1 Ninfɛ di SAATE nwu latɔkɔ Mose alɛ, "Tɔɔkyɛ Farao nfũ diekye ntɔɔwɛnsa nnwɔɔ ku banɔɔfotii nɔɔ nwu situ osie alɛ kabla atuosaa nii ya mmle niɛbla ni ɔkpɛ di kamɛ lɛma 2 alɛ biatɔkɔ babi lee ku bawa lee mmle okle lablako ni Egipte batii suoto ɔkpɛ osie kanya ku mmle okle labla ni atuosaa di kamɛ lɛma, alɛ biatofo kafɔɔ bilɛ ami ninle SAATE nwu."

3 Nioso Mose ku Aron lakyɛ Farao nfũ baalaatɔkɔ nwɔ alɛ, "Nnya ɔlaa wɔ di SAATE, Hebri batii Yaa nwu kobuɛ ni alɛ, ‘Ɔmɛmbe fabakyɔɔ kotoko fanu mi ɔlaa? Ta batii nii basifi alɛ baalaasumu mi. 4 Nse feesĩ fananta ma basifi, kamata atroee nwa kale lɛfɔ kɔsɛɛ. 5 Babatĩi kasɔ anu alɛ blabasinnya ka. Babaya asaa ya kafuii niabu ni di atubakanii nwu nkpo ɔkpa sɛmaa, ku awoso biala nin-yɛ ni di afe. 6 Babayii fɔ ayo ku banɔɔfotii lɛfɔ bamuu ale ku Egipte batii bamuu ale kamɛ. Dibale lɛsaa le di bate lɛfɔ ee bawa lɛfɔ diinya banya ni diidii, diayɔ ni di dii le baabasiɛ ni kaasɔ ka mmle suoto diɛbase ni bia mmiɛ.’" Ninfɛ di Mose lamunikĩi aasifi aadiɛ Farao nɛ.

7 Ninfɛ di Farao banɔɔfotii nɔɔ nwu latɔkɔ nwɔ alɛ, "Ɔmɛmbe di osuɔtɔ wɔ mmle madiɛ wo kubuɛ okpee? Ta batii nwu basifi alɛ baalaasumu SAATE Yaa lɛma. Flɔɔnya falɛ Egipte nfɛ kɔwɔɔ?"

8 Ninfɛ baakpaa Mose ku Aron baawako Farao nfũ nɛ. Ni aatɔkɔ ma alɛ, "Bitɔɔkyɛ biɛlaasumu SAATE, Yaa lee nwu. Kafɔɔ owe ku bawe nikofe?"

9 Mose ladiki kanya alɛ, "Babisɔ loo ku banɔɔfo ninkofe, babisuɔtɔbi loo ku babisankobi loo, babɔkɛɛ sele loo bamuu ku banankyue loo, diekye dii buofe ole ɔta SAATE nwu."

10 Ninfɛ di Farao labuɛ alɛ, "SAATE nwu asiɛko ye nse lɛta ye osuku biesifi minko basanko lee ku babi lee! Nwaako disibu kpile ninkpe ye. 11 Nintuna! Minko basuɔtɔ lee ko ninkyɛ; biɛlaasumu SAATE nwu, obe wɔ di nni ninle lɛsaa le biɔkaalɛ ni." Ninfɛ baatososa Mose ku Aron di Farao anu nɛ.

12 Ninfɛ di SAATE nwu latɔkɔ Mose alɛ, "Yɔ kɔnɛɛ lɛfɔ fakyɔɔ di Egipte kasɔ suoto di atroee ɔlambu awa abaya asaa alalaasa di afe, asaa ya amuu niabu ni di atubakanii ɔkpa sɛmaa."

