1 Ninfɛ di SAATE nwu latɔkɔ Mose alɛ, 2 "Tɔkɔ Israel batii falɛ bakple baalaasi batɛɛtɛɛ Pi-Hahirot, di Migdol ku lekpo nwu obo. Basi di lekpo nwu kotoko niɛkyɔɔ ni Baal Sefon anu. 3 Diekye Farao manyu alɛ, ‘Israel batii nwu ntooyu osuku bookyi kasɔ nwu suoto, diekye ɔfaafuu nwu lɛmana ma kuokyi.’ 4 Ni kamawɛnsa Farao otu osie, abati ma. Kafɔɔ kamayɔ dibu nta suoto di nle kamabla ni Farao ku bakpɛtɛ nɔɔ nwu bamuu oso, nfa nfɛ di Egipte batii kamatofo alɛ, ami ninle SAATE nwu nɛ." Nioso Israel batii labla fɛ mmle okle baatɔkɔ ma nii.

5 Obe wɔ di Egipte batii ɔka lanu alɛ batii nwu nkpo ntoosifi nii, ni di Farao ku banɔɔfotii nɔɔ lakyɛlɛnsa disibu lɛma di batii nwu suoto baabuɛ alɛ, "Be mɔ buɔbla nkpo? Butɔɔta Israel batii ba mmle lesifi ɔkpɛ lɛma ɔbla ntooloo kaamɛ loo fɛ balanle!" 6 Nioso Farao lata baadieko bakeke ba di bapɔnkɔ nnanfi nii, ni aakpaa bakpɛtɛ nɔɔ aakyakaa di suoto nɛ. 7 Ninfɛ aadiki bakeke ba di bapɔnkɔ nnanfi ni banwaa alafa akuɔ ku babamba ba niakple baawɛ ni bamuu di Egipte kasɔ suoto, bamuu lɛma aadiki banyayilatɛ aase kaanya. 8 SAATE nwu lawɛnsa Farao Egipte batii ɔka otu osie, nioso aati Israel batii ba niadie baatoosifi ni ku sɛkambi. 9 Egipte batii ku bakpɛtɛ lɛma bamuu ku Farao bakeke ba di bapɔnkɔ nnanfi ni ku bapɔnkɔ ku bapɔnkɔ basiɛtɛ lɛma bamuu lati Israel batii. Ni baalatũ ma di obe wɔ baasi ni di lekpo kotoko niatɛɛtɛɛ ni Pi-Hahirot di Baal Sefon anu nɛ.

10 Obe wɔ nfɛ di Farao kɔtɛɛtɛɛ ma nii, ni di Israel batii latakatɛsa anu baanyu ni baanya Egipte batii kɔwa ma di suoto nɛ. Lɛyɛkɛ lapɛ ma, ni baawi kaku baalɛɛ SAATE nwu nɛ. 11 Ni baakaalɛ Mose alɛ, "Sɛkya ninaa di Egipte kasɔ suoto oso fɛɛkpaa wo fɛɛwako ɔfaafuu wɔ mmle kamɛ falɛ bubakpi? Be lɛsaa fɛɛbla wo nkpo nɛ, fɛɛkpaa wo feedieko di Egipte kasɔ suoto? 12 Butatɔkɔ fɔ di Egipte kasɔ suoto bulɛ, ‘Diɛ wo buole balanle buta Egipte batii’? Dilɛ wo dilenke alɛ buale balanle munta Egipte batii alɛ buakpi di ɔfaafuu wɔ mmle kamɛ!"

13 Ninfɛ di Mose latɔkɔ batii nwu alɛ, "Bitanyɛkɛ. Biyila kloklo bienyu didiki le di SAATE nwu kamadiki ye ni miɛ. Egipte batii ba mmle biɔnya ni mmle okle miɛ yi, bilabasinya ma diidii. 14 SAATE nwu kamakpɛ anta ye; ole ye ko ninle alɛ biayila kloklo."

15 Ninfɛ di SAATE nwu lakaalɛ Mose alɛ, "Be lɛsaa oso foowi kaku fanlɛɛ mi? Tɔkɔ Israel batii nwu falɛ bakyɛ sitũ. 16 Yɔ ɔkyɛnwoso lɛfɔ, faayɔ kɔnɛɛ fakyɔɔ lekpo nwu, faasɛ ntu nwu alɛ Israel batii kafe di lekpo nwu nkpo kamɛ di kasɔ kosole suoto. 17 Kamawɛnsa Egipte batii situ osie alɛ bababuo kaamɛ mantikanko ma. Ni kamayɔ dibu nta suoto diefe ni di Farao ku bakpɛtɛ nɔɔ bamuu suoto, diefe ni kafɔɔ di bakeke nɔɔ ba di bapɔnkɔ nnanfi ni ku bapɔnkɔ nɔɔ basiɛtɛ suoto. 18 Nse ntoodiki dibu nii letuo diefe ni di Farao ku bakeke nɔɔ ba di bapɔnkɔ nnanfi ni ku bapɔnkɔ nɔɔ basiɛtɛ suoto yi, ni di Egipte batii bamuu matofo alɛ ami ninle SAATE nwu nɛ."

