1 Mose ladiki kanya alɛ, "Ni nse baafũ mi banu ee banu mi ɔlaa beebuɛ alɛ, ‘SAATE nwu diediki suoto atuo fɔ mɔ’?"

2 Nioso SAATE nwu lakaalɛ nwɔ alɛ, "Be ninle lɛsaa nwu fakle ni kɔɔnɛɛ kamɛ?"

Ninfɛ aatɔkɔ nwɔ alɛ, "Ɔkyɛnwoso."

3 Ninfɛ di SAATE nwu latɔkɔ nwɔ alɛ, "Yɔ nwu fafuki fayu kaasɔ."

Ninfɛ di Mose layɔ nwu aafuki aayu kaasɔ nɛ, ninfɛ kuaakple kɔsaanwu, ni aatoso kũ di ɔlɔɔkɔ nɛ. 4 Ninfɛ di SAATE nwu latɔkɔ nwɔ alɛ, "Yɔ kɔnɛɛ lɛfɔ famufũ kũ di ɔka." Nioso Mose layɔ kɔnɛɛ nɔɔ aamufũ kũ di ɔka, ni kuakple kuakple ɔkyɛnwowo kɔɔnɛɛ nɔɔ kamɛ nɛ. 5 Ninfɛ di SAATE nwu latɔkɔ nwɔ alɛ, "Nle mmle nimata manfũ fɔ manu alɛ bawa lɛma Yaa, Abraham Yaa, Isak Yaa, ku Yakob Yaa nwu niadiki suoto aatuo fɔ."

6 Ninfɛ di SAATE nwu latɔkɔ nwɔ alɛ, "Yɔ kɔnɛɛ lɛfɔ faakpee di akpeele kamɛ." Nioso Mose layɔ kɔnɛɛ nɔɔ aakpee di akpeele kamɛ, obe wɔ aadiki ni kɔnɛɛ nwu, ɔfiɛ lakpete nwɔ kɔɔnɛɛ nwu, kuapu fɛ atubakanii.

7 Ninfɛ di SAATE nwu latɔkɔ nwɔ alɛ, "Nunua kple fayɔ kɔnɛɛ lɛfɔ fakpee di akpeele lɛfɔ kamɛ". Nioso Mose lakplesa kɔnɛɛ nɔɔ aakpee di akpeele nɔɔ kamɛ, obe wɔ aadiki kũ nii, kuakple kualɛ fɛ suoto nɔɔ aba bule.

8 Ni di SAATE nwu latɔkɔ nwɔ alɛ, "Nse baafũ fɔ banu ee banu fɔ ɔlaa di dituosaa le niɛbla ni ɔkpɛ kasale suoto yi, babafũ lɛnyɔɔfa nwu mannu. 9 Kafɔɔ nse baafũ atuosaa anyɔ ya mmle banu ee banu fɔ ɔlaa yi, ni faakusii ntu kɛɛkɛ di Nile okle kamɛ fakpete kaasɔ. Ntu nwu nkpo feekusii ni di Nile okle kamɛ feekpete ni kaasɔ kamakple ntɔ."

10 kafɔɔ Mose latɔkɔ SAATE nwu alɛ, "O SAATE, nin-ye mmle mankakatɛ ni nwaa, bia saa nii fiɛ bia fatɔbakakatɛ fɛɛta ni kpɛmblatɛ lɛfɔ. Lɛbla buuɛɛ lɛɛkakatɛ kamɛ, okplalomii nii kafɔɔ ninpɛsɛwa."

11 Ni di SAATE nwu lakaalɛ Mose alɛ, "Owe niɛbla otii kanya? Owe nintɔɔ ambla tokotĩitɛ ee omumu? Owe nintɔɔ annya ee ankple numbiɛtɛ? Diele ami SAATE nwu ninta? 12 Nioso tɔɔkyɛ; Kamakyakaako fɔ fankakatɛ, nta fɔ kafɔɔ ɔlaa wɔ faabuɛ nii."