13 Nioso Mose layɔ ɔkyɛnwoso nɔɔ aakyɔɔ Egipte, ni di SAATE nwu lata kufĩ katunkɔ kɔfɛɛfɔ lafɛ kuafe di kasɔ nwu nkpo suoto dii nwu kale kamuu ku kakyɛ kamuu nɛ. Kaale lasɛ nii, kɔfɛɛfɔ nwu latuka atroee aawako; 14 ni aafũ Egipte kasɔ kamuu, aasiɛ di kakɔ biala di kale nwu nkpo kamɛ ku lɛpɔ osie kanya. Diidii kafɔɔ atroee ɔlambu dibuo le mmle okle diiwa, ee nni nkpo okle kafɔɔ dilabasinwa diidii. 15 Atroee nwu nkpo latĩi kasɔ kamuu kaakle kaawɔfɔ. Baaya lɛsaa biala le niabu ni di atubakanii nwu nkpo ɔkpa sɛmaa, lɛsaa biala le niayila ni di afe ku awosobi di awoso suoto. Lɛsalɛsaa kuninwii ditabu lɛkɔɔnle di awoso ee sɛfa suoto di Egipte kasɔ kamuu suoto.

16 Farao lapɛsɛwa aata baalɛɛ Mose ku Aron baatɔɔ ni aatɔkɔ ma alɛ, "Lɛbla okpile leyila di SAATE, Yaa lee suoto ku suoto lee. 17 Lekoto bikple biyɔ okpile nii wɔ mmle bikyɛ mi biɛpɛ ɔlaa bita SAATE, Yaa lee aatekete kukpi dibuo le mmle di suoto nii."

18 Ninfɛ di Mose ladie di Farao nfũ aasifi aalaapɛ ɔlaa aata SAATE nwu nɛ. 19 Ninfɛ di SAATE nwu lakyɛlɛnsa kɔfɛɛfɔ nwu osuku kuafɛ osie kanya kuakyɛ kufĩ kamɛɛkɔ kuatuka atroee nwu aalaakpete di lekpo sɛɛle* kamɛ nɛ. Bia letroee ninwii ditabu di Egipte kasɔ nwu kamuu suoto. 20 Kafɔɔ SAATE nwu lakple aawɛnsa Farao otu osie alɛ atatuna alɛ oodiɛ Israel batii mansifi.

21 Ninfɛ di SAATE nwu latɔkɔ Mose alɛ, "Kplesa kɔnɛɛ lɛfɔ fakyɔɔ osi diitunu diwa di Egipte kasɔ suoto, ditunu kplɛ le baafuo ni ɔkpanko." 22 Nioso Mose lakplesa kɔnɛɛ nɔɔ aakyɔɔ osi, ni di ditunu kplɛ lawa di Egipte kasɔ kamuu suoto ayi atiɛ nɛ. 23 Otii kuonwii ditafuo owo nɔɔ ɔnya ee adie ninfũ asi nii ayi atiɛ amu. Kafɔɔ nfũ di Israel batii lasiɛ nii, lɛkpa lawɛ ninfa.

24 Ninfɛ di Farao lakpee baalɛɛ Mose baatɔɔ, ni aatɔkɔ nwɔ alɛ, "Bitɔɔkyɛ biɛlaasumu SAATE Yaa lee. Bia basanko lee ku babisɔ kafuo ɔkyɛ; kafɔɔ bidiɛ babɔkɛɛ sele lee ku banankyue baayila."

25 Kafɔɔ Mose latɔkɔ nwɔ alɛ, "Dikpeni fanta wo munwɛ oleɔta ku ofiɛ asaaɔta wɔ buɔta SAATE, Yaa loo. 26 Dikpeni babɔkɛɛ sele loo bamuu lesifi ku awo; bia lɛkpɔbi lɛma dilababu sɛɛmaa. Dikpeni buɔyɔ bawo buɔta ole buɔta SAATE, Yaa loo. Diediki buobuo nfa fiɛ bubatofo mba bubayɔ munta ni SAATE loo ole."

27 Kafɔɔ Saate nwu lakple aawɛnsa Farao otu osie, atatootuna alɛ oodiɛ ma mansifi. 28 Farao latɔkɔ Mose alɛ, "Kyɛ mi di anu fasifi! Nyu falɛ faasinkple fawa mi anu! Dii lele feekple fɛɛwa mi katũ fabakpi."

29 Ninfɛ di Mose ladiki kanya alɛ, "Dilɛ! Fɛ mmle okle fatoobuɛ nii, namasinwa fɔ katũ diidii."