1 Di lɛlɛɛ le di Asiria ɔka Sargon lakpee ni bakpɛtɛ nɔɔfole alɛ, aalaakpɛ Asdod okpoo aalenkee nwu nii- 2 di obe nwu kamɛ SAATE nwu lakakatɛ aafenko di Amos obisuɔtɔbi, Yesaya suoto. Aatɔkɔ nwɔ alɛ, "Diki leboko nwu ku ntokota lɛfɔ fatɛ." Ni aabla nkpo, aakyɛ lɛkyɔtɔ aatookyi ku nkpaa fukuti nɛ.

3 Ninfɛ di SAATE nwu labuɛ alɛ, "Fɛ mmle okle di kpɛmblatɛ nii Yesaya ntɔɔkyɛ ni lɛkyɔtɔ ku nkpaa fukuti alɛɛ atiɛ, fɛ dituosaa ku ɔtɛonyu di Egipte ku Kus suoto yi, 4 nkpo di Asiria ɔka kamakpaa Egipte batii balanle ku Kus batii ba beemufũ nii, babisɔ ku banɔɔfo mankyɛ lɛkyɔtɔ ku nkpaa fukuti nɛ. Lɛsalɛsaa dilabatĩi ma akyeke, dibale sinunsɔ ninta Egipte. 5 Batii ba niatika ni Kus disi mankanta ni di Egipte suoto kamayɛkɛ sinunsɔ kafɔɔ makpɛ ma. 6 Di dii nwu nkpo batii ba ninsi ni di lekpo kotoko kamabuɛ alɛ, ‘Binyu lɛsaa le nintɔɔbla ni batii ba suoto buotika ni disi, mba nfũ buatoso buasifi bulɛ baakyakaako wo baadiki ni di Asiria ɔka nnɛɛ! Lɛ nfɛ bubatoso?’ "