1 SAATE nwu latɔkɔ Mose ku Aron di Egipte alɛ, 2 "Diɛyɔ di nua diesifi nii, kɔwɛntɛ ko mmle kale ye kɔwɛntɛ kasale di lɛlɛɛ kamɛ. 3 Bitɔkɔ Israel batii bamuu bilɛ, di kɔwɛntɛ ko mmle kamɛ dii fosile yi, leyo biala osuɔtɔ ayɔ foso ee tie wɔ ninayibe nii alo. Leyo biala ayɔ bɔkɛɛ onwii. 4 Nse leyo lewo batii diɛpɔ baloo ni foso onwii owee, ni manko mba ninsi bakaako ni bawo basɛ onwii, di mmle di leyo nwu batii mpɔ ni kanya ku mmle babafuo ni oloo owee. 5 Bɔkɛɛ wɔ bibayɔ ni kale bɔkɛɛ wɔ nintoofũ lɛlɛɛ ninwii ale ni osuɔtɔ di lɛsalɛsaa diɛbla nwu ni kafɔɔ, aale foso ee tie. 6 Bielolaa babɔkɛɛ nwu nkpo binyu nwaa diɛlaadu kɔwɛntɛ nwu nkpo lefosi dii naafa. Di dii nwu nkpo kɔtɔɔfɔ, di Israel batii bamuu balo babɔkɛɛ nwu. 7 Baayɔ ma ntɔ nwo bafifia di n-yokontũ sewoso ku nsintɛɛ sele di leyo le bewee ni bɔkɛɛ nwu. 8 Dii nwu nkpo kakyɛ baafiɛ sina nwu nkpo manwee ku bloblo wɔ mankpee ni lɛnyankasaa ku afatasi lonle. 9 Bitanwee sina nwu nkpo sɛkɔɔnle ee biawa sĩ, kafɔɔ bifiɛ sĩ di ɔtɔ, disi ku nkpaa ku kafutu kamɛ asaa fɛɛ. 10 Bitambu ku sinwii biatɛ kale lasɛ sĩ; nse sewo lebu kaale lɛsɛ, ni biekpee sĩ ɔtɔ bifiɛ. 11 Nnya letembi le kamɛ biesiɛ fiɛ biewee sĩ ni: Bikpee akpeele lee bietika sifiamɛ. Biekpee ntokota di nkpaa, bieklee sɛkyɛnwoso lee di nnɛɛ. Biewee sĩ nkyenkye; diekye nle mmle ninle SAATE nwu Okpi Diisi Ofe nɛ.

12 "Di dii nwu nkpo kakyɛ kamafe di Egipte kasɔ suoto nlo obisuɔtɔbi kasale biala di batii ku babɔkɛɛ suoto. Kamananfi afiɔ ya amuu ninkpe ni di Egipte kasɔ suoto kafɔɔ kootoko. Diekye ami ninle SAATE nwu. 13 Ntɔ nwu nkpo di n-yokontũ lee sewoso kamale nsũ lɛtɛsaa di ayo ya bisi nii. Alɛ nse lɛnya ntɔ nwu nkpo kamawaalɛ ye nfe. Alɛ kukpi dibuo le mmle dilabakpanko ye, nse lɛwa Egipte batii ɔwɔɔsa.

14 "Nle mmle kale dii le biatoole mintoonyuma ni SAATE nwu lɛlɛɛ biala. Diale ye ɔsaabla wɔ nikate ninta ni babi ku bawa kaayi kamaa dinaa ni kaloo. 15 Di ayi akuɛnsĩ kamɛ dinaa alɛ biele bloblo wɔ beekpee ni lɛnyankasaa. Di dii kasale kamɛ, biadiki lɛnyankasaa biala di ayo lee kamɛ. Di ayi akuɛnsĩ nwu nkpo kamɛ otii lele niele lelesaa le di lɛnyankasaa nsi nii, baadiki nwɔ di Israel batii kamɛ. 16 Di dii kasale, bisi di leklekle kamɛ. Di dii kuɛnsĩnle kamɛ kafɔɔ biabla diakpanwu. Bitambla ɔkpɛ kuonwii di ayi nwu nkpo kamɛ, diediki alesaa ya biale ni lete biaawa.

