1 " ‘Nse biɛsɛ kasɔ nwu fɛ atesaa yi, biediki kasɔ nwu lɛba lewo bitɛ lete bita SAATE nwu fɛ kasɔ klekle, di lɛkaana dibla nkpaa nkpe alafa ana afosi-anyɔ, lɛblɛfɛ kafɔɔ nkpaa nkpe alafa-atiɛ-afosi-atiɛ nkpe nkuɔ; obo nwu omuu kamale lɛba klekle. 2 Di obo wɔ mmle kamɛ yi, badiki kasɔ nwu lɛba nkpaa nkpe alafa-anɛ-afosi-ana, di akɔ nwu ana nkyɛkyɛ ni bata kakleklekɔ nwu, di nkpaa afosi-anɛ-nna kafɔɔ kale kasɔ fukuti kakyisa kakleklekɔ nwu. 3 Di kasɔ klekle nwu yi, biklapoosa lɛba di lɛkaana nle ni nkpaa nkpe alafa-ana-afosi-anyɔ, lɛblɛfɛ kafɔɔ nkpaa nkpe kɔlafa-afosi-akuɔ-nnɛ bitɛ. Nka kamɛ di kakleklekɔ nwu, Kakleklekɔ Kaakleklekɔ kamawɛ nɛ. 4 Kabale kasɔ klekle kanta olebatatɛ ba nimbla ni kasumu ɔkpɛ di kakleklekɔ nwu kamɛ, mankpukuti mantɛɛtɛɛ mambla ni kafɔɔ kasumu ɔkpɛ di SAATE nwu anu. Kabale lɛba kanta olebatatɛ ayo kasekɔ ku lɛba klekle ninta kakleklekɔ nwu. 5 Lɛba bamba di lɛkaana lɛbla ni nkpaa nkpe alafa-ana-afosi-ana-nnyɔ, lɛblɛfɛ kafɔɔ lɛbla ni nkpaa nkpe kɔlafa-afosi-akuɔ-nnɛ kamale Lewi batii kale, fɛ lɛsaawɛ lɛma diɛta ni sekpoo se kamɛ babasiɛ nii.

6 " ‘Bidiki lɛba bita okpoo kplɛ nwu fɛ kalekɔ nɔɔ, di lɛba klekle nwu ɔlɔɔkɔ; kabale Israel batii bamuu kale. Lɛblɛfɛ dibla nkpaa nkpe afosi-anɛ-nna di lɛkaana kafɔɔ dibla nkpaa nkpe-alafa-ana-afosi-anyɔ.

7 " ‘Ɔka kamawɛ kasɔ ante kɔmɛ di ɔfankyi biala di kasɔ klekle nwu ku okpoo kplɛ nwu kasɔ. Kasɔ nwu kamayɔ di kufĩkamɛɛkɔ kansifi kufĩkamɛɛkɔ lɛkyɛ, kan-yɔ di kufĩkatunkɔ kansifi kufĩkatunkɔ lɛkyɛ. Kabayɔ lɛkaana kanya di kufĩkamɛɛkɔ kanaadu kufĩkatunkɔ kɔmɛ suoto, kankaatɛɛ ku anà nwu kasɔ kanwii kale suoto. 8 Kasɔ ka mmle nimale ɔka lɛsaawɛ di Israel nɛ. Ni baka nii dilɔbasinnyinka batii nii, kafɔɔ babata Israel batii nklee kasɔ nwu di ana lɛma kanya.

9 " ‘Nnya ɔlaa wɔ di SAATE Kplɛ nwu kobuɛ ni alɛ: Oo Israel baka! Bitoosii ɔkyɛ, bidiɛ amumu ku ninyinka lee nwu, biɛbla lɛsaa le ninlɛ, diesiɛko ni kafɔɔ. Bidiɛ lɛsaawɛ ofũ di batii nii nnɛɛ, SAATE Kplɛ nwu niebuɛ. 10 Biyɔ akadisaa ya niewo ni biblako ɔkpɛ, kankyi wɔ niewo ni ku lɛkyafi le niewo ni. 11 Dikpeni kankyi ku lɛkyafi lɛkyɛkyɛ, bakpoko lefosi ninsiɛ di lɛkyafi ninwii kamɛ, abɛɛsibii lefosi kafɔɔ asiɛ di kankyi kamɛ; lɛbɛsibii dile lɛkadisaa dita akyuu nwu anyɔ. 12 Gera afosi-anyɔ disiɛ di sekel onwii kamɛ. Sekel afosi-anyɔ ku sekel afosi-anyɔ-anɔɔ ku sekel lefosi-anɔɔ ale mina onwii.

