1 Kɔnɛɛ kamɛ bakpɛntɛ nwu baayɔ seleteku buluu ku nse niabla ni fɛ ɔsɛɛ ku seleteku sɛɛle bɔmbɔ baaloso akpeele biene ya baakpee mantɔɔblako ni ɔkpɛ di olekatakɔ nwu. Ni baaloso akpeele klekle baata Aron fɛ mmle okle di SAATE nwu lakpee ni Mose kufiofa nɛ.

2 Baayɔ seleteku se beekpee ni koto sɛɛle kɔfa ku seleteku fututu ku bluu ku nse niɛbla ni fɛ ɔsɛɛ ku seleteku sɛɛle bɔmbɔ baaloso simu akpeele nwu. 3 Ni baabla koto sɛɛle plɛkɛtɛɛ, baabudi kũ wlɛlɛ wlɛlɛ alɛ batii ba nin-ye ni abula oloso kafuo ɔyɔ oloso okpee di seleteku buluu ku nse niɛbla ni fɛ ɔsɛɛ ku sɛsɛɛle bɔmbɔ ku kamɛ. 4 Baatika lɛsaa di amuusi nwu anyɔ, aafe sitũ ku sɛmaa alɛ baamufũ mankyasa. 5 Baayɔ dibula nwu okle baaloso ni ku seleteku se baakpee ni koto sɛɛle kɔfa ku seleteku fututu ku bluu ku nse niabla ni fɛ ɔsɛɛ ku seleteku sɛɛle bɔmbɔ baabla ntɛɛditikasaa nwu ku ofiamɛ nwu, diɛbla fɛ ninwii, fɛ mmle okle di SAATE nwu lakpee ni Mose kufiofa.

6 Baayɔ oniks afuɔ anyɔ baawola baadiki Israel babisuɔtɔbi ayooto baatika, baayɔ koto sɛɛle baatika di atokosi. 7 Ninfɛ baayɔ baakaasa di simu akpeele nwu amuusi suoto fɛ ninyuma afuɔ di Israel babisuɔtɔbi suoto, fɛ mmle okle di SAATE nwu lakpee ni Mose kufiofa nɛ.

8 Kɔnɛɛ kamɛ bakpɛmblatɛ nwaa nwu, baayɔ koto sɛɛle seleteku, seleteku ku bluu ku nse niɛbla ni fɛ ɔsɛɛ ku seleteku sɛɛle baaloso ntɛɛditikasaa nwu. 9 Baabla ni asi ana nwu kyɛkyɛ, baamu ni di akyuu anyɔ. Lɛkaana labla anɛɛkpa anaasĩ, lɛblɛfɛ kafɔɔ labla anɛɛkpa anaasĩ 10 Ninfɛ baayɔ afuɔ ya niafũ ni kɔyɔ baakaasa di ele ɛna kanya nɛ. Di ole kasale baakaasa afuɔ ya manlɛɛ ni rubi ku topas ku beryl; 11 di ole nyɔɔfa baakaasa afuɔ ya manlɛɛ ni tukuoise, safir ku emerald; 12 di ole tiɛfa baakaasa afuɔ ya manlɛɛ ni yakint, agate ku ametist; 13 di ole naafa kafɔɔ baakaasa afuɔ ya manlɛɛ ni krisolite ku oniks ku yaspa. Afuɔ ya mmle amuu baayɔ koto sɛɛle baatika di atokosi bakyisa. 14 Afuɔ nwu labla lefosi anyɔ di Israel babisuɔtɔbi nwu ayooto kanya. Afuɔ bawolatɛ lawola àna lefosi anyɔ nwu ayooto baatika nya di suoto.

15 Baayɔ koto sɛɛle nwaa baaloso kɔnyɛnɛ fɛ okũ bakpee di ntɛɛditikasaa nwu suoto. 16 Baayɔ koto sɛɛle baatika atokosi sɛnyɔ, baabla kafɔɔ koto sɛɛle nkɔnii n-yɔ, baayɔ nkɔnii nwu baakaasa di ntɛɛditikasaa nwu akɔ anyɔ nwu suoto. 17 Baayɔ koto sɛɛle anyɛnɛ anyɔ nwu nkpo baakpee di nkɔnii akɔ nwu di ntɛɛditikasaa nwu suoto. 18 Anyɛnɛ nwu nkpo nnya nnyɔ nwu kanyɛtɛlekɔ atokosi anyɔ nwu kafɔɔ, baayɔ baamufũ di amuusi nkyɛ nwu di ntɛɛditikasaa nwu sitũ. 19 Baabla koto sɛɛle nkɔnii nnyɔ, bayɔ baakaasa di akɔ anyɔ bule di ntɛɛditikasaa nwu kamɛ lɛkyɛ di kamɛ akpeele atokosi. 20 Baakple baabla koto sɛɛle nkɔnii nnyɔ baakaasa baakyakaa di simu akpeele nwu amuusi nwu anyɔ suoto di sitũ, di nfũ baadiki ni simu, diɛ ntɛɛ ditikasaa nwu ofiamɛ di osi lɛkyɛ. 21 Baayɔ seleteku bluu baaloso sikũ baakpee di nkɔnii be ninsi ni di ntɛɛditikasaa nwu suoto. Baayɔ baakpee di nkɔnii be ninsi ni di simu akpeele sikũ nwu kamɛ alɛ ntɛɛditikasaa nwu dilaakpa ni di simu akpeele nwu suoto, fɛ mmle di SAATE nwu lakpee ni Mose kufiofa.

