1 Israel batii bamuu ladie di Elim ni baasifi ɔfafuu wɔ manlɛɛ ni Sin nɛ. Kuasiɛ di Elim ku Sinai kobokote obo. Diabla lefosi dii nɔɔnle di kɔwɛntɛ nyɔɔfa kamɛ baadie ni di Egipte kasɔ suoto. 2 Di ɔfaafuu nwu nkpo kamɛ, ni di Israel batii bamuu lakakatɛ di Mose ku Aron suoto nɛ. 3 Israel batii nwu latɔkɔ ma alɛ, "Nse dilɛ wo dilenke alɛ SAATE nwu kalo wo di Egipte kasɔ suoto! Nse nfa, se busi di sina abukii loo ntũ buowee ku alesaa ya buomiɛ nii, kafɔɔ biɛkpaa wo biedieko ninfa biɛwako ɔfaafuu wɔ mmle kamɛ bilɛ kɔka kulo bamuu loo buokpi."

4 Ninfɛ di Saate nwu latɔkɔ Mose alɛ, "Kamata alesaa nkpa ankye osi anta ye. Dii biala batii nwu nkpo bakyɛ baalaasɛsɛɛ n-ya nimawo ma ni. Kamasɔ ma nnyu ku nle mmle nse babakyɔɔ mi kufiofa kotoko. 5 Di dii kuɔnle suoto yi, basɛsɛɛ alesaa nwu nkpo awo n-ya mansɛsɛɛ ni sɛnyɔ dii biala."

6 Nioso Mose ku Aron latɔkɔ Israel batii bamuu alɛ, "Di miɛ kɔtɔɔfɔ yi, bibatofo bilɛ SAATE nwu niakpaa ye aadieko di Egipte kasɔ suoto. 7 Kɔsɛɛ ku ɔlesɛ yi, bibanya SAATE nwu lɛkpa. Diekye atoonu mmle okle biɛkakatɛ nwɔ ni di suoto. Awo bawe bule alɛ biakakatɛ wo di suoto?" 8 Mose lakple aabuɛ alɛ, "Bibatofo bilɛ SAATE nwu nkpo niata ye sina biawee ku kɔtɔɔfɔ ku alesaa ya amuu biomiɛ ni ku olesɛ. Diekye atoonu lɛkakatɛ le biɛkakatɛ ni di suoto nɔɔ. Awo bawe bule? Diele awo suoto biɛkakatɛ, SAATE nwu suoto biɛkakatɛ."

9 Ninfɛ di Mose latɔkɔ Aron alɛ, "Tɔkɔ Israel batii bamuu falɛ, ‘Biwa biɛbayila di SAATE nwu anu, diekye atoonu ye lɛkakatɛ di suoto nɔɔ.’ "

10 Obe wɔ di Aron latɔkakatɛko ni Israel batii bamuu nwu nkpo yi, baatoonyu ɔfaafuu lɛkyɛ, ni baanya SAATE nwu lɛkpa kplɛ nwu latɔkyɔɔ di lelokonkyɛ nwu kamɛ nɛ.

11 Ninfɛ di SAATE nwu latɔkɔ Mose alɛ, 12 "Ntoonu Israel batii lɛkakatɛ di suoto nii. Tɔkɔ ma falɛ, ‘Di kɔtɔɔfɔ bibawee sina, olesɛ kafɔɔ bibale alesaa ya amuu biomiɛ nii. Ninfɛ bibatofo bilɛ Ami ninle SAATE, Yaa lee nɛ.’"

13 Di kɔtɔɔfɔ nwu nkpo nkyinkyikpakala kpinwu labayii lɛba le baasi baasiɛ nii. Ni di olesɛ kafɔɔ oblokyi labamana lɛba le baasi baasiɛ ni nɛ. 14 Obe wɔ di oblokyi nwu nkpo layɛ nii yi, asaa anwii plɛkɛtɛɛ wɛkyɛwɛkyɛ fututu labakpete di ɔfaafuu nwu nkpo kasɔ suoto. 15 Obe wɔ di Israel batii lanya ni asaa nwu nkpo, ni batɔɔkaalɛ bawo alɛ, "Be lɛsaa ninle nle mmle?" Diekye batatofo lɛsaa le diale nii.

Ninfɛ di Mose latɔkɔ ma alɛ, "Alesaa ya di SAATE nwu ntɔɔta ye alɛ bile ni ale. 16 Nnya SAATE nwu kufiofa ko eekpee ye ni alɛ: ‘Otii biala asɛsɛɛ mmle okle abale ni di dii kamɛ. Bisɛsɛɛ lɛbɛsibii ninwii bita otii biala di leyo biala kamɛ.’"

17 Ninfɛ di Israel batii nwu labla fɛ mmle okle baatɔkɔ ma ni nɛ. Batii bawo lasɛsɛɛ kpinwu, bawo kafɔɔ lasɛsɛɛ kɛkɛɛ. 18 Di obe wɔ baaklapoosa nya ni di lɛbɛsibii nwu kamɛ yi, mba niasɛsɛɛ baapɔɔsa nii, batawɛ baalenkeesa mba kafɔɔ niasɛsɛɛ ni kɛɛkɛɛ, aawo ma fɛ mmle boomiɛ nii. Nioso otii biala lasɛsɛɛ fɛ mmle abawo nwɔ ni di dii kamɛ.