17 "Bitoole Bloblo wɔ Ninantaka ni Dii nwu nkpo, diekye dii nwu lakpaa nfaabi lee nwu ladieko ni di Egipte kasɔ suoto nɛ. Bitoole dii le mmle, diɛyɔ ni kɔɔna diesifi ni kɔna, dinaa ni kaloo. 18 Di kɔwɛntɛ kasale di lɛlɛɛ kamɛ, bloblo wɔ dikpeni biele ni ninle nwɔ manakpee ni lɛnyankasaa, diɛyɔ ni di lefosi dii naafa kɔtɔɔfɔ diɛlaase ni di afosi anyɔ dii kasale kɔtɔɔfɔ. 19 Di ayi akuɛnsĩ kamɛ dinaa alɛ bɛɛnya lɛnyankasaa kuniwii di ayo lee kamɛ. Otii lele kafɔɔ niele lɛsaa lele di lɛnyankasaa nsi ni, baadiki nwɔ di Israel batii bamuu nwu kamɛ, ɔfɔɔ ale woo, ee Israel obi ale. 20 Di obe nwu nkpo kamɛ, bitanle lɛsalɛsaa di lɛnyankasaa nsi ni kaamɛ. Kakɔ lele bikpe, bile bloblo wɔ ninantaka ni."

21 Ninfɛ di Mose lalɛɛ Israel banɔɔfotii bamuu aatɔkɔ ma alɛ, "Bitɔɔkyɛ biɛlaamufũ babɔkɛɛ bita ayo lee batii, baalo bata Okpi Diisi Ofe dii nwu nkpo ole. 22 Biɛyɔ hisope* ɔfa bimɛɛsa di ntɔ nwu di bɛɛsi kamɛ, biɛyɔ ntɔ nwo bififia di n-yokontũ osi sewoso ku sɛlɔɔkɔ sele suoto. Kuonwii lee atandie di leyo nɔɔ kayokontũ diɛlaase di kuyitatũ. 23 Diekye SAATE nwu kamafe di kasɔ nwu suoto anwɔɔsa Egipte batii. Kafɔɔ nse ɛɛnya ntɔ nwu nkpo di n-yokontũ osi sewoso ku sɛlɔɔkɔ sele yi, ni abawaalɛ ye ayo anfe. Alabata kukpi tɔkyɛntɛ nwu abuo ye ayo kamɛ awɔɔsa ye.

24 "Aye ku banantii lee bianyuma kufiofa ko mmle, biele kũ dinaa ni kaloo. 25 Nse biebuo kasɔ nwu nkpo di SAATE nwu labuɛ aatɛ alɛ abata ye ni suoto yi, bietoole dii le mmle nwu nkpo. 26 Nse babi lee kafɔɔ lɛkaalɛ ye alɛ, ‘Dii le mmle ole kasɔ mɔ?’ yi 27 ni biɛɛtɔkɔ ma bilɛ, ‘Okpi Diisi Ofe oleɔta SAATE dile. Diekye aawaalɛ Israel batii ayo aafe di Egipte kasɔ suoto aalaawɔɔsa Egipte batii, aadiɛ batii loo.’" Ni di Israel batii bamuu lawakasɔ baasumu SAATE nwu nɛ. 28 Israel batii nwu labla di ɔlaa wɔ di SAATE nwu lakpee kufiofa aafenko ni di Mose ku Aron suoto.

29 Di nkyɛntɛɛ, SAATE nwu lalo Egipte batii babisuɔtɔbi kasale bamuu, diayɔ ni di Farao wɔ niasiɛ ni di lɛkakpomii suoto obisuɔtɔbi kasale, dialaase di leyo tentɛ leeyo katenkɔ obisuɔtɔbi kasale, ku babɔkɛɛ bamuu abi suɔtɔbi kasale. 30 Farao ku banɔɔfotii nɔɔ bamuu ku Egipte batii bamuu lataka kukakyɛ nwu baatoowi osie kanya di Egipte kasɔ suoto. Leyo kuninwii ditawɛ di otii ditakpi nii.

31 Farao lakpee baalɛɛ Mose ku Aron baatɔɔ ku kakyɛ nwu nkpo, ni aatɔkɔ ma alɛ, "Dipɛ ye sɛwa! Biedie di kale nii kamɛ bisifi. Aye ku Israel batii bamuu! Bitɔɔkyɛ biɛlaasumu SAATE nwu fɛ mmle biɛkaalɛ ni. 32 Biɛkpaa bafoso lee ku banankyue lee bisifiko fɛ mmle biabuɛ ni, biɛtɔɔkyɛ. Biewii mi lɛyɔɔ kafɔɔ."

