1 Ninfɛ di osuɔtɔ nwu lakplesa mi aawako kayoko ka di kakleklekɔ nwu kayi lɛkyɛ, nka niakyɔɔ ni anu kufĩkatunkɔ, baasɛɛ ka nii. 2 Ni di SAATE nwu latɔkɔ mi alɛ, "Dikpeni bɛɛsɛɛ kayoko ka mmle beese. Dinaa alɛ bɛɛsɛkɛtɛ ka; otii kuonwii dilaafe ninka kamɛ abuo. Dikpeni bɛɛsɛɛ ka beese, diekye SAATE Israel Yaa nwu, ntoobuo ninka eefe. 3 Ɔka nwu omu lete ninkafuo osiɛ di kayoko nwu kamɛ anle alesaa di SAATE nwu anu. Afe di osuku wɔ ninte ni di lɛkpata kayoko osuku abuo, aafe di osuku nwu onwii adie."

4 Ninfɛ di osuɔtɔ nwu lakpaa mi aafenko di katookasɔ kayoko aasifiko olekatakɔ nwu anu nɛ. Lanyunyu, ni lanya SAATE nwu leklekle latooyii SAATE nwu olekatakɔ kamɛ nɛ. Ni lafuusa anu kaasɔ nɛ.

5 Ni di SAATE nwu latɔkɔ mi alɛ, "Otii obi, tɛ anu kaasɔ fanyu, lolaafanu nwaa, faalolaa atoko fakyɔɔ di ɔlaa biala lɛtɔkɔ fɔ lekyeko ni sɛsaabla nwu simuu di SAATE nwu olekatakɔ suoto. Ta anu lɛfɔ atika di olekatakɔ nwu mbuokɔ ku ndiekɔ nwu mmuu di kakleklekɔ nwu suoto. 6 Tɔkɔ Israel batii batokopĩtɛ nwu falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Oo Israel batii, ayududusaa lee sɛsaabla nfɛ mpɔ! 7 Diɛkyakaa ni di ayududusaa sɛsaabla nwu simuu bamba suoto yi, biɛkpaa bafɔɔ ba ninankyɛlɛnsa ni suoto di otu kamɛ ku suoto sina kamɛ biɛbakpee di kakleklekɔ nii kamɛ, biɛkpɔnɔfɔsa olekatakɔ nii, di obe wɔ mintɛɛ ni alesaa, lɛla ku ntɔ, biɛlalaasa kafɔɔ kanya ninii nii nwu. 8 Di obe wɔ dikaatɛ alɛ biɛbla ni ɔkpɛ lee di akleklesaa nii kanya, ni biɛyɔ batii bamba biese di kakleklekɔ nii kanya nɛ. 9 Nnya ɔlaa wɔ di SAATE Kplɛ nwu kobuɛ ni alɛ: Dinaa alɛ ɔfɔɔ kuonwii wɔ ninankyɛlɛnsa ni suoto di otu ku suoto sina kamɛ lebuo kakleklekɔ nii nwu, bia bafɔɔ ba ninsi ni di Israel batii kamɛ nnaa osuku.

10 " ‘Lewi batii ba niadie ni di ɔkyɛ nii baasifi ni fanfa, di obe wɔ di Israel batii layu ni osuku, baalalaa baakyi baalaatikanko ni afiɔ lɛma yi, dikpeni sikpile lɛma letokonanfi ntika di suoto lɛma. 11 Babafuo ɔkpɛ ɔbla di kakleklekɔ nii, manyila di olekatakɔ nwu n-yoko kanya, mambla ɔkpɛ kafɔɔ nini kamɛ; babafuo ofiɛ asaaɔta ku seleɔta babɔkɛɛ olo ɔta batii, manyila kafɔɔ di batii anu mambla ɔkpɛ nwu manta ma. 12 Kafɔɔ ta baabla ɔkpɛ baata ma ni di afiɔtii lɛma anu, baata ni kafɔɔ Israel batii labla ni sikpile oso yi, nkpo oso lakplesa kɔnɛɛ nii katoo laka ntam nlɛ, dikpeni sikpile lɛma letokonanfi nwu letika di suoto lɛma, SAATE Kplɛ nwu niebuɛ. 13 Banaa osuku mantɛɛtɛɛ mi alɛ bɔɔbabla ɔkpɛ nii fɛ olebatatɛ ee batɛɛtɛɛ akleklesaa nii kuninwii ee asaaɔta nii ya niɛtɛ eeklekle nii; dikpeni ayududusaa sɛsaabla lɛma nwu sinunsɔ letika di suoto lɛma. 14 Kafɔɔ akpakpa dite yi, kamayɔ ma nse di olekatakɔ nwu sɛkpɛ kanya ku sɛkpɛ se simuu dikpeni bɛɛbla ni niini kamɛ.