22 Akpeelekyɔ ya suoto babakpee ni simu akpeele nwu mantika nii, abula balosotɛ layɔ seleteku bluu baaloso dibula nwu, 23 baadiki simu di akpeele nwu ntɛɛ, ninfũ baakpee ni disi. Baaloso simu nwu atokosi baakyisa, mmle okle di simu nwu nkpo dilababɛ nii. 24 Di akpeelekyɔ nwu nkpo kalɔ atokosi yi, baayɔ seleteku bluu ku nnse niɛbla ni fɛ ɔsɛɛ ku seleteku sɛɛle bɔmbɔ, baaloso awosobi ya ninte ni fɛ goowa baakaasa baakyisa, baayɔ koto sɛɛle baabla nwlonwlo baakpekpee seebo. 25 Nioso baabla koto sɛɛle nwaa nwlonwlo nwu nkpo ku awosobi nwu ninte ni fɛ goowa baakyisa akpeelekyɔ nwu nkpo atokosi. 26 Nwlonwlo nwu ku awosobi ya ninte ni fɛ goowa lamana akpeelekyɔ nwu nkpo atokosi aakyi. Awu nwu, baakpee nya obe lele bɔɔbla ɔkpɛ di SAATE nwu anu fɛ mmle okle di SAATE nwu lakpee ni Mose kufiofa nɛ.

27 Abula balosotɛ layɔ oleteku biene fɛnɛnɛɛ baloso akpeele wua ya mankpee mantɛ ni kasɔ baata Aron ku babisuɔtɔbi nɔɔ, 28 baayɔ oleteku biene fɛnɛnɛɛ baloso disi aniisaa, baayɔ oleteku biene fɛnɛnɛ losole kafɔɔ baaloso akpete ya mankpee mantɛ ni kasɔ. 29 Di abula balosotɛ bayɔ oleteku fututu bɛɛtaa ni ku bluu ole ku nwɔ niɛbla ni fɛ ɔsɛɛ ku nwɔ niɛsɛɛ ni bɔmbɔ balososo ofiamɛ nwu fɛ mmle di SAATE nwu lakpee ni Mose kufiofa.

30 Baayɔ koto sɛɛle nwaa baabla ni lakataa baawola badiki akpanasaa klekle ya mmle baatika alɛ, EEKLEKLE ƐƐTA SAATE NWU. 31 Baayɔ oleteku bluu bamufũ baklee, baayɔ baakaasa di disi niniisaa nwu sitũ, fɛ mmle okle di SAATE nwu lakpee ni Mose kufiofa.

32 Nioso baaloo ɔkpɛ omuu di Lɛkpaayo klekle, lɛkpaayo le mansi ni ɔbla. Israel batii labla lɛsaa biala fɛ mmle okle di SAATE nwu lakpee ni Mose kufiofa. 33 Ninfɛ baayɔ lɛkpaayo nwu baawako Mose nɛ. Lɛkpaayo nwu ku kamɛ nini asaa amuu, amufũsaa nini ku n-yokontũ sewoso ku selenle ku akpaka nɔɔ ku asɔse lɛnya, 34 ku abansaa lɛnya ninle ni akunumuu akũ beekpee ni kɔfa sɛɛle bɔmbɔ ku ntu kamɛ banankyue akũ ku dibula le niɛsɛ ni lɛkpaayo nwu kamɛ; 35 ku kanya ninii Lɛlakaa nwu ku sewoso nɔɔ ku katĩita nɔɔ 36 ku opunu nwu ku asaa ya mamblako ni ɔkpɛ di nnwu suoto ku bloblo klekle nwu di SAATE anu; 37 ku koto sɛɛle nwaa kandiɛ ditikasaa nwu ku sɛtɔ ninsĩ ku asaa ya ninya amuu ku nnɔnyi be babayɔ mantɔɔsɔ ni ɔtɔ; 38 ku koto sɛɛle oleɔta akyikye ku ɔfɔɔ ɔpɛ nnɔnyi ku olufui kɔnɔkɔnɔ ku lɛkpaayo kayoko dibula; 39 ku abɔɔsaa oleɔta akyikye ku abɔɔsaa ya baatika baakyisa nya ni ku sewoso nɔɔ ku asaa ya amuu mamblako ni ɔkpɛ ninnya suoto ku ntu ɔsɛfɛ nwu ku lɛsɔse nɔɔ; 40 ku kaflɔnkɔ nwu abula ku akpaka lɛnya ku asɔse lɛnya ku kaflɔnkɔ nwu nkpo kayoko dibula ku sikũ ku ayee diɛta ni kaflɔnkɔ nwu nkpo ku asaa bamba ya amuu babablako ni ɔkpɛ di lɛkpaayo klekle, Lɛkpaayo le mansi ni kamɛ; 41 ku akpeelekyɔ nwu baaloso babakpee mantɔɔbla ni ɔkpɛ di kakleklekɔ nwu kamɛ, ku akpeele klekle nwu baabla baata ni Aron oletatɛ nwu ku akpeelekyɔ nwu baabla baata ni babi suɔtɔbi nɔɔ nse bɔɔbla ɔkpɛ fɛ olebatatɛ.

42 Israel batii nwu nkpo labla ɔkpɛ nwu nkpo baaloo fɛ mmle okle di SAATE nwu lakpee ni Mose kufiofa. 43 Mose lakyɛ aalaanyu ɔkpɛ nwu nkpo aanya alɛ kubio, baabla nwu fɛ mmle okle di SAATE nwu nkpo lakpee nwɔ kufiofa alɛ babla nwu nii. Nioso Mose lawii ma lɛyɔɔ.