1 Ninfɛ diYaa labuɛ sɛlaa se mmle simuu alɛ:

2 "Ami ninle SAATE Yaa lee wɔ niakpaa ye ladieko ni di Egipte kasɔ suoto, di sɛlanle kamɛ.

3 Yaa bamba kuonwii atasinwɛ fɔ aakyakaa di ami.

4 "Tambla afiɔ fata suoto di letembi kuniwii kamɛ di asaa ya ninkpe ni di osi, ee nya ninkpe ni kaasɔ kalɔ ee di ntu kalɔ. 5 Tanwa kasɔ faata nya ee faatɔ nya; diekye ami, SAATE Yaa lɛfɔ, Yaa wɔ ninkpɛ ni sɛsɔfɔwo nle, nnanfi babi ba niekyidi mi ni kootoko ta bate lɛma sikpile diɛyɔ ni di kɔna tiɛfa kuɔlaase ni di kɔnaafa suoto, 6 kafɔɔ ndiki lɛbɔmbɔ ntuo banantii nkpe, nkpe be nimbɔmbɔ mi nii, manle mi ni kufiofa.

7 "Tanlɛɛ SAATE Yaa lɛfɔ leyooto kasakasa, diekye SAATE nwu dilabasĩ otii wɔ ninlɛɛ nwɔ ni leyooto kasakasa kotoko ɔnanfi.

8 Nyuma Lɛnyɛɛtɛyi nwu nkpo faabla ni klekle. 9 Ayi akuɔ faabla ɔkpɛ, faabla sɛkpɛ lɛfɔ simuu, 10 kafɔɔ dii kuɛnsinle, nle Lɛnyɛɛtɛyi diɛta SAATE Yaa lɛfɔ. Di dii nwu nkpo suoto tambla ɔkpɛ kuonwii, afɔ omu woo, babisuɔtɔbi lɛfɔ woo, babisankobi lɛfɔ woo, balanle suɔtɔ lɛfɔ woo, balanle sanko lɛfɔ woo, babɔkɛɛ lɛfɔ woo, ee ɔfɔɔ wɔ ninsi fɔ ni di okpoo. 11 Diekye di ayi akuɔ kamɛ, ni di SAATE nwu labla osi ku kasɔ ku lekpo, ku asaa ya amuu ninsi ni kaamɛ nɛ. Ni aatɛ ɔnyɛɛ di dii kuɛnsinle suoto nɛ. Nkpo oso, SAATE nwu lawii Lɛnyɛɛtɛyi nwu nkpo lɛyɔɔ aabla ni klekle.

12 "Bu teefɔ ku yaafɔ alɛ faasiɛ nkpa kaanale di kasɔ ka di SAATE Yaa lɛfɔ kɔyɔ anta fɔ ni suoto.

13 "Tanlo otii.

14 "Bitankpee asɔnɔ.

15 "Tan-yu otii lɛsaa.

16 "Tanle sɛlaa kuafunu kamaayilatɛ di otii wolɛfɔ suoto.

17 Tambɛbɛɛ anu di owo lɛfɔ leyo suoto. Tambɛbɛɛ anu di owo lɛfɔ ɔsɔfɔ suoto, ee ɔlanle suɔtɔ nɔɔ suoto ee ɔlanle sanko nɔɔ suoto ee nankyue nɔɔ suoto ee bɔkɛɛ nɔɔ wɔ nintuka ni atoo suoto ee faabɛbɛɛ anu di lɛsaa lele ninle ni owo lɛfɔ lele suoto."

18 Obe wɔ di batii nwu nkpo lanu ni kanto dikpududuu, baanya ni ɔplalaa nimunaa, baanu ni kakyukyuee sɛlɔ, fiɛ baanya kobokote nwu nkpo nkyɛ ni kɔyɔ yi, baakyako otũtũkũ ku lɛyɛkɛ, baayila fanfa. 19 Ninfɛ baatɔkɔ Mose alɛ, "Afɔ omu lɛfɔ yi, kakatɛ fata wo bubanu. Kafɔɔ tanta Yaa lakakatɛ aata wo, nse diele nkpo, bubakpi."

20 Ninfɛ di Mose latɔkɔ batii nwu nkpo alɛ, "Bitanyɛkɛ. Diekye Yaa ɔwa ɛɛwa di osuku wɔ mmle suoto alɛ ɔbasɔ ye annyu, mmle okle di Yaa lɛyɛkɛ kasiɛ ni kaamɛ alɛ bilaatɔɔbla ni okpile."

21 Batii nwu nkpo lakple baayila fanfa di obe wɔ di Mose latɔɔtɛɛtɛɛ ni lelokonkyɛ kplɛ nwu nkpo di nfũ di Yaa lawɛ nii.

22 Ninfɛ di SAATE nwu latɔkɔ Mose alɛ, "Tɔkɔ Israel batii nwu ɔlaa wɔ mmle falɛ: ‘Aye bamu bienu bilɛ ntɔɔkakatɛ ko ye lekyeko osi: 23 Bitambla bayaa bamba biakyakaa di ami; bitan-yɔ koto sɛɛle ee kufututu biabla afiɔ bamba biata suoto lee.

24 "‘Yɔ kɔtɛ fapɛ oleɔta akyikye fatɛɛ, nnya suoto faayɔ bafoso ku batie ku banankyue fata ofiɛ asaaɔta ku atoko ɔkyɛ ole asaaɔta fatɛɛ nɛ. Kamawa kakɔ lele lɛtɛ nlɛ baalɛɛ mi leyooto, mmawii fɔ lɛyɔɔ. 25 Nse fabayɔ afuɔ fantofo oleɔta akyikye fantɛɛ yi, tan-yɔ afuɔ ya beewola nii. Nse fɛɛyɔ lɛbɔɔsa feewola afuɔ nwu yi, ni fatɔɔkpɔnɔfɔsa oleɔta akyikye nwu nkpo. 26 Tankata faakyɛ oleɔta akyikye nii katũ di nkatakɔ suoto. Diekye nse fɛɛbla nkpo, lɛkyɔtɔ lɛfɔ matuo ninnya katũ.’