1 SAATE nwu, nyu nunua,

SAATE wɔ Ninlenke ni,

nfɛ kamaklee Yerusalem ku Yuda

asaa kawɛnkɔ ku lɛkyakaako anfũ:

alesaa lɛma amuu kakyekɔ ku ntu lɛma mmuu kakyekɔ

2 sientɛ ku kpɛtɛ,

kantɛ ku ɔlaabuɛtɛtɛ,

bɔmpɛtɛ ku ɔnɔɔfo,

3 bakpɛtɛ afosi anɔɔ kanyayilatɛ ku kakplɛkɔ-yilatɛ,

disibutatɛ, kɔnɛɛ kamɛ kpɛmblatɛ nwaa ku bɔmpɛtɛ numbentɛ.

4 Kamayɔ basuɔtɔbi mbla banɔɔfotii lɛma;

babisɔ lete nimale ma kanyabyilatɛ.

5 Batii kamabla bawo amumu-

otii kamataka di otii suoto, siɛwo mataka di siɛwo suoto.

Akyɛnfɔɔle kamataka di banɔɔfo suoto,

atiipɛ kamataka di banɔɔfotii suoto.

6 Otii kamamufũ obilɛma-suɔtɔbi owo

di ote leyo, ambuɛ alɛ,

"Fakpe akpeele, afɔ lewo tunlentɛ;

faayila di leyo le mmle nintoobiɛ ni kanya! "

7 Kafɔɔ di dii nwu nkpo, abafaa alɛ,

"Nnaa lɛfabla.

Alesaa ee akpeele nnaa mi di leyo nii;

tambla mi batii ba mmle tunlentɛ."

8 Yerusalem kɔkpankpa,

Yuda kɔnɔɔ;

sɛlaa ku sɛsaabla lɛma n-yɛ di SAATE nwu suoto,

diɔkpɔnɔfɔsa lɛkpa nɔɔ anu.

9 Anu lɛma letembi kole adansiɛ di suoto lɛma;

boodiki sikpile lɛma kayi fɛle Sodom;

bolookookaa sĩ.

Baayɔɔsa!

Batɔɔwako dikpile di suoto lɛma.

10 Tɔkɔ batininitɛ falɛ dibalɛ ninta ma,

diekye babale sɛsaabla lɛma abi.

11 Bakpileblatɛ biyɔɔsa! Ɔlaa kpile ntika ma di suoto!

Babata ma koto mankyisa di asaa ya di nnɛɛ lɛma lɛbla nii.

12 Akyɛnfɔɔle manyinka batii nii,

basanko nle sɛka di suoto lɛma.

O batii nii, batunletɛ lee lɛkpaa ye beeyunsa;

beemunikĩisa ye beediki di osuku suoto.

13 SAATE nwu ntoosiɛ di kasiɛkɔ nɔɔ di kakankɔ;

atɔɔtaka ayɛ abakanko batii.

14 SAATE nwu ntoobuo di lɛkanko kamɛ

di banɔɔfo ku batunletɛ nɔɔ suoto alɛ:

"Aye niɛwɔɔsa nta awosobi nii kofe;

asaa ya bieyu ni di bapiitɛ nfũ n-yɛ di ayo lee.

15 Be oso bionyinka batii nii,

minkuɔ kafɔɔ bapiitɛ anu kaasɔ? "

SAATE nwu niebuɛ, SAATE wɔ Ninlenke ni.

16 SAATE nwu alɛ,

"Sion basanko kotuo suoto,

bɛɛnanfi simu bakyɛ bookyi,

bɔɔmaasa anu lɛma mankpee batii,

boodiki nkpaa seekpeele kanya,

di anankpo nkɔnii lɛma kowi ni wlon, wlon, wlon.

17 Nkpo oso SAATE nwu kamata nkɔ ntika di Sion basanko asi;

SAATE nwu kamata asi lɛma nfini plɔplɔ."

18 Di dii nwu nkpo SAATE nwu mafũ asaa biene lɛma nwu: nkpaa nkɔnii nwu ku asi aniisaa ku anyɛnɛ, 19 atokosakasaa ku nnɛɛtũ nkɔnii ku anu atĩisaa, 20 asi alolaasaa ku anankpo nkɔnii ku sifiamɛ, nnɔnyi kɔnɔkɔnɔ abo ku afa okpee nwu, 21 ayooto anɛɛbi akɔnii ku onwu akɔnii, 22 akpeelekyɔ biene ku akpeele wua ku n-ya mantika ni di osi ku koto ntofoee 23 ku awɛwɛ, ku akpeelekyɔ losole ku asi akpeesaa ku abula kplɛ mantĩi ni disi ku anu.

24 Di obe wɔ baapɛ ni ɔkɔnɔ, okpete babakpete;

di obe wɔ baatika ni sifiamɛ, sikũ babatika

di obe wɔ baabla ni asi biene, asi finile abale;

di obe wɔ baakpee ni akpeele biene, babanyukũ aboko;

di obe wɔ baalɛ ni sekpeele, bababuo oyududu.

25 Basuɔtɔ lee manɔɔ di kapamii kanya,

bakpɛtɛ lee maka di kakpɛ kamɛ.

26 Sion n-yoko nwu kamawi sikududu ninwi kaku;

lɛsalɛsaa dilabasinwɛ nwɔ, abataba kaasɔ.