1 "Yɔ akesia kowoso fabla ɔleɔta akyikye, lɛtaka lɛnya abla nkpaa nna-anɛɛkpa-akuɔ. Osi asi nwu ana abla kyɛkyɛ. Lɛkaana nkpaa nkuɛnsĩ-anɛɛkpa-akuɔ, lɛblɛfɛ kafɔɔ nkpaa nkuɛnsĩ-anɛɛkpa-akuɔ. 2 Faabla lɛkya fatika di oleɔta akyikye nwu akɔ ana nwu dibiala suoto. Oleɔta akyikye ku akya nwu, kowoso kunwii suoto faawola nya fadiki, faayɔ lɛbɔɔsaa fatĩi oleɔta akyikye nwu. 3 Akpɛnsaa ya amuu fabablako ni ɔkpɛ, yɔ abɔɔsaa fabla nya. Ale ni ntɔ akpetesaa ku basoofi ku babɛɛsi ku sina amunikĩisaa ku ɔtɔ akpetesaa. 4 Faabla lɛbɔɔsaa fatika ni sɛɛlɔɔkɔ fakyisa, faabla kafɔɔ lɛbɔɔsaa lɛkɔnii fatika di akɔ ana nwu dibiala suoto. 5 Faayɔ lɛbɔɔsaa nwu nkpo fakaasa di oleɔta akyikye nwu nkpo suoto diedie ni kaalɔ diɛbase ni di ntɛɛ. 6 Faayɔɔ akesia kowoso fawola sewoso kyɔlɔlɔɔ bata oleɔta akyikye nwu, faayɔ lɛbɔɔsaa batĩi sĩ. 7 Sewoso nwu nkpo, faayɔ sĩ fakpee di akɔnii nwu nkpo kamɛ. Siesiɛ di oleɔta akyikye nwu nkpo kakyɛka ku kakyɛka, babayɔ mantɔɔkɛnkɛ nya ni. 8 Ntaaboo faayɔ fawola oleɔta akyikye nwu di otuu kute kaamɛ. Faawola nya fɛ mmle okle latuo fɔ ni di kobokote nwu osi.

9 "Bla kaflɔnkɔ fata lɛkpaayo nwu nkpo. Kala lɛkyɛ kanɛ dibla nkpaa kɔlafa afosi anɔɔ, kaawɛ oleteku biene fɛnɛnɛɛ losole abula. 10 Faayɔ abɔɔsaa fabla akpaka afosi-anyɔ ku asɔse afosi-anyɔ. Faayɔ koto fututu fabla amufũsaa ku aniisaa di akpaka nwu suoto. 11 Katoo lɛkyɛ kafɔɔ kanɛ dibla nkpaa kɔlafa afosi-anɔɔ, kawɛ abula nɔɔ ku akpaka afosi-anyɔ ku asɔse afosi-anyɔ ku koto fututu amufũsaa ku aniisaa di akpaka nwu suoto.

12 "Kufĩ kamɛɛkɔ lɛkyɛ kaflɔnkɔ lɛblɛfɛ dibla nkpaa afosi akuɛnsĩ nkpaa nnɔɔ, kaawɛ abula nɔɔ ku akpaka lefosi ku asɔse lefosi. 13 Kaflɔnkɔ nwu nkpo lɛblɛfɛ di kufĩ katunkɔ kafɔɔ dibla nkpaa afosi akuɛnsĩ nkpaa nnɔɔ. 14 Abula ya kaanɛ lɛnya labla ni nkpaa afosi anyɔ nkpaa nnyɔ anɛɛkpa akuɔ asaka di kayokontũ nwu kakyɛ kanwii, di akpaka atiɛ ku asɔse atiɛ awɛ nya. 15 Nkpo okle kafɔɔ di kakyɛ nyɔɔfa abula kanɛ kabla nkpaa afosi anyɔ nkpaa nnyɔ anɛɛkpa akuɔ nɛ, akpaka atiɛ asɔse atiɛ kawɛ nya nɛ.

16 "Kayokontũ ka baafe mambuo ni kaflɔnkɔ nwu, yɔ dibula le kaanɛ lɛbla ni nkpaa afosi atiɛ, di saalosotɛ leloso ni ku seleteku bluu ku nse niɛbla ni fɛ ɔsɛɛ ku sɛɛle bɔmbɔ ku sibiene fɛnɛnɛɛ losole fasaka di akpaka ana ku asɔse ana suoto. 17 Akpaka ya amuu nimayila ni kaaflɔnkɔ nwu ankyi nii, awɛ koto fututu aniisaa ku amufũsaa ku abɔɔsaa asɔse. 18 Kaflɔnkɔ nwu nkpo lɛkaana dibla nkpaa kɔlafa nkpaa afosi-anɔɔ. Lɛblɛfɛ kafɔɔ dibla nkpaa afosi-akuɛnsĩ-nkpaa-nnɔɔ ku abula biene fɛnɛnɛɛ losole, di lɛtaka dibla nkpaa nkuɛnsĩ-anɛɛkpa-akuɔ ku abɔɔsaa asɔse lɛnya. 19 Asaa bule ya amuu babablako ni ɔkpɛ di lɛkpaayo nwu suoto, ɔsaabla lele kule, diɛkyakaa ni di lɛkpaayo nwu ayee ku kaflɔnkɔ nwu akpaka, yɔ abɔɔsaa babla.

20 "Diki kanya faata Israel batii bayɔ nnɔnyi biene be beediki ni di nnɔnyi awosobi kamɛ bawako fɔ alɛ, bakandiɛ kayila ni obe lele. 21 Di Lɛkpaayo le Mansi ni kamɛ, di dibula le ninsaka ni sɛmaa, di kanya ninii lɛlakaa nwu anu, Aron ku babisuɔtɔbi nɔɔ kata bakandiɛ nwu kasɔ manyila di SAATE nwu anu, diedie ni di kɔɔtɔɔfɔ diɛlaase ni di olesɛ. Nle mmle dile ɔsaabla nwɔ nimate ni di Israel batii kamɛ di ana ya nikɔwa ni.