1 Nni sɛmaa Mose ku Aron lakyɛ Farao nfũ baalaatɔkɔ nwɔ alɛ, "Nnya ɔlaa wɔ di SAATE nwu, Israel Yaa kobuɛ ni: ‘Ta batii nii basifi alɛ baalaale dii di ɔfafuu kamɛ mantɛɛ.’"

2 Ninfɛ di Farao labuɛ alɛ, "Owe ninle SAATE nwu, alɛ kanu nwɔ ɔlaa nta Israel batii nsifi? Nin-ye SAATE nwu kata Israel batii kafɔɔ nsifi nii."

3 Ninfɛ baatɔkɔ nwɔ alɛ, "Hebri batii Yaa ntoodiki suoto eetuo wo. Ta wo osuku buɔkyɛ ayi atiɛ osuku di ɔfaafuu kamɛ, buɔlaata ole buta SAATE Yaa loo. Nse diele nkpo ni abata mumbuo sifiɛ kpile ee aanlo wo ku kapamii."

4 Kafɔɔ Egipte ɔka latɔkɔ Mose ku Aron alɛ, "Be oso minɔɔta batii ba mmle babla ɔkpɛ lɛma? Bitɔɔkyɛ ɔkpɛ lee kamɛ!" 5 Ninfɛ di Farao labuɛ alɛ, "Binyu, batii nwu ntɔɔpɔ kaasɔ ka mmle suoto, ninfɛ biɔta ma mandiɛ sɛkpɛ ɔbla nɛ."

6 Dii nwu nkpo kale Farao lakpee balanle banyuntɛ ku ɔkpɛ kanya bayilatɛ nwu nkpo kufiofa alɛ, 7 "Bitasinta Israel batii sibuu baatookpee di atɛnkudi nwu kamɛ. Bita mma bamu bakyɛ blaatoomiɛ sibuu lɛma. 8 Kafɔɔ binyu bilɛ beebudi atɛnkudi nwu eewo n-ya mambudi ni saa, bitanklɔklɔɛ lɛpɔ lɛnya biata ma. Bakyɔkɔ bale, nioso boowi alɛ, ‘Bita wo bukyɛ buɔlaata ole buta Yaa loo’ nɛ. 9 Bita ɔkpɛ kuwɛ osie kuta basuɔtɔ nwu alɛ blaawɛ kayaa baatɔɔkyɔɔ sɛlaa kuafũnu atoko."

10 Ninfɛ di balanle banyuntɛ nwu ku ɔkpɛ kanya bayilatɛ nwu baakyɛ baalatɔkɔ batii nwu alɛ, "Nnya ɔlaa wɔ di Farao kobuɛ ni alɛ, ‘Namasinta ye sibuu kusinwii. 11 Aye bamu bikyɛ biɛlaamiɛ sibuu lee kaakɔ lele bibawɛ sĩ, kafɔɔ atɛnkudi ya mimbudi ni dilabaklɔklɔɛ saa.’" 12 Nioso batii nwu labiɛ baabuo di Egipte kasɔ kamuu suoto baatoomiɛ sibuu. 13 Balanle banyuntɛ nwu latoosiɛ ma di suoto baatoobuɛ alɛ, "Biloo ɔkpɛ wɔ dikpeni biɛbla ni di dii kamɛ, fɛ mmle okle biatɔɔbla ni di obe wɔ baatɔɔta ye ni sibuu." 14 Mampɛ Israel batii ba di Farao balanle banyuntɛ ladiki baase ni ɔkpɛ kanya-bayilatɛ, mankaalɛ ma alɛ, "Be lɛsaa oso bitaloo atɛnkudi lee ɔbla kɔsa ee miɛ fɛ mmle mimbla ni saa?"

15 Nioso Israel batii ɔkpɛ kanya bayilatɛ lakyɛ Farao nfũ baalaawi baakpee nwɔ baakaalɛ nwɔ alɛ, "Be lɛsaa oso fɔɔbla awo bakpɛmblatɛ lɛfɔ nkpo? 16 Baata bakpɛmblatɛ lɛfɔ sibuu kusinwii, kafɔɔ bɛɛtɔkɔ wo alɛ, ‘Bibla atɛnkudi!’ Bɔɔpɛ bakpɛmblatɛ lɛfɔ, kafɔɔ batii lɛfɔ bamu nfũ diekye."

17 Farao latɔkɔ ma alɛ, "Bakyɔkɔ, bakyɔkɔ bile! Nkpo oso obe lele biobuɛ bilɛ, ‘Ta wo osuku buɔkyɛ bulaata ole buta SAATE nwu.’ 18 Bikple bisifi ɔkpɛ kamɛ. Blabata ye sibuu kusinwii, kafɔɔ dikpenii biebudi atɛnkudi ya mimbudi nii."

19 Israel batii ɔkpɛ kanya bayilatɛ latofo alɛ nfɛ basi di dibuo kplɛ kamɛ di obe wɔ baatɔkɔ ma alɛ, "Bitanklɔklɔɛ atɛnkudi ya mimbudi ni dii biala." 20 Obe wɔ baadie ni di Farao nfũ, ni baanya Mose ku Aron n-yɛ basoko ma nɛ. 21 Ninfɛ baatɔkɔ ma alɛ, "SAATE nwu abuo di ɔlaa wɔ mmle kamɛ ata ye, aakanko ye! Di mmle okle biɛta Farao ku banɔɔfotii nɔɔ konyu wo ni nyakatãa. Ku mmle biekpee ma ni kapamii di nnɛɛ bilɛ balo wo ni."

22 Mose lakple aakyɛ aalaapɛ ɔlaa aata SAATE nwu alɛ, "O SAATE, be oso fɛɛta dibuo le mmle lɛwa di batii ba mmle suoto nkpo? Nle mmle oso feekpee mi kɔtɔ nɛ? 23 Diɛyɔ di obe wɔ lakyɛ ni Farao nfũ lalakakatɛko nwɔ ni di leyooto lɛfɔ kamɛ, atokple ɛɛkyakaa batii ba mmle dibuo. Ni fanayidiki batii lɛfɔ kafɔɔ nɛ."