13 " ‘Nnya atasaa finle ya dikpeni biɛta ni: Bibadiki lɛbɛsibii kuɔnle minkyeko kamɔɔ kankyi biala kamɛ, mindiki kafɔɔ lɛbɛsibii kuɔnle minkyeko atitabi kankyi biala kamɛ. 14 Di nnɔnyi lɛkyɛ, bɛɛyɔ kpoko bɛɛklapoosa ni yi, badiki kpoko onwii bakyeko lɛkyafi biala kamɛ (bakpoko lefosi ninsi di lɛkyafi ninwii kamɛ, bakpoko lefosi lɛkyɛkyɛ ku lɛkyafi ninwii). 15 Badiki kafɔɔ foso onwii bakyeko bafoso alafa-anyɔ biala ba ninsi ni lɛla nwaa kamɛ, di Israel babɔkɛɛ sɛfa kaweekɔ nwaa suoto. N-ya mmle babayɔ manta alesaa asaaɔta, ofiɛ asaaɔta ku atoko ɔkyɛ ole asaaɔta mambla lekoto otikiti manta batii nɛ, SAATE Kplɛ nwu niebuɛ. 16 Dikpeni kasɔ nwu batii bamuu lɛyɔ nwu ole di asaa finle ya mmle ɔta kamɛ diɛta ni Israel ɔka ɔkpɛ ɔblako. 17 Ɔka ɔkpɛ kubale alɛ ɛɛta ofiɛ asaaɔta, alesaa asaaɔta ku nta asaaɔta ɛɛta ayi nwu nlekɔ, Awɛntɛ Fɔle ku Anyɛɛtɛyi- di ayi ole ya amuu bɛɛta ni di Israel batii kamɛ. Nnwɔɔ nimata okpile asaaɔta, alesaa asaaɔta, ofiɛ asaaɔta ku atoko ɔkyɛ ole asaaɔta man-yɔ mambla lekoto otikiti manta Israel batii nɛ.

18 " ‘Nnya ɔlaa wɔ di SAATE Kplɛ nwu kobuɛ ni alɛ: Di kɔwɛntɛ kasale dii kasale suoto yi, biyɔ lɛnankyuebi-suɔtɔ le ninaa ni kɔbɔ bikleklesa kakleklekɔ nwu. 19 Oletatɛ ayɔ okpile asaaɔta ntɔ nwu afifia di olekatakɔ nwu kayokontũ, afifia di oleɔta akyikye amuusi nkyakɔ nwu nna suoto ku kaflɔnkɔ ka kaamɛ n-yokontũ suoto. 20 Bibla nkpo okle di kɔwɛntɛ nwu dii kuɛnsinle suoto bita otii lele niɛbla okpile ninanle ɔtɛ ɛɛtɛ ɛɛbla ni ee di ɔtantofo kamɛ; nkpo biɛbla lekoto otikiti bita olekatakɔ nwu nɛ.

21 " ‘Bile Okpi Diisi Ofe Dii nwu di Israel batii kɔwɛntɛ kasale suoto. Di lefosi dii naafa suoto yi, bile dii nwu ayi akuɛnsĩ, di obe wɔ mmle kamɛ, biele bloblo wɔ di lɛnyankasaa diesi ni kaamɛ. 22 Di dii nwu nkpo kale yi, ɔka ata nankyue-suɔtɔ fɛ okpile asaaɔta ata suoto nɔɔ ku kasɔ nwu batii bamuu. 23 Di Ayi akuɛnsĩ nwu olebee kamɛ yi, dikpeni ɔka lɛta banankyue-suɔtɔ bakuɛnsĩ ku akunumuu akuɛnsĩ ba ninaa ni kɔbɔ fɛ ofiɛ asaaɔta dii biala ɛɛta SAATE nwu. Aayɔ katiekpaa kafɔɔ ata diɛta ni okpile asaaɔta. 24 Dikpeni ɛɛta kamɔɔ kankyi onwii ɛɛkaasa di nankyue-suɔtɔ biala suoto, ɛɛta kafɔɔ kamɔɔ kankyi onwii ɛɛkaasa di dikunumuu biala suoto, diɛkyakaa ni di nnɔfɔ kpoko onwii suoto diɛta ni kamɔɔ kankyi biala.

25 " ‘Di ayi akuɛnsĩ Dii nwu ole wɔ ninkye ni kasɔ di Israel batii kɔwɛntɛ kuɛnsinle kamɛ di lefosi dii nɔnle suoto yi, dikpeni ankple anta asaa nwu okle anta okpile asaaɔta, ofiɛ asaaɔta, alesaa asaaɔta ku nnɔfɔ.