1 Mose lasiisa Israel batii bamuu ni aatɔkɔ ma alɛ, "Nnya asaa ya mmle di SAATE nwu kokpee ye kufiofa alɛ biabla ni: 2 Di nnawɔkyi biala kamɛ, ayi akuɔ biɛbla sɛkpɛ, kafɔɔ dii kuɛnsinle diele ye dii klekle, diele Lɛnyɛɛtɛyi dita SAATE nwu. Otii lele niɛbla ɔkpɛ lele di dii nwu nkpo suoto, dikpeni beelo nwɔ. 3 Bitankutaa bia ɔtɔ di leyo kuniwii kamɛ di lɛnyɛɛtɛyi nwu nkpo suoto."

4 Mose latɔkɔ Israel batii bamuu alɛ, "Nnya ɔlaa wɔ di SAATE nwu kobuɛ ni: 5 Di asaa ya ninkpe ye ni kanya, bita asaa bita SAATE nwu. Otii biala diekye nwɔ ni di otu kamɛ ata lɛsaa ata SAATE nwu; asaa ya okle baata ni ninle, Koto sɛɛle, koto fututu ku lɛbɔɔsaa; 6 abula bluu ku n-ya niɛbla ni fɛ ɔsɛɛ, okũ sɛɛle bɔmbɔ ku okũ biene fɛnɛnɛɛ, batie sinwini; 7 akunumuu akũ ya beekpee ni kɔfa sɛɛle ku ntu kamɛ banankyue akũ ku akesia sewoso; 8 nnɔnyi awosobi nnɔnyi be mankpete ni baakaniɛ kamɛ ku nnyɔnyi kɔnɔkɔnɔ ku silufii man-yɔ mampɛ ni ɔfɔ; 9 ku oniks afuɔ ku afuɔ ya niefũ ni kɔya alɛ baayɔ mankakasa di akpeele ya mansaka ni siimu, antĩi ni ntɛɛ.

10 "Batii ba bamuu nin-ye ni kɔnɛɛ kamɛ sɛkpɛ nwaa kaamɛ lee basi baabla lɛsaa biala fɛ mmle okle di SAATE nwu lakpee ni kufiofa: 11 Lɛkpaayo klekle nwu ku ɔba nɔɔ ku kayi abula nini ku amufũsaa nini ku n-yokontũ nɔɔ sewoso ku selenle ku akpaka ku asɔse lɛnya. 12 Kanya ninii lɛlakaa nwu ku sewoso nɔɔ ku katĩita ninka ku dibula le nietĩi ni nii; 13 opũnu nwu ku sewoso nɔɔ ku asaa ya amuu mamblako ni ɔkpɛ di opunu nwu suoto ku bloblo klekle wɔ manta ni Yaa; 14 kandiɛ ditikasaa nwu diɛta ni ɔtɔ ku akpɛnsaa ya man-yɔ mamblako nwu ni ɔkpɛ ku nnɔnyi be man-yɔ masɔ ni ɔtɔ; 15 ole ɔta akyikye ya manfiɛ ni olufui ku sewoso nɔɔ, ku nnɔnyi be man-yɔ mampɛ ni ɔfɔɔ ku olufui kɔnɔnkɔnɔ nɔɔ ku abula ya mansaka ni di Lɛkpaayo nwu kayokontũ; 16 ku ofiɛ asaaɔta oleɔta akyikye ku abɔɔsaa nkɔnii ku ewoso nɔɔ ku asaa nɔɔ amuu; abɔɔsaa ɔsɛfɛ ku lɛsɔse nɔɔ; 17 ku abula ya baasaka mankyisa ni kɔba nwu kaflɔnkɔ ku sewoso nɔɔ ku asɔse lɛnya ku abula ya baasaka ni di kɔba nwu kaflɔnkɔ kayoko; 18 ku lɛkpaayo nwu ayee ku sikũ ninsĩ ku kaflɔnkɔ nwu; 19 ku akpeele losole biene nwu di ole batatɛ makpee ni nse bɔɔbla ɔkpɛ di kakleklekɔ nwu ku Aron oletatɛ akpeele klekle nwu ku babisuɔtɔbi nɔɔ akpeele nwu nse bɔɔbla ɔkpɛ fɛ olebatatɛ."

