1 Israel batii bamuu ladie di Sin ɔfaafuu, mandie lɛba mansifi lɛba bamba fɛ mmle okle di SAATE nwu nkpo latookpee ma ni kufiofa. Ninfɛ baalaasi di Refidim nɛ, kafɔɔ ntu ditawɛ ninfa di batii nwu nkpo kanyi nii. 2 Nioso baakyako ɔkakatɛ di Mose suoto baabuɛ alɛ, "Tawo ntu bunyi."

Ninfɛ di Mose ladiki kanya alɛ, "Be lɛsaa oso biɔkakatɛ di suoto nii? Be lɛsaa kafɔɔ oso biɔɔsɔ SAATE nwu nkpo minnyu?"

3 Kafɔɔ batii nwu nkpo latookpi ntu kɔka osie kanya, nioso baananfi ko Mose ɔlaa, baakaalɛ nwɔ alɛ, "Be lɛsaa oso fɛɛkpaa wo feedieko di Egipte fɛɛta otukɔnsɔ kolo wo ku babi loo ku babɔkɛɛ loo?"

4 Nioso Mose lapɛ ɔlaa aata SAATE nwu aakaalɛ alɛ, "Be nfɛ nimbla nta batii ba mmle? Nfɛ bɔɔwa mi afuɔ ɔsafɔ."

5 Ninfɛ di SAATE nwu latɔkɔ Mose alɛ, "Fe faale batii nwu nkpo katũ, faakpaa Israel banɔɔfotii bawo fakyakaa di suoto, faayɔ ɔkyɛnwoso wɔ faayɔ faapɛ ni di Nile okle suoto faklee kɔɔnɛɛ fasifiko. 6 Nyu, kamayila fɔ di anu di Horeb kobokote difuɔnkpaa nwu suoto. Pɛ difuɔ nwu nkpo ku ɔkyɛnwoso lɛfɔ nwu, ntu kamadie kaamɛ ninta batii nwu nkpo mannyi." Nioso Mose labla nkpo di Israel banɔɔfotii nwu anu. 7 Nioso Mose latika lɛba nwu leyooto alɛ, Masa* ku Meriba* diekye Israel batii lananfiko Mose ɔlaa, baasɔ SAATE nwu baanyu baabuɛ alɛ, "SAATE nwu nsi wo kaamɛ ɛɛ sɛɛ, aasi?"

8 Nle mmle sɛmaa, Amalek batii ladie baawa baabakpɛko Israel batii di Refidim. 9 Ninfɛ di Mose latɔkɔ Yosua alɛ, "Diki batii loo bawo, baakyɛ balaakpɛko Amalek batii nwu. Kɔsɛɛ kamakyɛ nnaayila di kobokote nwu osi ku Yaa ɔkyɛnwoso nwu di nnɛɛ nii kamɛ."

10 Nioso Yosua lakyɛ aalaakpɛ Amalek batii nwu fɛ mmle okle di Mose latɔkɔ nwɔ nii. Ninfɛ di Mose, Aron ku Hur lakata baasifi kobokote nwu osi nɛ. 11 Nse Mose lekplesa nnɛɛ nɔɔ katoo yi, Israel batii nwu nkyako olenkee, kafɔɔ nse ɛɛwakosa nnɛɛ kasɔ yi, Amalek batii nwu nkyako olenkee. 12 Obe wɔ di nnɛɛ lakpi ni Mose, Aron ku Hur layɔ difuɔ baatɛ nwɔ aasiɛ, ni di onwii layila di oletanɛɛkyɛ, onwii kafɔɔ layila di ɔmɛntukyɛ baaklee nwɔ nnɛɛ kloklo dialaase di obe wɔ kuufĩ lamɛɛ ni nɛ. 13 Ta nkpo oso Yosua lalenkee Amalek batii bakpɛtɛ di kakpɛ nwu kamɛ ku kapamii.

14 Ninfɛ di SAATE nwu latɔkɔ Mose alɛ, "Kpana ɔlaa wɔ mmle di kukũ fatɛ diele dinyumasaa, faanyu falɛ fɛɛka nwu fɛɛta Yosua lenu. Diekye kamadiki Amalek leyooto di kolo ko mmle kalɔ."

15 Ninfɛ di Mose lapɛ oleɔta akyikye ninfa ni aatika nya leyooto alɛ, "SAATE nwu ninle mi Flankaa." 16 Ni aabuɛ alɛ, "Diekye nnɛɛ baatakatɛsa katoo baakyɔɔ SAATE nwu lɛkakpomii. SAATE nwu makpɛ Amalek batii diɛyɔ ni kɔɔna diesifi ni kɔna."