1 Ninfɛ di SAATE nwu latɔkɔ Mose alɛ, 2 "Nyu lo, ntoodiki Besalel wɔ ninle ni Uri obisuɔtɔbi ale ni Hur ɔwa, eekye ni Yuda leyo kamɛ. 3 Ntɔɔyɔ Yaa Ninwuna le ninta ni lɛsaatofo ku lɛsɔnu ku kɔnɛɛ kamɛ sɛkpɛ ate ate ninumbe leyiisa nwɔ kaamɛ pɔ. 4 Nlɛ awola koto sɛɛle ku koto fututu ku abɔɔsaa adiki asaa atika nya di suoto biene biene. 5 Aawola afuɔ akpekpee, aawola sewoso asaa ku kɔnɛɛ kamɛ sɛkpɛ ateate simuu. 6 Diɛkyakaa nii, lɛyɔ Ahisamak obisuɔtɔbi Oholiab wɔ niekye ni Dan leyo kamɛ lɛkyakaa nwɔ di suoto nlɛ aakyakaako nwɔ. Lɛyɔ kafɔɔ lɛsaatofo nwaa lɛta batii ba bamuu ninkpe ni kɔnɛɛ kamɛ sɛkpɛ nlɛ baabla lɛsaa biala fɛ mmle lekpee fɔ nii: 7 dile ni Lɛkpaayo le Mansi ni ku Kanya ninii lɛlakaa nwu ku katĩita nika ku lɛkpaayo nwu kamɛ asaa, 8 opunu nwu ku ɔkpɛ ablasaa lɛnya, koto sɛɛle nwaa nwu kandiɛ ditikasaa ku ɔkpɛ ablasaa ninya amuu, olufui oleɔta akyikye, 9 ofiɛ asaaɔta oleɔta akyikye nwu ku akpɛnsaa ninya, ɔsɛfɛ nwu ku lɛsɔse nɔɔ- 10 kuɛ akpeele losole nwu, akpeele klekle nwu amuu diɛta Aron oletatɛ ku babisuɔtɔbi nɔɔ nwu akpeele, nse bɔɔbla ɔkpɛ fɛ olebatatɛ, 11 kuɛ ɔfɔɔ ɔpɛ nnɔnyi nwu ku olufui kɔnɔkɔnɔ nwu diɛta ni Kakleklekɔ nwu. Babla nya fɛ mmle okle latɔkɔ fɔ ni."

12 Ninfɛ di SAATE nwu latɔkɔ Mose alɛ, 13 "Tɔkɔ Israel batii falɛ, ‘Binyuma Anyɛɛtɛyi nii nwu nkpo. Diekye dinyumasaa dile disi ni di ami ku aye ntɛɛ ku ana ya nikɔwa nii, mmle okle biatofo bilɛ ami ninle SAATE wɔ niɛbla ye ni klekle.

14 "‘Binyuma Lɛnyɛɛtɛyi nwu, diekye dii klekle dile dita ye. Otii lele ninanyuma ni, ɛɛkpɔnɔfɔsa ni, dikpenii beelo nwɔ; olele niɛbla ɔkpɛ lele di dii nwu nkpo suoto, dikpenii beediki nwɔ di batii nɔɔ kamɛ. 15 Ayi akuɔ baabla ɔkpɛ, kafɔɔ dii kuɛnsinle dile Lɛnyɛɛtɛyi, dii klekle dita SAATE nwu. Otii lele niɛbla ɔkpɛ lele di lɛnyɛɛtɛyi nwu nkpo suoto, dikpeni beelo nwɔ. 16 Israel batii banyuma Lɛnyɛɛtɛyi nwu nkpo, baatoole ni di ana ya nikɔwa ni, fɛ kanya ninii dinaa ni kaloo. 17 Dibale dinyumasaa ninta ami ku Israel batii dinaa ni kaloo. Diekye ayi akuɔ di SAATE nwu layɔ aabla osi ku kasɔ. Ni di dii kuɛnsĩle, aadiɛ ɔkpɛ ɔbla ni aatɛ ɔnyɛɛ nɛ.’"

18 Obe wɔ di SAATE nwu lakakatɛko Mose di Sinai Kobokote nwu suoto aaloo nii, ni aayɔ afuɔ nkyɛ nnyɔ be suoto di Yaa layɔ lɛnɛɛbi nɔɔ aakpana kufiofa nɔɔ aatika ni aatɔɔ nɛ.