15 " ‘Kafɔɔ olebatatɛ ba ninle ni Lewi batii ku Sadok banantii ba niabla ni kakleklekɔ nii nwu sɛkpɛ di onukwale ole kamɛ di obe wɔ di Israel batii layu osuku baadie ni di ɔkyɛ nii baasifi ni yi, mma batɛɛtɛɛ mi baabla kasumu ɔkpɛ di anu nii; bayila di anu nii, baata lɛla ku ntɔ seleɔta. SAATE Kplɛ nwu niebuɛ. 16 Mma lete dikpeni beebuo kakleklekɔ nii nwu nɛ; mma lete dikpeni beekpukuti bɛɛtɛɛtɛɛ opunu nii bɛɛbla kasumu ɔkpɛ di anu nii, mambla kafɔɔ ɔkpɛ nii nɛ.

17 " ‘Nse beebuo kaflɔnkɔ ka kaamɛ n-yoko yi, dikpeni beekpee akpeele fututu fɛnɛnɛɛ; dinaa alɛ beekpee bɔkɛɛ sinwini akpeele kuninwii di obe wɔ bɔɔbla ni kasumu ɔkpɛ di kaflɔnkɔ ka kaamɛ n-yoko nwu ee di olekatakɔ nwu kamɛ. 18 Dikpeni beenii asi aniisaa fututu fɛnɛnɛɛ di asi lɛma, kalɔ akpeele fututu fɛnɛnɛɛ kafɔɔ di sɛtɔ lɛma. Dinaa alɛ mankpee lɛsaa kuninwii nimata ma mankpɛ ni apipi. 19 Nse beedie bɛɛkyɛ kaflɔnkɔ ka di kayi lɛkyɛ di lɛba le di batii nkpe ni yi, dikpeni beediki akpeele ya kamɛ beesiɛ bɛɛbla ni kasumu ɔkpɛ, badiɛ nya batɛ di ayo klekle nwu kamɛ, baakpee akpeele bamba, di mmle manaakleklesa ni batii nwu ku akpeele lɛma nwu.

20 " ‘Dinaa alɛ bɛɛkpaasu asi lɛma ee bata asi lɛma layii, kafɔɔ banwiɛ asi lɛma obe lele. 21 Oletatɛ kuonwii atan-nyi nta nse eebuo kaflɔnkɔ ka kaamɛ. 22 Dinaa alɛ bɛɛyɔ bakpisɔfɔ ee basanko ba beesĩ nii; kokpeelebitɛ ko ninle ni Israel batii ee olebatatɛ bakpisɔfɔ lete baafuo ɔyɔ. 23 Dikpeni beetuo batii nii dikyi le ninsi ni di lekleklesaa ku nle ninanklekle nii, beetuo ma kafɔɔ mmle baakpee ni kasɛ di lɛsaa le niɛkpa ni kɔmɛ ku nle ninankpa ni kɔmɛ ntɛɛ.

24 " ‘Di kalɔ́ lele kamɛ yi, olebatatɛ dikpeni beele bakantɛ bɛɛka lɛka nwu di afiofa nii kanya. Dikpeni beemufũ afiofa nii ku sɛsaabla nii beeklee bɛɛta ayi finle nii ya amuu lɛtɛ nii, dikpeni bɛɛbla kafɔɔ Lɛnyɛɛtɛyi nii klekle.

25 " ‘Diɛkaatɛ alɛ oletatɛ lɛtɛɛtɛɛ otii wɔ nintookpi nii ɛɛkpɔnɔfɔsa ni suoto nɔɔ; kafɔɔ, nse otii wɔ niekpi ni lale ote ee ɔya, obisuɔtɔbi ee obisankobi, obilɛma-suɔtɔbi ee obilɛma-sankobi wɔ ninadiyɔ ni kɔsa yi, ni aafuo suoto nɔɔ ɔkpɔnɔfɔsa. 26 Di suoto nɔɔ okleklesa sɛmaa yi, dikpeni eesiɛ ayi akuɛnsĩ fiɛ di suoto nɔɔ kamaklekle. 27 Di dii le suoto ababuo ni kakleklekɔ nwu kaflɔnkɔ ka kaamɛ alɛ ɔɔlaabla ni kasumu ɔkpɛ yi, dikpeni ɛɛta okpile asaaɔta ɛɛta suoto nɔɔ, SAATE Kplɛ nwu niebuɛ.

28 " ‘Lete nii nimale atesaa ya di olebatatɛ nkpe nii. Diɛkaatɛ alɛ biɛta ma lɛsaawɛ kuninwii di Israel; ami nimale ma lɛsaawɛ. 29 Babale alesaa asaaɔta, okpile asaaɔta ku lɛpɔɔ okpi asaaɔta; ku lɛsaa biala di Israel beediki bɛɛta ni SAATE nwu kamale ma ale. 30 Alesaa kasale biene lee amuu ku akyɛsaa finle lee amuu kamale olebatatɛ nwu ale. Dikpeni biɛyɔ kasɔ lee alesaa kasale biɛta ma alɛ lɛtɔtrɔ kawa di leyo lɛfɔ kamɛ batii suoto. 31 Olebatatɛ nnaa osuku beele kansiɛ ee bɔkɛɛ wɔ bɛɛnya alɛ eekpi ate ni ee di babɔkɛɛ yakayaka lɛbɛbɛɛ nii.