1 Nunua, ditunu dilɔbasinwɛ dita mba niasiɛ ni di dibuo kamɛ. Saa yi, aata Sebulon kasɔ ku Naftali kasɔ lawakosa suoto kasɔ, kafɔɔ di dii kaamaa abakpee Galilea Bafɔɔ dibu, di lekpo nwu osuku, di Yodan okle kotoko-

2 Batii ba ninkyɛ ni di ditunu kamɛ

ntɔɔnya lɛkpa kplɛ;

di mba ninsi ni di ditunu kplɛ kasɔ

lɛkpa ntookpete ma di suoto.

3 Fatɔɔkpɛnsa kale nwu

feemuɔsa kafɔɔ suoto lɛyɔɔ lɛma;

bɔɔnya suoto lɛyɔɔ di anu lɛfɔ

fɛ mmle di batii nnya ni suoto lɛyɔɔ di ofiɛlɛbee,

fɛ mmle di batii nnya ni suoto lɛyɔɔ

nse bɔɔsɛ ni asaa ya beefũ ni di balo lɛma nnɛɛ.

4 Fɛ mmle faabla ni di Midian batii olenkee kamɛ,

fatoobibiɛ

atoo nutũle ya nikokpee ma ni kubuɛ,

owoso wɔ ninsana ni di amuusi lɛma,

ninle banyikatɛ lɛma kawesee.

5 Kpɛtɛ biala ntokota be ɛɛblako ni ɔkpɛ di kakpɛ

ku awu biala niɛbla ni ku ntɔ

babafiɛ nya,

abale ɔtɔ dikutaasaa.

6 Diekye beelofo obi bɛɛta wo,

bɛɛta wo obisuɔtɔbi,

sɛka ole kafɔɔ kamatika di amuusi nɔɔ.

Babalɛɛ nwɔ kafɔɔ alɛ,

Disibutatɛ Kplɛ, Yaa Sientɛ,

Teete Anaakaloo, Atoko ɔkyɛ ole Ɔka.

7 Sɛka ole nɔɔ ku atoko ɔkyɛ ole kamakpɛ

dinaa ni kaloo.

Abale sɛka di Dawid lɛkakpomii suoto

ku sɛka kalekɔ nɔɔ,

abase sĩ sinwɛ osie kafɔɔ

ku lɛka biene ku ɔsaabla tinini

diɛyɔ di obe nwu diesifi ni dinaa ni kaloo.

SAATE wɔ Ninlenke ni osie

nimabla nle mmle.

8 Saate nwu ntoota kanya di Yakob suoto;

kabawa di Israel suoto.

9 Batii bamuu kamatofo nwu-

Efraim ku Samaria batii-

ba nikobuɛ ni ku lɛkanta

ku otu katoo ɔtakatɛsa alɛ,

10 "Atɛnkudi ntɔɔnɔɔ ɛɛpɛ kaasɔ,

kafɔɔ bubase letofo ku afuɔ wolale;

batoobudi abue awoso,

kafɔɔ bubayɔ sida awoso munse kaanya."

11 Kafɔɔ SAATE nwu ntookpee Resin balo osie di suoto lɛma

eekpee kafɔɔ balo lɛma nwu sɛwa.

12 Aram batii lekye kufĩ katunkɔ, Filisti batii kafɔɔ lekye kufĩ kamɛɛkɔ

bɛɛbɛ kanya beewee Israel batii.

Kafɔɔ di n-ya mmle amuu kamɛ, ɔblɔ nɔɔ diiyɔɔ,

eekple eekplesa kɔnɛɛ nɔɔ katoo.

13 Kafɔɔ batii nwu diikple basifi nnwɔ niɛpɛ ma ni nfũ,

ee bawolaa SAATE wɔ Ninlenke nii.

14 Nioso SAATE nwu kamabudi Israel disi ku ɔ̀ka,

sɛkaafɛ ku lɛkpɛnyi di dii kufĩ kamɛ;

15 banɔɔfo ku batii finle ninle disi nɛ,

Yaa ɔlaabauɛtɛtɛ ba nikotuo ni sɛlaa ku afunu ninle ɔ̀ka nɛ.

16 Mba ninleko ni batii ba mmle katũ leyunsa ma,

mba kafɔɔ baleko ni katũ ntooyu.

17 Nkpo oso Saate nwu dilɔbanya suoto lɛyɔɔ di bakosopo suoto,

ee anya bakuɛbi ku bakpisɔfɔ nyaami,

diekye bamuu lɛma batii kpile ku asaakuu bablatɛ bale,

kanya biala kobuɛ sɛlaakuu.

Kafɔɔ di n-ya mmle amuu kamɛ, ɔblɔ nɔɔ diiyɔɔ,

eekple eekplesa kɔnɛɛ nɔɔ katoo.

18 Diekye asaa kpile ɔbla nfiɛ fɛle ɔtɔ;

kuofiɛ akuna ku siwuu,

kunkpee apookuu ɔtɔ,

ninta alɛ kɔyɔ nkyɛ di osi tuu.

19 Di SAATE wɔ Ninlenke ni ɔblɔ

kasɔ nwu kamafila

batii kafɔɔ nimale ɔtɔ nwu dikutaasaa;

kuonwii dilɔbanya owo nɔɔ nyaami.

20 Di koletanɛɛ bababɛbɛɛ,

kafɔɔ kɔka makple kunklee ma;

di kɔmɛntunɛɛ babale alesaa,

kafɔɔ blɔbamiɛ.

Obiala kamawee nnwɔɔ omu nɔɔ ɔnantii sina:

21 Manase mawee Efraim, Efriam kafɔɔ mawee Manase;

banyɔ lɛma babasi kanya manyila di Yuda suoto.

Kafɔɔ di n-ya mmle amuu kamɛ, ɔblɔ nɔɔ diiyɔɔ,

eekple eekplesa kɔnɛɛ nɔɔ katoo.