1 Di obe nwu kamɛ, osuɔtɔ onwii lakye Lewi kɔna kamɛ, ni aayɔ ɔsanko di Lewi kɔna nwu kamɛ nɛ. 2 Ni aalaka lɛmɛ aalofo obisuɔtɔbi nɛ. Obe wɔ aanya alɛ obi nwu nkpo nlɛ nii, aawofasa nwɔ awɛntɛ atiɛ. 3 Obe wɔ aanya alɛ ɔlabasinfuo nwɔ ni owofasa yi, ni aayɔ kakyikyɛ ka baayɔ sekpoku baaloso nii, aayɔ ama ku kamantĩ aatĩtĩi ka, ni aayɔ obi nwu nkpo aatensa kaamɛ, aayɔ nwɔ aalaakpee di sɛfa kamɛ di Nile okle kotoko nɛ. 4 Obifoole nwu nkpo obilɛma sankobi layila fanfa aatoonyu alɛ be nimabla nwɔ.

5 Nfanwu Farao obisankobi lakyɛ Nile okle nwu kamɛ alɛ ɔlaakpe ntu. Ninfɛ di bakpɛmblatɛ nɔɔ lakyɛ baatookyi okle nwu kotoko nɛ. Ninfɛ aanya kakyikyɛ nwu di lɛtaani kamɛ, ni aakpee ɔlanle sankobi nɔɔ onwii alɛ alaayɔ awako nɛ. 6 Obe wɔ di ɔka obisankobi nwu latikiti aanyu nii, ni aanya obifɔɔle nwu kowi kaamɛ nɛ. Diakpɛ nwɔ nyaami diatɔɔ. Ni aabuɛ alɛ, "Nwɔ mmle Hebri babi onwii dile."

7 Ninfɛ di obilɛma sankobi lakaalɛ Farao obisankobi nwu alɛ, "Nkyɛ ninaamiɛ Hebri ɔsanko abatoonyu obi nwu nkpo ata fɔ?"

8 Ninfɛ aatɔkɔ nwɔ alɛ, "Yii, kyɛ." Ninfɛ di ɔsankobi nwu nkpo lakyɛ aalaakpaa obifɔɔle nwu ɔya aawako nɛ. 9 Ninfɛ di Farao obisankobi nwu latɔkɔ obifɔɔle nwu ɔya alɛ, "Fũ obifɔɔle wɔ mmle faanyu nwɔ fatɛɛ, kamata fɔ koto." Nioso ɔsanko nwu nkpo lafũ obifɔɔle nwu nkpo aanyu. 10 Obe wɔ di obi nwu nkpo lamuɔ nii, aakpaa nwɔ aakyɛnko Farao obisankobi nwu, aakple nwɔ obisuɔtɔbi. Ninfɛ aatɔɔ leyooto alɛ Mose nɛ. Diekye aabuɛ alɛ, "Ntu kamɛ ladiki nwɔ lakyeko."

11 Dii ninwii obe wɔ di Mose ntoomuɔ nii, aadie aakyɛ lɛba le di batii nɔɔ bamu lawɛ ni aalaanyu ma mmle baatɔɔbla ni sɛkpɛ lɛma nwu siene. Ninfɛ aanya mmle okle di Egipte otii latɔɔpɛ ni obilɛma Hebri otii nɛ. 12 Mose lamunikĩi aanyunyu aafenko, obe wɔ aanya alɛ otii kuonwii dilɔɔnyɔɔ nii, ni aalo Egipte otii nwu nkpo aakookaa nwɔ kɔɔtɛ kamɛ nɛ. 13 Kaleesɛ, aakple aakyɛ ni aanya Hebri batii banyɔ latɔɔkpɛ nɛ. Ninfɛ aakaalɛ nnwɔ ole nitawɛ ni alɛ, "Be lɛsaa oso fɔɔpɛ owo lɛfɔ Hebri otii nkpo?"

14 Ninfɛ di osuɔtɔ nwu nkpo lakaalɛ nwɔ alɛ, "Owe niɛbla fɔ tunletɛ ku kankotɛ loo? Sɛɛ foomiɛ falɛ faloe fɛ mmle okle faalo ni Egipte otii nwu?" Ninfɛ di Mose layɛkɛ aatɔkɔ suoto alɛ, "Lɛsaa le labla ni ntoodie mi kayi."

15 Obe wɔ di Farao lanu ni ɔlaa wɔ mmle, aamiɛ alɛ oolo Mose, kafɔɔ Mose latoso di Farao nfũ aasifi Midian kasɔ, nfa aalaasiɛ di ntu dibiɔ ɔlɔɔkɔ nɛ. 16 Midian batii oletatɛ onwii lawɛ babisankobi bakuwɛnsĩ. Dii ninwii, baawa ntu odu okpete di babɔkɛɛ ntu dinyinsaa kamɛ alɛ bɔɔta ote lɛma babɔkɛɛ ntu mannyi. 17 Ninfɛ di bafosobakpatɛ banwii lawa baabatososa ma nɛ. Kafɔɔ Mose lakyɛ aalafũ ma, ninfɛ adu ntu aata babɔkɛɛ lɛma baanyi nɛ.

18 Obe wɔ baasankobi nwu nkpo lakple baasifi ni ote lɛma Reuel nfũ yi, ni aakaalɛ ma alɛ, "Be oso biewolaa okple miɛ nkpo?"

19 Ninfɛ baatɔkɔ nwɔ alɛ, "Egipte otii onwii niabafũ wo di bafosobakpatɛ nwu nnɛɛ kamɛ. Aadu bia ntu aata wo buata babɔkɛɛ loo baanyi."

20 Ninfɛ aakaalɛ babisankobi nwu alɛ, "Ɔfɛ akpe? Be lɛsaa oso biediɛ nwɔ ninfa? Bilaakpaa nwɔ biwako aabale alesaa."

21 Mose latũna alɛ oosiɛ di Reuel nfũ, ninfɛ aayɔ obi nɔɔ sankobi Sipora aatɔɔ aayɔ nɛ. 22 Sipora lalofo obisuɔtɔbi, ni di Mose latika nwɔ leyooto alɛ Gersom. Diekye aabuɛ alɛ, "Nle ɔfɔɔ di bafɔɔ kasɔ suoto."

23 Alɛɛ kpi sɛmaa, Egipte ɔka labakpi. Israel batii latootuuni di sɛlanle lɛma nwu kamɛ, baawi kaku, kaku lɛma nwu baawi baakaalɛ ni lɛkyakaako ta sɛlanle lɛma nwu oso, lakyɛ dialadu Yaa nfũ. 24 Yaa lanu atuuni lɛma nwu, ni aanyuma kanya ninii nɔɔ nwu ku Abraham ku Isak ku Yakob nɛ. 25 Nioso Yaa lamunikĩi aanyu Israel batii dibuo aayɔ nwu ole aata ma.