1 Ninfɛ di SAATE nwu latɔkɔ Mose alɛ, "Kata fawa ɔkyɛ nii di kobokote nwu osi. Faakpaa Aron ku Nadab ku Abihu ku Israel banɔɔfotii afosi akuɛnsĩ nwu fawako. Bieyila fanfa bisumu mi. 2 Kafɔɔ Mose lete ninkpe osuku aatɛɛtɛɛ SAATE nwu; banyɛntɛle batantɛɛtɛɛ. Batii bule kafɔɔ batankata baawa kobokote nwu suoto ku nnwɔɔ."

3 Obe wɔ di Mose lakyɛ aalaatɔkɔ ni batii nwu nkpo sɛlaa se simuu di SAATE nwu labuɛ ni ku kufiofa nɔɔ yi, bamuu lɛma baabuɛ ku sɛlɔ sinwii alɛ, "Lɛsaa biala di SAATE nwu lebuɛ, bubabla." 4 Nkpo oso, Mose lakpana lɛsaa biala di SAATE nwu labuɛ ni aatɛ.

Ni kaaleesɛ aataka ku kolesɛtũ aapɛ oleɔta akyikye di kobokote nwu nkpaa, ni aayɔ lefosi afuɔ anyɔ abinte aase fɛ nsũ lɛtɛsaa di Israel lefosi nfaabi nnyɔ nwu kanya nɛ. 5 Ninfɛ aakpee Israel bakosopo bawo, ni baalata ofiɛ asaaɔta, baayɔ banankyue baata fɛ atoko ɔkyɛ ole asaaɔta baata SAATE nwu nɛ. 6 Ninfɛ di Mose lanyɛɛnɛ babɔkɛɛ nwu nkpo ntɔ ɔfã aakpete di bɛɛsi kamɛ aayɔ aanwanwanyi di oleɔta akyikye nwu nkpo suoto nɛ. 7 Ninfɛ aayɔ Kukũ ko kamɛ di Kanya ninii sɛlaa nwu nsi ni aaka aata batii nwu nkpo bamuu nɛ. Ni baabuɛ alɛ, "Bubabla lɛsaa biala le di SAATE nwu lebuɛ nii. Bubamufũ nwu munklee."

8 Ninfɛ di Mose layɔ ntɔ nwu nkpo di bɛɛsi kamɛ aanwanwanyi di batii nwu nkpo suoto aabuɛ alɛ, "Nnya ntɔ be nin-yɛ ni kanya ninii le di SAATE nwu nkpo lenii ni ku aye di sɛlaa nwu nkpo kanya."

9 Obe wɔ di Mose ku Aron ku Nadab ku Abihu ku Israel banɔɔfotii nwu lakata baakyɛ ni kobokote nwu nkpo suoto yi, 10 ni baanya Israel Yaa nɛ. Nkpaa nɔɔ kalɔ late fɛ osuku wɔ bɛɛyɔ afuɔ finle ya manlɛɛ ni safir bɛɛbla nii, diɛkpa ni fɛ kolo. 11 Kafɔɔ Yaa ditabla Israel banɔɔfotii ba mmle lɛsalɛsaa nu baanyɔɔ. Ni baale baanyi nɛ.

12 Ninfɛ di SAATE nwu latɔkɔ Mose alɛ, "Kata fawa ɔkyɛ nii di kobokote nwu osi, faasiɛ ninfũ, nin-yɔ afuɔ ya suoto lɛkpana ni ɔsaabla nii ku kufiofa nii nta fɔ, alɛ faatuo batii nwu."

13 Ninfɛ di Mose ku kyakaakotɛ nɔɔ Yosua leyefe osuku nɛ. Ni di Mose lakata aasifi Yaa kotokote nwu nɛ. 14 Ninfɛ aatɔkɔ banɔɔfotii nwu alɛ, "Bisoko wo ninfũ dilaase di obe wɔ bubakple ni. Aron ku Hur nkpe ye di ɔkyɛ, nse ɔlaa lebuo ye nintɛɛ, biafuo ma ɔyɔ okyɛnko."

15 Obe wɔ di Mose lakyɛ ni kobokote nwu osi, lelokonkyɛ latĩi kũ. 16 Kafɔɔ SAATE nwu lɛkpa latika di Sinai kobokote nwu suoto. Dituntũ nwu latĩi kobokote nwu ayi akuɔ. Di dii kuɛnsinle suoto, SAATE nwu lalɛɛ Mose di lelokonkyɛ kamɛ. 17 Israel batii latɔɔnya SAATE nwu lɛkpa di kobokote nwu suoto fɛ ɔtɔ wɔ nikofiɛ nii. 18 Ninfɛ di Mose labuo di lelokonkyɛ nwu kamɛ di obe wɔ ɔɔkata anfe ni kobokote nwu osi nɛ. Ni aasiɛ di kobokote nwu osi ayi afosi ana nkyɛ afosi ana nɛ.