1 Ni di SAATE nwu ɔlaa lawa kuatɛɛ alɛ: 2 "Otii obi, buɛ ɔlaa fatɛ, faabuɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ:

"‘Wi kaku osie kanya faabuɛ falɛ,

"Dii nwu nkpo diyɔɔsa!"

3 Diekye dii nwu ntɔɔtɛɛtɛɛ,

SAATE nwu dii ntɔɔtɛɛtɛɛ-

alokonkyɛ dii,

obe wɔ di nnle nwu kamawɔɔ nii.

4 Kapamii kamawa di Egipte suoto,

dibuo dibinte kafɔɔ kamawa di Etiopia suoto.

Nse mba beelo ni lɛnɔɔ di Egipte yi,

babalɛ lɛsaawɛ nɔɔ mansifiko

mambibiɛ kafɔɔ asɔse nɔɔ mantɛ kaasɔ.

5 " ‘Etiopia ku Put, Lidia ku Arabia omuu, Libia ku kanya ninii kasɔ nwu batii kamanɔɔ di kapamii kanya diɛkyakaa ni di Egipte.

6 " ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Batii ba nin-yɛ ni Egipte kamaa kamanɔɔ,

lɛkanta nɔɔ osie nwu kafɔɔ kamawa kasɔ.

Diɛyɔ ni di Migdol diɛlaadu ni di Siene,

babanɔɔ di kapamii kanya di kamɛ nɔɔ,

SAATE Kplɛ nwu niebuɛ.

7 " ‘Babate bafukuti

di nsɔ be ninte ni nfukuti kamɛ,

sekpoo kplɛ lɛma kafɔɔ kamate

di sekpoo kplɛ se niɛwɔɔ site ni kamɛ.

8 Nse lekpee Egipte ɔtɔ,

di bakyakaakotɛ nɔɔ kafɔɔ bamuu lɛwɔɔ yi,

ninfɛ babatofo alɛ ami ninle SAATE nwu nɛ.

9 " ‘Batɔkyɛntɛ kamadie di ɔkyɛ nii di seklo kamɛ manayɛkɛsa Etiopia batii ba niediki atoko basi ni di dii nwu nkpo suoto. Babanu dibuo osie kanya di Egipte kawɔɔ dii nwu suoto, diekye nwaako diɔwa ɔbawa.

10 " ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Kamayɔ Egipte batii ɔlambu nwu n-wako kase,

diefe ni di Babel ɔka Nebukadnesar kɔnɛɛ suoto.

11 Babakpaa nnwɔɔ ku bakpɛtɛ nɔɔ- mba niɛtɛ bakpe ni amumu balenke ni nnle nwu-

manwako mamawɔɔsa kasɔ nwu.

Babananfi mpamii lɛma di Egipte suoto,

manlo kafɔɔ batii man-yiisa kasɔ nwu suoto.

12 Kamata Nil seklenyii nsɔɔ,

nsunsũ kasɔ nwu kafɔɔ nta batii kpile.

Diefe ni di bafɔɔ nnɛɛ kamɛ yi,

kamalalaasa kasɔ nwu ku lɛsaa biala ninsi ka ni kaamɛ ntɛ. Ami SAATE nwu niɛkakatɛ.

13 " ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Kamawɔɔsa afiɔtii nwu,

nimbibiɛ kafɔɔ atembi asaa nwu di Memfis.

Ɔka kuonwii dilɔbasinwɛ di Egipte,

kamata lɛyɛkɛ kafɔɔ nwɛ di kasɔ kamuu suoto.

14 Kamata Patros kasɔ nlalaa kante,

ninkpee Soan ɔtɔ,

kamayɔ letokonanfi kafɔɔ n-wako di Tebes suoto.

15 Kamanyɛɛnɛ ɔblɔ yakayaka nii nkpete di Pelusium suoto,

Egipte kawofakɔ nwu,

mbudi kafɔɔ Tebes batii ɔlambu nwu ndiki.

16 Kamakpee Egipte ɔtɔ;

Pelusium kamasiɛ di dibuo kplɛ kamɛ.

Afɛɛfɔ siene kamabiɛ Tebes seyoyiɛ antɛ kaasɔ;

Memfis kamasiɛ di ninyinyii kamɛ obe lele.

17 On ku Pibeset bakosopo

kamanɔɔ di kapamii kanya,

sekpoo kplɛ nwu simu kafɔɔ kamasifi sɛlanle kamɛ.

18 Ditunu dibale di dii nwu di Tehafne,

nse letekete Egipte atoo nutũle nwu;

nfa di lɛkanta nɔɔ osie nwu kamase nɛ.

Alokonkyɛ kamatĩi nwɔ suoto,

sekpoenyii nɔɔ kafɔɔ kamasifi sɛlanle kamɛ.

19 Nioso kamayɔ letokonanfi n-wako di Egipte suoto,

ni babatofo alɛ ami ninle SAATE nwu nɛ.’ "

20 Di lefosi lɛlɛɛ kasale kamɛ, di Israel batii kɔwɛntɛ kasale kamɛ, di dii kuɛnsinle suoto yi, SAATE nwu ɔlaa lawa kuatɛɛ alɛ: 21 "Otii obi, ntoofee Egipte ɔka Farao kɔnɛɛ. Badinii kũ alɛ kuakyá ee baboodi kũ alɛ kuawɛ osie nwaa kunta kapamii oklee. 22 Nkpo oso nnya ɔlaa wɔ di SAATE Kplɛ nwu kobuɛ ni alɛ: Lɛtaka n-yɛ di Egipte ɔka Farao suoto. Kamafefee nnɛɛ nɔɔ akyuu nwu anyɔ, nko ninlɛ ni ku nko niefee nii, ninta kafɔɔ kapamii nkpa kundie di kɔnɛɛ nɔɔ. 23 Kamasamiisa Egipte batii nkpete di nnle nwu kamɛ, ninsɛ ma kafɔɔ nfenko di nsɔ nwu kamɛ. 24 Kamakpee Babel ɔka nnɛɛ osie, nin-yɔ kafɔɔ kapamii nii nkpee nwɔ kɔɔnɛɛ, kafɔɔ kamafee Farao nnɛɛ. Abatũuni di anu nɔɔ kafɔɔ fɛle otii wɔ niefũ ni kakɔ osie kanya. 25 Kamakpee Babel ɔka nnɛɛ osie, kafɔɔ Farao nnɛɛ kamakpa ninsaka. Ninfɛ babatofo alɛ ami ninle SAATE nwu, nse lɛyɔ kapamii nii lekpee di Babel ɔka kɔnɛɛ, ɛɛnanfi ka kafɔɔ ɛɛkyɔɔ di Egipte suoto nɛ. 26 Kamasamiisa Egipte batii nkpete di nnle nwu kamɛ, ninsɛ ma kafɔɔ nfenko di nsɔ nwu kamɛ. Ninfɛ babatofo alɛ ami ninle SAATE nwu nɛ."