20 Ninfɛ di Israel batii nwu bamuu lakyɛ di Mose nfũ baakple baasifi akpaayo lɛma kamɛ nɛ. 21 Ninfɛ di mba niatuna ni, diakpanko ma ni siitu kamɛ lawa babata asaa baata SAATE nwu nɛ. Baawako asaa ya amuu niafĩ aata ni Lɛkpaayo le mansi ni otofo, ku asaa ya amuu babablako ni ɔkpɛ ninfa ku n-ya baayɔ mambla ni oletatɛ akpeele klekle nwu. 22 Basuɔtɔ ku basanko ba bamuu diakye ni di otu kamɛ, baayɔ koto sɛɛle asaa ate ate baawako. Baawako asaa ya mankaasa ni di akpeele suoto ku atokosakasaka ku akɔnii ku anyɛnɛ. Bamuu lɛma baayɔ koto sɛɛle asaa nwu baawako fɛ asaaɔta ya bɛɛtakatɛsa bɛɛkyɔɔ ni SAATE nwu. 23 Otii biala niawɛ okũ bluu ku nse niabla ni fɛ ɔsɛɛ ku okũ sɛɛle bɔmbɔ ee okũ biene fɛnɛnɛɛ ee tie sinwini ku akunumuu akũ baakpee ni kɔfa sɛɛle ee ntu kamɛ banankyue akũ baawako. 24 Batii ba bamuu niawɛ ni koto fututu ee abɔɔsaa baayɔ baawako SAATE nwu fɛ asaaɔta. Batii ba kafɔɔ niawɛ ni akesia sewoso baafuo ni ɔyɔ ɔblako ɔkpɛ nwu layɔ baawako. 25 Basanko ba bamuu niatofo mmle okle mantaa ni seleteku kafɔɔ lataa seleteku bluu sele ku nse niabla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ baawako. 26 Basanko ba bamuu kafɔɔ niawɛ ni lɛsaatofo le okle manloso ni batie sinwini, baayɔ otu biene baaloso sĩ. 27 Batunletɛ bamuu kafɔɔ baawako oniks afuɔ ku afuɔ ya niafũ ni kɔya alɛ baayɔ mankakasa di simu akpeele ku ntɛɛditikasaa suoto. 28 Baawako kafɔɔ akɔnɔkɔnɔsaa ku nnɔnyi awosobi nnɔnyi be man-yɔ mansɔ ni ɔtɔ ku ɔfɔɔ ɔpɛ nnɔnyi be baakpee ni olufui kɔnɔkɔnɔ nwu. 29 Nioso Israel batii bamuu, baasanko ku baasuɔtɔ ba niatuna alɛ bɔɔkyakaako ni di ɔkpɛ wɔ di SAATE nwu lata ma aafenko ni di Mose suoto layɔ asaaɔta lɛma baawako SAATE nwu ku otu biene.

30 Ninfɛ di Mose latɔkɔ Israel batii nwu alɛ, "Binu, SAATE nwu ntoodiki Besalel, Uri obisuɔtɔbi wɔ ninle ni Hur ɔwa niekye ni Yuda leyo kamɛ. 31 Ɛɛyɔ Yaa ninwuna le ninta ni lɛsaatofo, lɛsɔnu, ninumbe ku disibu diɛta ni kɔnɛɛ kamɛ sɛkpɛ ɔbla ate ate eekpee nwɔ kaamɛ, 32 alɛ aafuo disi obu an-yɔ koto sɛɛle ku koto kufutu ku abɔɔsaa amblako kɔnɛɛ kamɛ ɔkpɛ nwaa. 33 Antofo mmle okle baabɛ afuɔ mankpekpee ni di asaa kamɛ ku mmle okle baabɛ sewoso mamblako ni kɔnɛɛ kamɛ sɛkpɛ ateate simuu. 34 Ɛyɔ lɛsaatofo nwu ɛɛta nnwɔɔ ku Oholiab Ahisamak obisuɔtɔbi wɔ niekye ni Dan leyo kamɛ alɛ baatuo batii bamba. 35 Aayɔ lɛsaatofo aakpee ma kaamɛ pɔ alɛ baabla kɔnɛɛ kamɛ sɛkpɛ ate ate, manloso abula bluu, mantaa seleteku se niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ manloso ni abula ate ate.