19 Ninfɛ di Yaa tɔkyɛntɛ nwu nkpo ninleko ni Israel batii katũ lakyɛ abafe aalakpi ma kamaa nɛ. Ni di lelokonkyɛ takale nwu kafɔɔ lakyɛ ma siitũ diabakpi ma kamaa nɛ, 20 diabasiɛ di Egipte bakpɛtɛ ku Israel batii ntɛɛ. Dituntũ nwu nkpo lata ditunu lawɛ di Egipte bakpɛtɛ kakyɛ, kafɔɔ diata lɛkpa lawɛ di Israel batii kakyɛ. Ta nni nkpo oso akyuu lɛma anyɔ nwu nkpo konwii lɛma ditafuo owo ɔtɛɛtɛɛ di kakyɛ nwu nkpo kamɛ.

21 Ninfɛ di Mose layɔ kɔnɛɛ nɔɔ aakyɔɔ lekpo nwu nkpo, ninfɛ di SAATE nwu nkpo lata kɔfɛɛfɔ siene lafɛ kuakye kufĩ katunkɔ kakyɛ nwu nkpo kamuu kuatukusa lekpo nwu nkpo diafenko sɛmaa ntu nwu lasɛ di akyuu anyɔ, diata alɛ kasɔ ka niate ni di lekpo nwu ntɛɛ lakoso. 22 Ni di Israel batii lakyɛ baafe di lekpo nwu nkpo kamɛ di kasɔ kosole suoto nɛ. Lekpo ntu nwu nkpo lataka diayila kakyɛka ku kakyɛka fɛ oyoyiɛ.

23 Ninfɛ di Egipte batii lati ma nɛ, Farao bapɔnkɔ ku bakeke ba di bapɔnkɔ nnanfi ku bapɔnkɔ basiɛtɛ nɔɔ bamuu latikanko ma di lekpo nwu kamɛ. 24 Di kolesɛtũ, ni di SAATE nwu lanyu Egipte bakpɛtɛ nwu aafenko di ɔtɔ takale nwu ku lelokonkyɛ kamɛ, ni aakpee ma kakpɔkpɔtɔ nɛ. 25 Ni aata bakeke ba di bapɔnkɔ nnanfi ni nkpaa lakyako ɔmɛɛ nɛ. Nioso batasinfuo ɔtɔɔkyɛ. Ninfɛ di Egipte batii nwu lakyako obuɛ alɛ, "Bita bukple di Israel batii nkpaamaa! Diekye SAATE nwu nkpo nfɛ kɔkpɛ wo anta ma."

26 Ninfɛ di Saate nwu latɔkɔ Mose alɛ, "Yɔ kɔnɛɛ lɛfɔ fakyɔɔ lekpo nwu nkpo alɛ lekpo ntu nwu kakple nimayɔ Egipte batii nwu ku bakeke lɛma nwu di bapɔnkɔ nnanfi ni ku bapɔnkɔ basiɛtɛ lɛma nwu." 27 Nioso Mose layɔ kɔnɛɛ nɔɔ aakyɔɔ lekpo nwu nkpo, di kufĩ nfɛ kotũ nii, lekpo ntu nwu lakple diawa di akpa nimi. Obe wɔ di Egipte batii latotoso alɛ boodie ni di ntu nwu kamɛ, ni di SAATE nwu lakpa ma aakpee di lekpo nwu kamɛ nɛ. 28 Ntu nwu lakple diawa nkpaamaa diabayɔ bakeke ba di bapɔnkɔ nnanfi ni ku bapɔnkɔ basiɛtɛ ku Farao bakpɛtɛ ba bamuu niatikanko ni Israel batii aakpee di lekpo nwu kamɛ. Kuonwii lɛma ditabu.

29 Kafɔɔ Israel batii lafe di lekpo nwu nkpo kamɛ di kasɔ kosole suoto, ntu nwu nkpo lataka diayila fɛ oyiyiɛ kakyɛka ku kakyɛka. 30 Dii nwu nkpo SAATE nwu ladiki Israel batii aakyeko Egipte batii nnɛɛ kamɛ, ni di Israel batii lanya mmle okle di Egipte batii lakpi baate ni di lekpo nwu nkpo kotoko nɛ. 31 Obe wɔ di Israel batii lanya mmle okle di SAATE nwu lablako ni osie kplɛ ɔkpɛ di Egipte batii suoto yi, baayɛkɛ SAATE nwu baayɔ anu lɛma baatika nwɔ di suoto ku kpɛmblatɛ nɔɔ Mose suoto.