1 Di dii nwu nkpo babasa onu wɔ mmle di Yuda kasɔ suoto:

Bukpe okpoo kplɛ siene;

Yaa lɛbla didiki

seyoyiɛ ninwu kayi ku kamɛ.

2 Bisɛkɛtɛ n-yoko

alɛ kale tinini nwu kabuo,

kale ka ninkle ni ofũ onu.

3 Nnwɔ di diisibu nɔɔ ntika ni di suoto lɛfɔ

fabaklee nwɔ ku atoko ɔkyɛ ole wɔ niewo ni niimu

diekye eetika fɔ disi.

4 Tika SAATE nwu disi dinaa ni kaloo,

diekye Saate nwu, Saate nwu ninle Dikfuɔnkpaa dinaa ni kaloo.

5 Anwakosa mba nintika ni di osi kasɔ,

anwakosa okpoo kplɛ nwu kasɔ;

ambiɛ nwu antɛ kaasɔ

anfuki nwu antɛ kaasɔ kafɔɔ di kɔtɛ kamɛ.

6 Nkpaa lɛnanafu nwu kuɔtɛ kaasɔ-

mba baanyinka baatɛ ni kaasɔ nkpaa

ku bapiitɛ nnafukpaa.

7 Tininitɛ osuku lɛkyɛkyɛ;

Oo tininitɛ, afɔ niɛbla otii wɔ ninte ni tinini osuku kyɔlɔkyɔlɔ.

8 Nwaako Saate , ɔkyɛ di afiofa lɛfɔ osuku nwu suoto,

ni munsoko fɔ nɛ;

leyooto lɛfɔ ku katoo ɔtakatɛsa

ninle wo otu dibiesaa.

9 Okla nii mmiɛ fɔ di kakyɛ;

di olesɛ ninwuna nii nwolaa fɔ.

Nse akanko lɛfɔ lɛwa di kasɔ suoto

batii kaayi ntekete ɔsaabla tinini.

10 Kuntɛ beediki sibualɛ beetuo bakpiletɛ,

bolootekete ɔsaabla tinini;

bia di batii biene kasɔ suoto mankple mantɔɔbla asaa kpile

man-nyu kafɔɔ SAATE nwu nimuɔ.

11 Oo SAATE, kɔnɛɛ lɛfɔ ntɔɔtaka katoo,

kafɔɔ blɔɔnya kũ.

Ta ma banya okyiini lɛfɔ di batii lɛfɔ suoto di sinunsɔ sikpɛ ma;

ta ɔtɔ wɔ fɛɛbla fɛɛtɛ ni balo lɛfɔ kufiɛ ma.

12 SAATE, afɔ niɛbla atoko ɔkyɛ ole fɛɛta wo;

asaa ya amuu butɔɔwɛ nii, afɔ niɛbla fɛɛta wo.

13 Oo SAATE, Yaa loo, basaate bamba di sɛmaa lɛfɔ ntoole sɛka di suoto loo,

kafɔɔ leyooto lɛfɔ lete buɔta dibu.

14 Nunua batookpi, basinnaa nkpa;

mma nkpo nintookpi ni anwuna dilɔbasintaka.

Fɛɛnanfi ma kootoko fɛɛta kawɔɔ;

fɛɛbla kafɔɔ falɛ blaasinnyuma ma diidii.

15 O SAATE; fatɔɔkpɛnsa kale nwu

faatɔɔkpɛnsa kale nwu.

Fatookpee suoto dibu.

Faatɔɔblɛfɛsa kasɔ nwu amɛ amuu.

16 SAATE, baawa ɔkyɛ lɛfɔ di dibuo kamɛ;

di obe wɔ faananfi ma ni kootoko,

baapɛ ɔlaa baata fɔ.

17 Fɛ nse ɔsanko nlaka lɛmɛ nfɛ abalofo

antoosisikiti antɔɔfaa ni ku dibuo,

Oo SAATE, nkpo buoate di anu lɛfɔ nɛ.

18 Bualaka amɛ, buasisikiti ku dibuo,

kafɔɔ bualofo kɔfɛɛfɔ.

Buɔwako didiki kaasɔ;

butalofo batii kaayi.

19 Kafɔɔ bakpi lɛfɔ kamasiɛ nkpa;

babataka ku suoto lɛma.

Aye ba ninsi ni di kɔtɛ kamɛ,

bitaka bieyiisa kudú ku suoto lɛyɔɔ.

Oblokyi lee nte fɛle olesɛ oblokyi;

kasɔ kamadiki bakpi nɔɔ anta.

20 Batii nii, bitɔɔkyɛ, bibuo ayo lee

biɛsɛɛ n-yoko lee kafɔɔ;

biɛwofasa suoto lee obe kɛkɛɛ

dilaase di obe wɔ di ɔblɔ nɔɔ ntoofe ni.

21 Binyu, Saate nwu kodie di kasiɛkɔ nɔɔ anwa

amananfi batii kootoko kaasɔ ta sikpile lɛma oso.

Kasɔ kamadiki ntɔ be beewii ni di suoto nɔɔ antuo;

klɔbasinfuo mba beelo ni di suoto nɔɔ okookaa.