1 "Nnya mmle faabla fakleklesa ma ni, alɛ baabla mi ɔkpɛ fɛ olebatatɛ: Yɔ nankyue dibi-suɔtɔ ku akunumuu anyɔ di lɛsalɛsaa diɛbla ma nii. 2 Faayɔ kafɔɔ akpaa nnaafũ muɛmuɛ fafiɛ bloblo wɔ manankpee ni lɛnyakasaa. Baafiɛ bloblo ku keeki wɔ bɛɛkpɔtɔɔsa ni nnɔnyi, baafiɛ kafɔɔ bloblo wɔ niɛplɛkɛtɛɛ ni beefifia ni nnɔnyi. 3 Faayɔ fakpee di kakyikyɛ kamɛ fakyɛnko ku nankyue nwu ku akunumuu anyɔ nwu nkpo. 4 Nni kamaa, faakpaa Aron ku babisuɔtɔbi nɔɔ nwu nkpo fawako Lɛkpaayo le Mansi ni kayokontũ, faakpeesa ma ntu. 5 Faayɔ akpeele nwu nkpo falolaa Aron suoto. Dile ni akpeele wua nwu mankpee mantɛ ni kasɔ ku osi akpeele nwu ku simu akpeele ya ninsiɛ ni di simu akpeele nwu kalɔ ku ntɛɛditikasaa nwu. Faayɔ simu akpeele nwu fakpee nwɔ, faanii ni ku ofiamɛ nwu beelolaa beeloso ni. 6 Faayɔ disi diniisaa nwu fanii nwɔ disi. Faayɔ kafɔɔ akpanasaa klekle kafɔɔ fakaasa di disi niniisaa sitũ. 7 Faayɔ ɔfɔɔ ɔpɛ nnɔnyi nwu fakpete nwɔ diisi fapɛ nwɔ ɔfɔɔ. 8 Faakpaa babisuɔtɔbi nɔɔ fawako, faakpee ma akpeele wua nwu mankpee mantɛ ni kasɔ. 9 Faayɔ disi aniisaa nwu nkpo faanii ma asi, faatika Aron ku babisuɔtɔbi nɔɔ nwu nkpo sifiamɛ, alɛ baale mi olebatatɛ dinaa ni kaloo. Nkpo okle faabla fase Aron ku babisuɔtɔbi nɔɔ olebatatɛ nɛ.

10 "Yɔ nankyue dibi suɔtɔ nwu fawako Lɛkpaayo le Mansi ni sitũ, di Aron ku babisuɔtɔbi nɔɔ bayɔ nnɛɛ lɛma batika ni diisi. 11 Faalo nankyue nwu di SAATE nwu anu di Lɛkpaayo le Mansi ni kayuontũ. 12 Faayɔ nankyue dibi suɔtɔ nwu ntɔ nwo fakpee di oleɔta akyikye nwu akya kamɛ ku lɛnɛɛbi lɛfɔ. Faanyɛɛnɛ mbule fakpete di oleɔta akyikye nwu lɛsɔse suoto. 13 Nni kamaa faadiki lɛla le nimu ninsi ni di kafutu kamɛ ayɔɔsaa nwu suoto ku lɛla le ninsi ni di akɔɔ suoto ku akɛɛ nɔɔ anyɔ nwu nkpo ku lɛla le ninsi ni kaamɛ, faafiɛ nya di oleɔta akyikye nwu suoto. 14 Kafɔɔ nankyue-suɔtɔ nwu sina ku kukũ nikũ ku sɛfɔtɔ nɔɔ, nnsĩ, fiɛ nya di olekatakɔ nwu nkpo sɛmaa. Diekye sikpile asaaɔta kule.

15 "Faayɔ akunumuu nwu ninwii, di Aron ku babisuɔtɔbi nɔɔ bayɔ nnɛɛ lɛma batika ni diisi. 16 Faalo ni, faayɔ ni ntɔ fanwanwanyi di oleɔta akyikye nwu suoto fakyisa. 17 Faabubudi dikunumuu sina nwu nkpo wɛkyɛɛwɛkyɛɛ, faafoto kafutu kamɛ asaa ku nkpaa nɔɔ, faayɔ fatika ku disi ku aba bule. 18 Faafiɛ dikunumuu nwu omuu di oleɔta akyikye suoto. Dile ofiɛ asaaɔta kuɔta SAATE nwu. Kule asaaɔta wɔ nikɔpɛ ni ɔkɔnɔ kunta ni SAATE nwu beefiɛ ni ku ɔtɔ.

