1 Di obe wɔ di Ahas, Usia obisuɔtɔbi, niale ni Yotam ɔwa, lale ni ɔka di Yuda yi, Aram Ɔka Resin ku Remalia obisuɔtɔbi Peka wɔ niale ni ɔka di Israel, lataka baalaakpɛko Yerusalem, kafɔɔ batafuo nwu olenkee.

2 Ninfɛ baabatɔkɔ Dawid leyo batii alɛ, "Aram ntɔɔbla onwii ku Efraim"; nioso Ahas ku batii nɔɔ situ latukũ, fɛ mmle di afɛɛfɔ ntukunsa ni awoso di lepoo kamɛ.

3 Ninfɛ di Saate nwu latɔkɔ Yesaya alɛ, "Afɔ ku obisuɔtɔbi lɛfɔ Sear-Yasub bidie biɛlakyakako Ahas di Katoo Lɛpanta ntu okplo kayɛntɛlekɔ di asaafototɛ kofe osuku kotoko. 4 Tɔkɔ nwɔ falɛ, ‘Lolaa fanyu, faasiɛ kloklo, tanyɛkɛ kafɔɔ. Tanta nnɛɛ lafee fɔ di ntɔɔnikuu nnyɔ be mmle nikodie ni kɔyɔ suoto- ta Resin ku Aram ku Remalia obisuɔtɔbi ɔblɔ kpakataa nwu oso. 5 Aram, Efraim ku Remalia obisuɔtɔbi lɛbla disibu kpile di suoto lɛfɔ, boobuɛ alɛ, 6 "Bita butaka di Yuda suoto; biɛta buolenkee nwu, buɔyɔ nwu busɛ bawo, buɔyɔ Tebeel obisuɔtɔbi kafɔɔ buse sɛka di nnwu suoto." 7 Kafɔɔ nnya ɔlaa wɔ di SAATE Kplɛ nwu kobuɛ ni alɛ:

" ‘Kulabawa kaanya,

kulɔbalɛ,

8 diekye Aram okpoo kplɛ ninle Damasko,

Damasko ɔka kafɔɔ ninle Resin nɛ.

Di alɛɛ afosi-akuɔ alɛɛ anɔɔ kamɛ

Efraim kamabiɛ wɔkyɔwɔkyɔ kulɔbasinle ni okpoo.

9 Efraim okpoo kplɛ ninle Samaria,

Remalia obisuɔtɔbi kafɔɔ ninle Samaria ɔka nɛ.

Nse bieyila kpinkpĩ di ofũ onu lee kamɛ,

ni bilɔbafuo oyila kafɔɔ nɛ.’ "

10 SAATE nwu lakple aakakatɛko Ahas alɛ, 11 "Kaalɛ SAATE, Yaa lɛfɔ nwu dituosaa, kuntɛ nle niekye ni bakpi kamɛ ee osi fanfa."

12 Kafɔɔ Ahas labuɛ alɛ, "Nɔmakaalɛ; namasɔ SAATE nwu nnyu."

13 Ninfɛ di Yesaya labuɛ alɛ, "Binu nfɛ, aye Dawid leyo! Lɛsaa biibii dile alɛ biata batii nkpee otu nintuudi ma? Bibasɔ kafɔɔ Yaa otu okpee minnyu? 14 Nkpo oso Saate nwu omu matuo ye dituosaa: Kakpeelebitɛ kamalaka lɛmɛ, anlofo obisuɔtɔbi, manlɛɛ nwɔ alɛ Imanuel.* 15 Alesaa nɔɔ nimale nnyɛɛntu kpɛnkpɛ ku bablɔ, ninaase di obe wɔ abasĩ ni lɛsaa lalaale, andiki ni dibiene. 16 Kafɔɔ fiɛ di osuɔtɔbi nwu kamatofo, ansĩ ni lɛsaa lalaale, andiki ni dibiene yi, baka nwu nkpo banyɔ fɔɔyɛkɛ ni nsɔ nfɛ nte nfukuti. 17 SAATE nwu makpaa Asiria ɔka- amasoo di suoto lɛfɔ ku batii lɛfɔ ku teefɔ leyo, ayi nwu okle diiwa anya di obe wɔ di Efraim lablasa ni suoto di Yuda suoto."

18 Di dii nwu nkpo kale SAATE nwu mafɛ ofiko anlɛɛ Egipte bakpɛtɛ fɛ basunsũ di Egipte sekle ntaakɔ fanfa anwako, anlɛɛ kafɔɔ Asiria bakpɛtɛ fɛ banwakɛ anwako. 19 Bamuu lɛma babawa mamasiɛ di awɛ nkylɛlɛkɔ ku afuɔ sebo ku siwuufa simuu kamɛ ku nsɔ biene mmuu suoto. 20 Di dii nwu nkpo Saate nwu mafɛnsa kapamii mankpaasu ni disi- ninle ni Asiria ɔka niekye ni Eufrat okle sɛmaa- ankpaasu fɔ disi ku nkpaa lɛfɔ sinwini, ankpaasu fɔ okusu kafɔɔ. 21 Di dii nwu nkpo, otii kamase nankyue bisɔ ku batie banyɔ. 22 Ta nnyɛɛntu be babata mampɔɔsa ni oso, abawɛ nnyɛɛntu kpɛnkpɛ annyi. Batii ba bamuu nimabu ni di kasɔ nwu suoto kamanyi nnyɛɛntu kpɛnkpɛ ku bablɔ. 23 Di dii nwu nkpo, kakɔ biala di nta awosobi kakpe n-yɛ, eefũ koto fututu kakpe yi, akuna ku siwuu nimayie ninfa. 24 Batii kamakyɛ nfa ku ataa ku akplɔ, diekye kasɔ nwu kamatĩi ku akuna ku siwuu. 25 Nioso akpenkpe ya amuu mankpɛ ni ku anwa, bibayɛkɛ nfa ɔkyɛ ta akuna ku siwuu nwu oso; dibakple banankyue nkpakɔ ku aba ya baafoso ntoso mantookyi nii.