13 " ‘Nwaako kamapɛ anɛɛkya di katafaa asaa ya fatɔɔwɛ ni ku ntɔ be fatoowii ni kaasɔ di kamɛ lɛfɔ. 14 Fabafuo otu okpee ee nnɛɛ lɛfɔ n-wɛ osie di dii le kamadieko fɔ ni? Ami SAATE nwu niebuɛ, kamabla ni kafɔɔ. 15 Kamasamiisa fɔ nkpete di nnle nwu kamɛ, nsamiisa fɔ kafɔɔ nfenko di nsɔ suoto; kamayɔ kafɔɔ ɔtanklekle lɛfɔ nwu n-wako kase. 16 Nse bɛɛkpɔnɔfɔsa fɔ di nnle nwu anu yi, ni fabatofo falɛ ami ninle SAATE nwu nɛ.’ "

17 Ninfɛ di SAATE nwu ɔlaa lawa kuatɛɛ alɛ: 18 "Otii obi, Israel batii ntookple abɔɔsaa-mbi bɛɛtɛɛ; bamuu lɛma nle abɔɔsaa sɛɛle, abɔɔsaa fututu, abɔɔsaa wɛɛfɛɛ ku abɔɔsaa nutũle ya bɛɛnyanakĩisa nii, di mbi ninya lebu asi ni di okpetewu kamɛ. Bate fɛle koto fututu-mbi. 19 Nkpo oso nnya ɔlaa wɔ di SAATE Kplɛ nwu kobuɛ ni alɛ: ‘Ta bamuu lee bitookple ni abɔɔsaa-mbi oso yi, kamasiisa ye nkpee di Yerusalem. 20 Fɛ mmle di batii nsiisa ni koto fututu, abɔɔsaa sɛɛle, abɔɔsaa wɛɛfɛɛ, abɔɔsaa nutũle ku abɔɔsaa fututu mankpete ni di okpetewu mannyanakĩisa ni ku ɔtɔ bembe yi, nkpo kamasiisa ye di ɔblɔ nii ku ɔblɔ yakayaka nii kamɛ nkpee di okpoo kplɛ nwu kamɛ nnyanakĩisa ye nɛ. 21 Kamasiisa ye, nin-fɛ kafɔɔ ɔblɔ yakayaka nii ɔtɔ nkpete ye di suoto, minnyanakĩi di kamɛ nɔɔ. 22 Fɛ mmle mannyanakĩisa ni koto fututu di okpetewu kamɛ yi, nkpo babanyanakĩisa ye di kamɛ nɔɔ nɛ, ni bibatofo bilɛ ami SAATE nwu nianyɛɛnɛ ɔblɔ yakayaka nii lakpete ye di suoto nɛ.’ "

23 Ni di SAATE nwu ɔlaa lakple kuawa kuatɛɛ alɛ: 24 "Otii obi, tɔkɔ kasɔ nwu falɛ, ‘Kasɔ ka di kanto ditanɔɔ nii ee awiwii ni di ɔblɔ yakayaka dii suoto fale.’ 25 Baka nɔɔ lekũ kanwumbe di kamɛ nɔɔ fɛle kyata wɔ ni kokumii ni, ɔɔbɛbɛɛ ni bɔkɛɛ nɔɔ wɔ eemufũ nii; mambɛbɛɛ batii, man-yɔ lɛsaawɛ ku asaa ya niefũ ni kɔya, manta batii kpinwu nkple bakpisɔfɔ di kamɛ nɔɔ. 26 Olebatatɛ nɔɔ nwaalɛ kufiofa nii, mankpɔnɔfɔsa kafɔɔ asaa klekle nii; manntɛ nsũ di kasɛ ka ninsi ni di asaa ya nieklekle ni ku n-ya ninanklekle ni ntɛɛ; mantuo asaa alɛ kasɛ kukanwii diesi di asaa ya ninanklekle ni ku n-ya nieklekle ni ntɛɛ; mamaasa anu lɛma manta Anyɛɛtɛyi nii oklee, alɛ baakpɔnɔfɔsa mi di kamɛ lɛma. 27 Banɔɔfotii nɔɔ di kamɛ nɔɔ nte fɛle bakplɛle ba nikɔbɛbɛɛ ni babɔkɛɛ lɛma ba beemufũ nii; man-wii ntɔ kaasɔ, manlo batii kafɔɔ, man-yɔ manwɛ asaa di katafaa kanya. 28 Ɔlaababuɛtɛtɛ nɔɔ lekpiitaa akaaloo di ablasaa ya mmle nwu bɛɛta ma di kakyɔnkyɔ odiki otuo ku sɛlaa ku afunu sɛbɔ ɔpɛ kamɛ. Mambuɛ alɛ, ‘Nnya ɔlaa wɔ di SAATE Kplɛ nwu kobuɛ ni alɛ’- di obe wɔ di SAATE nwu diɛkakatɛ nii. 29 Kasɔ nwu batii mbla katafaa asaa ku kayu ɔsaabla; man-nyinka bapiitɛ ku mba diefĩ nii, mambla kafɔɔ bafɔɔ amumu, mansĩ ma lɛbɛ ɔta.

30 "Lamiɛ otii onwii di kamɛ lɛma, nnwɔ nimatofo ni oyoyiɛ, an-yila ni di anu nii, alɛ aayila ni di kasɔ nwu disi anta ni obo nwu ninte nii, di mmle ninaawɔɔsa ni kasɔ nwu, kafɔɔ ntawɛ kuonwii. 31 Nioso yi, kamanyɛɛnɛ ɔblɔ yakayaka nii nkpete ma di suoto, ninwɔɔsa ma ku lɛblɔfiɛ nii ɔtɔ bembe, ninsoosa asaa ya amuu bɛɛbla ni di mma bamu asintɛɛ, SAATE Kplɛ nwu niebuɛ."