19 "Faayɔ dikunumuu nwu nyɔɔfa, di Aron ku babisuɔtɔbi nɔɔ bayɔ nnɛɛ lɛma batika ni di suoto. 20 Faalo dikunumuu nwu, faabla ntɔ nɔɔ nwu nwo fakaasa di Aron ku babisuɔtɔbi nɔɔ nwu koletanɛɛ atokobi. Faabla nwo kafɔɔ fakaasa ma di koletanɛɛ anɛɛfo ku koletanɛɛ akpɛɛfo suoto. Faayɔ ntɔ nwu bule fanwanwanyi oleɔta akyikye nwu suoto fakyisa. 21 Nni kamaa, faayɔ ntɔ nwu nwo di oleɔta akyikye nwu suoto ku ɔfɔɔ ɔpɛ nnɔnyi, fanwanwanyi di Aron suoto ku akpeele nɔɔ suoto. Faanwanwanyi nwo kafɔɔ di babisuɔtɔbi nɔɔ suoto ku akpeele lɛma suoto. Ni nwɔɔ ku babisuɔtɔbi nɔɔ ku akpeele lɛma kamabla klekle.

22 "Diki dikunumuu nwu nkpo lɛla, lɛkanfuki, ku lɛla le ninsi ni di kafutu kamɛ asaa suoto ku akɔɔ suoto ku akɛɛ nɔɔ nwu anyɔ lɛla ku koletanɛɛ kutĩ. (Diekye oletatɛ ose dikunumuu dile). 23 Diki bloblo wɔ manankpee ni lɛnyankasaa di kakyikyɛ nwu kamɛ ate ni di SAATE nwu anu, diki onwii ku keeki wɔ bɛkpɔtɔɔsa ni nnɔnyi ku bloblo wɔ bɛɛbla ni plɛkɛtɛɛ. 24 Yɔ nya amuu fakpee di Aron ku babisuɔtɔbi nɔɔ nnɛɛ kamɛ faatakatɛsa nya fakyɔɔ fɛ asaaɔta ya bɛɛkyɔɔ ni di SAATE anu. 25 Faakple fafũ nya di nnɛɛ lɛma kamɛ faafiɛ di oleɔta akyikye suoto ku ofiɛ asaaɔta, kuole ɔkɔnɔ kuta SAATE nwu. Asaaɔta ya beefiɛ ku ɔtɔ bɛɛta ni SAATE nwu. 26 Nse feediki ofĩɔ di dikunumuu le baalo baase ni Aron oletatɛ feeloo yi, faatakatɛsa sĩ fakyɔɔ fɛ asaaɔta ya bɛɛkyɔɔ ni di SAATE nwu anu, faayɔ nfa faabla kalekɔ lɛfɔ.

27 "Kleklesa olebatatɛ ose dikunumuu sina aba ya ninle ni Aron ku babisuɔtɔbi nɔɔ sele: ofĩɔ wɔ baatakatɛsa baakyɔɔ mi ni ku kutĩ ko baata nii. 28 Nle mmle kale Aron ku babisuoɔtɔbi kalekɔ obe lele keekye ni Israel batii nfũ. Dile asaa okũ di Israel batii kakũ manta ni SAATE di atoko ɔkyɛ ole asaaɔta lɛma kamɛ.

29 "Aron akpeele klekle nwu nkpo kale banantii nɔɔ ba nimayila nwɔ ni kaanya ale, alɛ aasiɛ ma di suoto fiɛ baapɛ ma ɔfɔɔ, manse ma. 30 Obisuɔtɔbi nɔɔ wɔ nimayila nwɔ ni kaanya fɛ oletatɛ, abawa ni Lɛkpaayo le Mansi ni kamɛ, amabla ni ɔkpɛ Kaakleklekɔ nwu, akpee akpeele nwu ayi akuɛnsĩ.