33 Egipte batii bamuu labla Israel batii nkye nkye alɛ badie ma di kale kamɛ basifi wla, diekye baabuɛ alɛ, "Bamuu loo buɔwa ɔbakpi!" 34 Nioso Israel batii layɔ nnaafũ nwɔtɔle lɛma, batakpɔtɔɔsa lɛnyankasaa, baayɔ nnaafũ anwɔtɔsaa lɛma baanii di abula baatika di amuusi. 35 Ninfɛ di Israel batii labla fɛ mmle okle di Mose lakpee ma ni kufiofa, ni baakaalɛ Egipte batii asaa, ninle ni koto fututu ku koto sɛɛle ku abula nɛ. 36 SAATE nwu labla Egipte batii lanya Israel batii nyaami, baata ma asaa ya baakaalɛ nii. Di nle mmle ɔbla kamɛ baafũ Egipte batii lɛsaawɛ.

37 Israel batii ladie di Ramses baalaadu Sukot. Basuɔtɔ fɛ nkpe alafa akuɔ niakyɛ nkpaa di basanko ku babisɔ diesi ni kaamɛ. 38 Batii bamba kafɔɔ latikanko ma manale ni Israel batii. Baakle kafɔɔ babɔkɛɛ ɔlambu ate ate, bafoso ku banankyue kafɔɔ lakyakaa. 39 Nnaafũ be baaklee baakyeko ni Egipte yi, baafiɛ bloblo wɔ ninantaka ni. Nnaafũ nwu nkpo lɛnyankasaa ditasiɛ diekye otososa baatososa ma di Egipte, batawɛ kayaa kafɔɔ baawa alesaa baaklee.

40 Alɛɛ ya di Israel batii lasiɛ ni di Egipte kasɔ labla alɛɛ alafa-ana-afosi-atiɛ. 41 Di alɛɛ alafa-ana-afosi-atiɛ nwu kaloo kɔ tututu ni di SAATE nwu nfaabi nwu mmuu ladie di Egipte kasɔ suoto nɛ. 42 Diekye SAATE nwu lanyu ma ku kakyɛ nwu aadiki ma aakyeko ni Egipte kasɔ nwu suoto oso, Israel batii bamuu nte kaloyi di obe nwu kamɛ man-yɔ dibu manta SAATE nwu, diɛyɔ ni kɔɔna diesifi ni kɔna.

43 SAATE nwu latɔkɔ Mose ku Aron alɛ, "Nnya Okpi Diisi Ofe kufiofa ninle nko mmle nɛ:

"Ɔfɔɔ kuonwii atanwee ko ye. 44 Ɔlanle lele biɛya kafuo owee, nse bitɔɔkyɛlɛnsa nwɔ suoto. 45 Kafɔɔ ɔfɔɔ ku otii wɔ biefũ ɔɔbla ɔkpɛ anta ye ni nnaa osuku anwee.

46 "Dikpeni beewee sĩ di leyo ninwii kamɛ, bitandieko sina kusinwii biasifiko kayi. Bitambiɛ dikufi kuninwii kafɔɔ. 47 Dikpeni i, Israel kale batii bamuu lele dii nwu.

48 "Ɔfɔɔ lele ninsi ye kaamɛ oomiɛ alɛ ale SAATE Okpi Diisi ofe dii nwu nkpo yi, dikpenii, ɛɛkyɛlɛnsa osuɔtɔ biala ninkpe nwɔ ni leeyo kamɛ suoto; ni aafuo dii nwu nkpo ole fɛ otii wɔ beelofo ni fɛ Israel obi. Kafɔɔ osuɔtɔ wɔ manankyɛlɛnsa ni suoto nnaa osuku anwee. 49 Kufiofa ko mmle lenii otii biala ninle ni Israel obi ku ɔfɔɔ wɔ ninsi ye ni kaamɛ."

50 Israel batii bamuu labla fɛ mmle okle di SAATE nwu lakpee ni Mose ku Aron kufiofa. 51 Di dii nwu nkpo kale, SAATE nwu nkpo lakpaa Israel batii nfaabi nwu nkpo aadieko di Egipte kasɔ suoto.