19 Ninfɛ di Mose latɔkɔ ma alɛ, "Otii kuonwii atambu kuanwii aase kaleesɛ."

20 Kafɔɔ, batii bawo kaamɛ lɛma ditakyɔɔ ɔlaa wɔ di Mose labuɛ ni atoko; babu awo baase kaleesɛ. Nioso aabuo akudikudi aakyako okpete. Nioso Mose lanya ɔblɔ aakpeeko ma.

21 Olesɛ biala, otii biala nsɛsɛɛ n-ya nimawo nwɔ ni di dii kamɛ, nse kufĩ kafɔɔ ntoobe, n-ya nimbu ante ni kaasɔ anyɛlɛfɛ. 22 Di dii kuɔnle suoto, baasɛsɛɛ mmle mansɛsɛɛ ni di dii kamɛ sɛnyɔ. Nse bɛɛklapoosa dibabla abɛsibii anyɔ ninta otii onwii. Obe wɔ di batii nwu batunletɛ labatɔkɔ ni Mose ɔlaa nwu nkpo yi, 23 ninfɛ di Mose latɔkɔ ma alɛ, "Nnya kufiofa ko di SAATE nwu lakpee wo ni: ‘Kɔsɛɛ nimale ɔnyɛɛ ɔtɛ dii, lɛnyɛɛtɛyi klekle diɛta ni SAATE nwu. Nkpo oso, bifiɛ n-ya biomiɛ bilɛ biofiɛ ni, biɛwa n-ya biomiɛ bilɛ biɔwa ni, biɛyɔ n-ya nimabu ni bise kɔsɛɛ.’"

24 Nioso baayɔ n-ya niabu ni baase kaleesɛ fɛ mmle okle di Mose latɔkɔ ma nii. Atakpete ee abuo akudikudi kafɔɔ. 25 Mose labuɛ alɛ, "Bile alesaa nwu miɛ diekye miɛ ninle lɛnyɛɛtɛyi diɛta SAATE nwu. Bilabanya alesaa nwu kuanwii kaasɔ miɛ. 26 Biasiisa alesaa nwu nkpo ayi akuɔ, kafɔɔ dii kuɛnsinle ninle lɛnyɛɛtɛyi. Alesaa kuanwii dilabate kaasɔ dii nwu nkpo."

27 Di lɛnyɛɛtɛyi nwu nkpo suoto, batii nwu nkpo bawo lakyɛ alɛ bɔɔlasɛsɛɛ alesaa nwu, kafɔɔ batawɛ kuanwii. 28 Ninfɛ di SAATE nwu lakaalɛ Mose alɛ, "Ɔmɛmbe bibakyɔɔ mi ɔlaa kotoko minle mi kufiofa? 29 Binyuma bilɛ SAATE nwu lɛta ye lɛnyɛɛtɛyi; nni oso di dii kuɔnle suoto ɛɛta ye alesaa ayi anyɔ nɛ. Di lɛnyɛɛtɛyi suoto, obiala lee asiɛ ninfũ akpe ni, kuonwii atankyɛ kaakɔkaakɔ." 30 Nioso batii nwu nkpo latɛɔnyɛɛ di dii kuɛnsinle suoto.

31 Israel batii lalɛɛ alesaa nwu nkpo alɛ mana.* Diate fɛ akpaa dibi diapu fututu. Diamɛnɛmɛnɛ fɛ bablɔ kafɛlɛ di bablɔ nsi nii. 32 Mose labuɛ alɛ, "Nya kufiofa ko di SAATE nwu lekpee ni: ‘Biyɔ mana nwu nkpo lɛbɛsibii ninwii bikookaa bita kayi kamaa akyɛnfɔɔle ya nimawa ni. Mmle okle babanya alesaa ya lata ye biale ni di ɔfaafuu di obe wɔ lakpaa ye ladieko ni di Egipte kasɔ suoto.’ "

33 Nioso Mose latɔkɔ Aron alɛ, "Yɔ lɛsaa, faayɔ mana nwu nkpo lɛbɛsibii ninwii fakpee kaamɛ. Faayɔ fase di SAATE nwu anu, bikookaa bita akyɛnfɔɔle ya nimawa ni."

34 Fɛ mmle okle di SAATE nwu lakpee ni Mose kufiofa, Aron layɔ mana nwu aase di Kanya Ninii lɛlakaa nwu anu aatɛ. 35 Israel batii lale mana nwu alɛɛ afosi ana, dialaase di obe wɔ baabuo ni kasɔ ka suoto baasiɛ nii. Baale mana nwu nkpo dialaase di obe wɔ baadu ni Kanaan kɔmɛ suoto.

36 (Omer ninle efa* bɛɛsɛ ni di akyuu lefosi ninwii nɔɔ.)