13 Kafɔɔ Mose labuɛ alɛ, "O SAATE, lekoto kpee otii bamba aakyɛ alaabla ɔkpɛ nwu."

14 Nioso SAATE nwu lanya ɔblɔ di Mose suoto ni aabuɛ alɛ, "Ni obilee suɔtɔbi Aron, Lewi otii nwu mɔ? Nn-ye nlɛ aye lɛkakatɛ nwaa. Nfɛ akyɛ di osuku kofokofoko ɔɔwa amakyakako fɔ. Suoto kamayɔɔ nwɔ nse ɛɛnya fɔ. 15 Fabakakatɛ fantɔɔ fankpee nwɔ ɔlaa kanya; Kamakyakaako akyuu lee anyɔ minkakatɛ, ntuo ye kafɔɔ lɛsaa le biabla nii. 16 Nnwɔɔ nimakakatɛ anta batii nwu anta fɔ, nnwɔɔ nimale fɔ ɔlaa kanya dikiktɛ, afɔ fabate fɛ Yaa wɔ nikɔtɔkɔ nwɔ lɛsaa le aabla nii. 17 Kafɔɔ yɔ ɔkyɛnwoso wɔ mmle faklee alɛ faafuo nwu ɔyɔ ɔblako atuosaa ya niɛbla ni ɔkpɛ."

18 Nioso Mose lakple aasifi ɔlɔ nɔɔ Yetro nfũ aalaatɔkɔ nwɔ alɛ, "Tɛɛ nkple nsifi batii nii nfũ di Egipte ninaanyu nse bawo lekple bakpe nkpa."

Yetro latɔkɔ nwɔ alɛ, "Tɔɔkyɛ ku atoko ɔkyɛ ole."

19 Ninfɛ di SAATE nwu latɔkɔ Mose di Midian alɛ, "Kple fatɔɔkyɛ Egipte, diekye batii ba bamuu niamiɛ alɛ boolofɔ ni ntookpi." 20 Nioso Mose lakpaa ɔsɔfɔ nɔɔ ku babisuɔtɔbi nɔɔ, aayɔ ma aatika di bɔkɛɛ wɔ nintuka ni atoo suoto, baayefe osuku baasifi Egipte. Ni aayɔ Yaa ɔkyɛnwoso nwu aaklee kɔɔnɛɛ nɔɔ nɛ.

21 Ninfɛ di SAATE nwu latɔkɔ Mose alɛ, "Nse feekple feesifi Egipte yi, nyu falɛ fɛɛbla atuosaa ya amuu ntɔɔta fɔ ni osie nlɛ bla ni di Farao anu. Kafɔɔ kamawɛnsa nwɔ otu osie mmle okle anamata batii nwu basifi nii. 22 Ni faatɔkɔ Farao falɛ, ‘Nnya ɔlaa wɔ di SAATE nwu kobuɛ ni: Israel ninle mi obisuɔtɔbi kasale, 23 ni latɔkɔfɔ nlɛ, "Ta obisuɔtɔbi nii asifi, alɛ aalaasumu mi." Kafɔɔ feesĩ nwɔ ɔta osifi, nioso kamalo fɔ obisuɔtɔbi kasale.’"

24 Bakyɛ di osuku boofe nii, SAATE nwu lakyakako Mose di lɛba le baate nii, ni aamiɛ alɛ oolo nwɔ nɛ. 25 Kafɔɔ Sipora layɔ difuɔ le ninkpe ni kobe aakyɛlɛnsa obisuɔtɔbi nɔɔ suoto, ni aayɔ kopoo nwu aakpanko Mose nkpaa nɛ. Ni aabuɛ alɛ, "Nwaako ɔkafɔɔsa ntɔ fale fatɛɛ." 26 Obe wɔ aabuɛ alɛ, "Ɔkafɔɔsa ntɔ" ni yi, aatɔɔkakatɛ di suoto ɔkyɛlɛnsa nwu suoto. Nioso SAATE nwu ladiɛ nwɔ.

27 Ninfɛ di SAATE nwu latɔkɔ Aron alɛ, "Tɔɔkyɛ ɔfaafuu falaakyakako Mose." Nioso aakyɛ alaakyakako Mose di Yaa kobokote nwu, ni aabla nwɔ atuu nɛ. 28 Ninfɛ di Mose latɔkɔ Aron lɛsaa biala di SAATE nwu lekpee nwɔ alɛ abuɛ ni ku atuosaa ya niɛbla ni ɔkpɛ aatɔkɔ nwɔ alɛ abla ni nɛ.

29 Nioso Mose ku Aron lasiisa Israel banɔɔfotii nwu bamuu, 30 ni di Aron latɔkɔ ma lɛsaa biala le di SAATE nwu latɔkɔ ni Mose nɛ. Ninfɛ aabla atuosaa nwu kafɔɔ di batii nwu anu, 31 ninfɛ baafũ baanu nɛ. Obe wɔ baanu alɛ SAATE nwu lɛyɔ nwu ni ole di suoto lɛma, atɔɔnya ma ni dibuo kafɔɔ yi, ni baawakosa suoto kasɔ baasumu nwɔ nɛ.