1 Ninfɛ di osuɔtɔ nwu lakpaa mi aawako kayoko ka niakyɔɔ ni anu kufĩkatunkɔ nɛ. 2 Ni lanya Israel Yaa nwu leklekle lakye kufĩkatunkɔ diatɔɔwa nɛ. Sɛlɔ nɔɔ late fɛle okle wɔ nikobiɛ kunfe ni diwi, leklekle nɔɔ kafɔɔ lata kasɔ lakpa. 3 Odikiotuo wɔ lanya ni late fɛle odiki otuo wɔ lanya ni di obe wɔ aawa ni okpoo kplɛ nwu ɔwɔɔsa, fɛle odiki otuo wɔ kafɔɔ lanya ni di Kebar Okle kotoko, ni lafuusa anu kaasɔ nɛ. 4 Ni di SAATE nwu leklekle labuo olekatakɔ nwu di kayoko ka niakyɔɔ ni anu kufĩkatunkɔ nɛ. 5 Ninfɛ di Ninwuna nwu lakɛnkɛ mi aakpaa mi aawako kaflɔnkɔ ka kaamɛ kamɛ, ni di SAATE nwu leklekle layii olekatakɔ nwu kamɛ pɔ nɛ.

6 Di obe wɔ di osuɔtɔ nwu layila mi ni di ɔlɔɔkɔ yi, lanu otii onwii latɔɔkakatɛ aatɔɔtɛɛ aatookyeko ni olekatakɔ nwu kamɛ. 7 Ni aabuɛ alɛ: "Otii obi, lɛba le mmle ninle lɛkakpomii nii kayilakɔ ku nkpaa nii kasekɔ nɛ. Lɛba le mmle kamasiɛ di Israel batii kamɛ dinaa ni kaloo. Israel batii dilɔbasinkpɔnɔfɔsa leyooto nii klekle nwu diidii- mma bamu ee baka lɛma- di lɛsɔnɔkpee lɛma kamɛ ku baka lɛma bakpi ba di ntakalekɔ lɛma nwu. 8 Man-yɔ ni n-yokontũ sewoso lɛma mankaakosa ni n-yokontũ nii, man-yɔ ni kafɔɔ akloo lɛma mankpee ni di akloo nii ɔlɔɔkɔ, di oyoyiɛ lete ninsi ni di ami ku mma ntɛɛ. Mankpɔnɔfɔsa leyooto nii di ayududusaa lɛma ɔbla kamɛ. Nioso lawɔɔsa ma di ɔblɔ nii kamɛ. 9 Nunua yi, ta ma bakyisa lɛsɔnɔkpee lɛma nwu ku baka lɛma bakpi nwu di anu nii, ni kamasiɛ di kamɛ lɛma dinaa ni kaloo.

10 "Afɔ Otii obi, diki mmle di olekatakɔ nwu nte ni fatuo Israel batii nwu, alɛ sinunsɔ kakpɛ ma di sikpile lɛma suoto. Ta ma babu nwu banyu, 11 ni nse sinunsɔ lɛkpɛ ma di asaa ya amuu batɔɔbla ni yi, faata ma batofo olekatakɔ nwu letembi- mmle beese nini, mbuokɔ nini ku ndiekɔ nini- letembi nini nimuu ku sɛsaabla nini ku afiofa nini amuu. Kpana asaa ya mmle fatɛ di anu lɛma, di mmle baale ni onukwale manta ni letembi nini, mantikanko ni sɛsaabla nini simuu.

12 "N-ya mmle ninle olekatakɔ nwu kufiofa nɛ: Aba ya amuu niɛmana eekyi ni di kobokote nwu osi kamatɛ ambla klekle nwaa. Nkpo ninle olekatakɔ nwu kufiofa nɛ.