31 "Wa dikunumuu le beelo boose ni olebatatɛ nwu sina di lɛba le nieklekle ni. 32 Aron ku babisuɔtɔbi nɔɔ nwu nkpo bawee dikunumuu nwu nkpo sina ku bloblo nwu ninsi ni di kakyikyɛ nwu kamɛ di Lɛkpaayo le Mansi ni kayokontũ 33 Baale asaaɔta ya mmle baata ni di sikpile ɔyɔkyɛ diɛta ni olebatatɛ ose ku okleklesa lɛma. Kafɔɔ kayi otii nnaa osuku anle nya, diekye asaa klekle ale. 34 Kafɔɔ nse dikunumuu sina se bɛɛyɔ beese ma olebatatɛ ee bloblo owo lebu kale lɛsɛ yi, bafiɛ nya. Batansinle, diekye lɛsaa klekle dile.

35 "Bla fata Aron ku babisuɔtɔbi nɔɔ fɛ mmle okle lakpee fɔ ni kufiofa, ayi akuɛnsĩ faayɔ fase ma olebatatɛ. 36 Dii biala yɔ nankyue suɔtɔ fata ole fɛ sikpile asaaɔta fata sikpile ɔyɔ ɔkyɛ. Faakleklesa oleɔta akyikye nwu faata sikpile ɔyɔ ɔkyɛ, faapɛ nya ɔfɔɔ ku nnɔnyi kafɔɔ fakleklesa nya. 37 Ayi akuɛnsĩ faabla sikpile ɔyɔ ɔkyɛ fata oleɔta akyikye nwu, faklekle nya. Ni oleɔta akyikye nwu kamabla klekle anlekee, ni lɛsaa lele niɛkpanko nya kamaklekle.

38 "Lɛsaa le faayɔ fata ni ole di oleɔta akyikye suoto dii biala ninle, afosobi anyɔ ya nintoofũ ni lɛlɛɛ ninwii ninwii. 39 Yɔ lefosobi ninwii fata ole kuolesɛ, faayɔ lɛnyɔɔfa kafɔɔ fata ole ku kɔtɔɔfɔ. 40 Di lefosobi kasale suoto yi, yɔ nnaafũ muɛmuɛ kilo onwii ku nnɔnyi biene lebo beediki ni di nnɔnyi awosobi kamɛ fanwɔtɔ, faayɔ kafɔɔ nta lebo biene fabla asaaɔta nta. 41 Faayɔ lefosobi nyɔɔfa kafɔɔ fata ole kukɔtɔɔfɔ. Faayɔ nnaafũ muɛmuɛ asaaɔta ku asaaɔta nta be okle fɛɛblako ni ɔkpɛ kuolesɛ fablako ɔkpɛ. Nle mmle male asaaɔta wɔ nikɔpɛ ni SAATE nwu ɔkɔnɔ beefiɛ ni ku ɔtɔ.

42 "Di kayi kamaa banantii lee ba nikɔwa nii, ofiɛ asaaɔta wɔ mmle baatɔɔbla nwu wlawla di SAATE anu di Lɛkpaayo le Mansi ni kayokontũ. Nfa kamakyakako ye nkakatɛko ye nɛ. 43 Nfa kafɔɔ kamakyakako Israel batii, lɛkpa nii nwu kafɔɔ kamakleklesa lɛba nwu.

44 "Nioso kamakleklesa Lɛkpaayo le Mansi ni ku oleɔta akyikye nwu, nkleklesa kafɔɔ Aron ku babisuɔtɔbi nɔɔ mambla mi ɔkpɛ fɛ olebatatɛ. 45 Ni kamasiɛ di Israel batii kamɛ, nle ma kafɔɔ Yaa. 46 Babatofo kafɔɔ alɛ ami ninle SAATE Yaa lɛma wɔ niakpaa ma adieko ni di Egipte kasɔ suoto nlɛ kasiɛ ma kaamɛ. Ami ninle SAATE nwu, Yaa lɛma.