1 Ninfɛ di SAATE nwu latɔkɔ Mose alɛ, "Bidie di lɛba le mmle, afɔ ku batii nwu nkpo faakpaa faadieko ni di Egipte kasɔ suoto, biɛtɔɔkyɛ kasɔ ka ntam laka lata ni Abraham ku Isak ku Yakob nlɛ, ‘Kamayɔ nta ni banantii lɛfɔ.’ 2 Kamata tɔkyɛntɛ anle ye katũ, antososa Kanaan batii ku Amori batii ku Hiti batii ku Perisi batii ku Hiwi batii ku Yebusi batii. 3 Bitɔɔkyɛ kasɔ ka di nnyɛɛntu ku bablɔ kobiɛ ninfe ni. Kafɔɔ namatikanko ye, diekye batokopĩtɛ bile, ni dibafuo ɔwa alɛ kamawɔɔsa ye di osuku."

4 Obe wɔ di batii nwu nkpo lanu ni sɛyɛkɛlaa se mmle, baakyako sɛnyaami owi, nioso kuonwii lɛma ditakpee kɔnyɛnɛ kukunwii alolaa suoto. 5 Diekye SAATE nwu latɔkɔ Mose alɛ, "Tɔkɔ Israel batii nwu nlɛ, ‘Batokopĩtɛ bile. Nse nlɛ kotikanko ma bia onumpɔɔ lɛpɛ ninwii, kamawɔɔsa ye. Nioso bidiki anyɛnɛ lee bitɛ, fiɛ nimbu disi mmle okle kamabla ye nii.’" 6 Nioso Israel batii nwu labudi anyɛnɛ lɛma baadiki di suoto di Horeb Kobokote ɔlɔɔkɔ.

7 Nunua, Mose ndieko lɛkpaayo nwu nkpo anaapɛ fanfa di kasiɛkɔ nwu nkpo, anlɛɛ ni alɛ, "Lɛkpaayo le Mansi nii." Otii lele nikomiɛ alɛ anu ɔlaa owo akyeko SAATE nwu nfũ, andie ankyɛ lɛkpaayo le mansi ni di kasikɔ nwu sɛmaa. 8 Obe lele di Mose ledie oofe lɛkpaayo nwu nfũ, batii nwu nkpo bamuu ndie manyila di akpaayo lɛma n-yokontũ, mantoonyu Mose diɛlaase di obe wɔ eebuo ni lɛkpaayo nwu kamɛ. 9 Nse Mose ntoobuo lɛkpaayo nwu nkpo kamɛ, lelokonkyɛ nwu nsoo nimasiɛ di kayokontũ nwu kanya di obe wɔ di SAATE nwu kɔkakatɛko ni Mose. 10 Nse batii nwu nkpo lɛnya lelokonkyɛ nwu nkpo di lɛkpaayo nwu nkpo kayokontũ nwu yi, bamuu lɛma mantaka manyila, manse ntũ kaasɔ di akpaayo lɛma anu mansumu SAATE nwu. 11 Nfa di SAATE nwu nkakatɛko Mose anu ku anu fɛ mmle okle di otii ku siɛwo nɔɔ nkakatɛ ni nɛ. Ni kamaa Mose nkple ansifi kasikɔ nwu, kafɔɔ kyakaakotɛ nɔɔ Yosua wɔ niale ni Nun obisuɔtɔbi-kosopo nindie di lɛkpaayo nwu kamɛ.

12 Ninfɛ di Mose latɔkɔ SAATE nwu alɛ, "Fantɔɔtɔkɔ mi falɛ, ‘Kpaa batii ba mmle fasifiko,’ kafɔɔ faditɛɛ ntofo otii wɔ fabakpee ni ku ami. Feebuɛ falɛ, ‘N-ye fɔ ku leyooto lɛfɔ, ni feele mi sibualɛ.’ 13 Nse kobuo fɔ anu yi, tuo mi sisuku lɛfɔ, mmle okle katofo fɔ ni kakple ntɔɔwɛ ni sibualɛ di ɔkyɛ lɛfɔ. Tan-yee kafɔɔ falɛ, kale ka mmle batii lɛfɔ bale."

14 Ninfɛ di SAATE nwu ladiki Mose kanya alɛ, "Ami omu kamakpaa fɔ nsifiko, nta fɔ kafɔɔ ɔnyɛɛɔtɛ."

15 Ninfɛ di Mose labuɛ aatɔkɔ nwɔ alɛ, "Nse afɔ omu faakpaa wo fasifiko, ni tanta wo buadie ninfũ. 16 Lɛ baatii kamatofo alɛ ami ku batii lɛfɔ buobuo fɔ anu nse fanankpaa wo fasifiko? Be lɛsaa kafɔɔ nimadiki nintuo alɛ ami ku batii lɛfɔ buokyi lete di batii bamuu kaasɔ ka mmle suoto?"

17 Ninfɛ di SAATE nwu latɔkɔ Mose alɛ, "Kamabla di lɛsaa le fɛɛkaalɛ mi ni suoto, diekye foobuo mi anu, n-ye fɔ kafɔɔ ku leyooto lɛfɔ."

18 Ninfɛ di Mose labuɛ alɛ, "Nunua, tuo mi lɛkpa lɛfɔ."

19 Ninfɛ di SAATE nwu labuɛ alɛ, "Kamata dibiene nii nimuu nfe di anu lɛfɔ, anu lɛfɔ kafɔɔ kamalɛɛ leyooto nii, SAATE nwu. Otii wɔ komiɛ nlɛ nnya ni nyaami kamanyɔɔ nyaami. Otii wɔ kafɔɔ komiɛ nlɛ nle ni sifutulɛ, kamale nwɔ sifutulɛ." 20 Kafɔɔ aabuɛ alɛ, "Flabafuo mi anu ɔnya, diekye otii kuonwii ninyɛɛ, aakple aasiɛ nkpa."

21 Ninfɛ di SAATE nwu labuɛ alɛ, "Lɛba ninwii nkpe diɛtɛɛtɛɛ mi nii, nfũ fabafuo ni oyila di difuɔnkpaa suoto. 22 Nse lɛkpa nii nwu kɔwaalɛ ninfe yi, kamayɔ fɔ nkpee di afuɔ takale obo di difuɔnkpaa kamɛ, n-yɔ kɔnɛɛ nii kafɔɔ ntĩi fɔ, diɛlaase di obe wɔ ntɔɔwalɛ fɔ lefe nii. 23 Nse ntookyisa kɔnɛɛ nii, fiɛ fabanyɛɛ kamaa; kafɔɔ anu nii, dinaa otii lɛnya nya."