13 "Nnya oleɔta akyikye nwu ɔklapoosa di nkpaa lɛkaana kanya, lɛklapoosaa nwu lɛkaana lɛbla kɔkpaa kunwii ku ɔfã: Oleɔta akyikye okplo wɔ baabɛ ni lekyofo labla kɔkpaa kunwii ku ɔfã, atokosi nini lɛblɛfɛ kafɔɔ labla anɛɛkpa anaasĩ diakyi. Oleɔta akyikye nwu lɛtaka ninle nle nɛ: 14 Diayɔ ni di okplo di kasɔ dialaadu ni amuusi nini, kalɔ lɛkyɛ lɛtaka labla nkpaa ntiɛ, lɛblɛfɛ kafɔɔ anɛɛkpa afosi-anyɔ, diayɔ ni di amuusi nini di kabiibiikɔ lɛkyɛ dialaadu ni di kakplɛkɔ lɛtaka labla nkpaa nkuɛnsĩ, lɛblɛfɛ kafɔɔ anɛɛkpa afosi-anyɔ. 15 Oleɔta akyikye nwu ɔtɔ kakutaakɔ lɛtaka labla nkpaa nkuɛnsĩ, akya ana kafɔɔ layila aakyɔɔ ni osi di ɔtɔ kakutaakɔ nwu kamɛ. 16 Oleɔta akyikye ɔtɔ kakutaakɔ akɔ ana nwu lakyɛkyɛ, lɛtaka ninya labla nkpaa afosi-anyɔ, lɛblɛfɛ kafɔɔ labla nkpaa afosi-anyɔ. 17 Osi amuusi kafɔɔ akɔ ana nwu lakyɛkyɛ, lɛkaana labla nkpaa afosi-anyɔ-nna, lɛblɛfɛ kafɔɔ labla nkpaa afosi-anyɔ-nna, atokosi ya baatika baakyisa ni labla anɛɛkpa lefosi, lekyofo kafɔɔ labla anɛɛkpa afosi-anyɔ diakyisa nimuu. Oleɔta akyikye nwu nkatakɔ lakyɔɔ anu kufĩkatunkɔ."

18 Ninfɛ di osuɔtɔ nwu latɔkɔ mi alɛ, "Otii obi, nnya ɔlaa wɔ di SAATE Kplɛ nwu kobuɛ ni alɛ: N-ya mmle nimale oleɔta sɛsaabla anta ni ofiɛ asaaɔta ku ntɔ ɔnwanwanyi di oleɔta akyikye suoto nse beetofo nya ni: 19 Dikpeni fɛɛyɔ lɛnankyuebi-suɔtɔ fɛɛta fɛ okpile asaaɔta fɛɛta olebatatɛ ba ninle ni Lewi batii, beekye ni Sadok leyo kamɛ, man-wa mamabla ni kasumu sɛsaabla di anu nii, SAATE Kplɛ nwu niebuɛ. 20 Dikpeni fɛɛyɔ ntɔ nɔɔ nwo feekpekpete di oleɔta akyikye akya nwu ana suoto ku osi amuusi akɔ nwu ana suoto, faakpekpete fakyisa kafɔɔ atokosi ninya amuu. Nkpo fabakleklesa oleɔta akyikye, fambla lekoto otikiti fanta nya nɛ. 21 Dikpeni fɛɛyɔ nankyue-suɔtɔ fɛɛta okpile asaaɔta, fanfiɛ ni kafɔɔ di lɛba le beediki bɛɛtɛ ni di olekatakɔ nwu ɔlɔɔkɔ di kakleklekɔ nwu kayi lɛkyɛ.

22 "Di dii nyɔɔfa suoto, dikpeni fɛɛyɔ katiekpaa ka ninaa ni kɔbɔ fɛɛta okpile asaaɔta. Dikpeni feekleklesa oleɔta akyikye nwu fɛ mmle baakleklesa nya ni ku nankyue-suɔtɔ. 23 Nse feeloo oleɔta akyikye nwu okleklesa yi, dikpeni feediki nankyue-suɔtɔ ku dikunumuu feekyeko babɔkɛɛ sele kamɛ fɛɛta asaaɔta, di akyuu nwu anyɔ nnaa ni kɔbɔ. 24 Dikpeni fɛɛyɔ ma fɛɛtɛ di SAATE nwu anu, dikpeni olebatatɛ kafɔɔ lɛnwanwanyi mmba nin-nya suoto, bɛɛyɔ nya bɛɛta oleɔta bɛɛta SAATE nwu fɛ ofiɛ asaaɔta.

25 "Ta katiekpaa kanwii dii biala di ayi akuɛnsĩ kamɛ diɛta ni okpile asaaɔta; faata kafɔɔ lɛnankyuebi-suɔtɔ ninwii ku dikunumuu ninwii, di akyuu nwu anyɔ banaa ni kɔbɔ fakyeko babɔkɛɛ sele kamɛ. 26 Ayi akuɛnsĩ dikpeni bɛɛbla lekoto otikiti bɛɛta oleɔta akyikye nwu baakleklesa nya; nkpo kanya babadiki nya kayi nɛ. 27 Di ayi ya mmle kayɛntɛkɔ, diɛyɔ ni di dii nɛnle suoto diesifi ni yi, olebatatɛ kamata ofiɛ asaaɔta ku atoko ɔkyɛ ole asaaɔta lee di oleɔta akyikye nwu suoto. Ni kamafũ ye, SAATE Kplɛ nwu niebuɛ."