1 Nwaako SAATE nwu kɔnɛɛ diesii okunkudu alɛ alaafuo batii odiki,

ee atoko nɔɔ atĩi alɛ alaanu.

2 Kafɔɔ ɔtanlolaa lee ɔbla niɛblasa

ye di Yaa lee suoto;

sikpile lee ntoowofasa anu nɔɔ di suoto lee,

diɛta alɛ ɔlɔbanu.

3 Diekye nnɛɛ lee lɛbla ku ntɔ,

anɛɛbi lee ku sikpile.

Anyasibi lee lɛlaa sɛlaa,

sɛkplalomii lee kafɔɔ nwununuu sɛlaa kpile.

4 Kuonwii ninka lɛka tinini;

kuonwii nimbuɛ ɔlaa nɔɔ ku onukwale.

Sɛlaa ɔnaanfi ku sɛlaa ku afunu mantika anu;

manlaka kafɔɔ kubuɛ lɛmɛ manlofo sikpile.

5 Mambiɛ akotia afuɔ

manloso kukuɛmaa.

Olele niewee afuɔ lɛma nwu makpi,

nse kafɔɔ beebiɛ ninwii, kɔwɛɛfɛɛko ndie.

6 Kɔmaa lɛma diele lɛsalɛsaa kuta abula;

balaafuo n-ya bɛɛbla ni ɔyɔ otĩi suoto lɛma.

Sɛsaabla lɛma nle ablasaa kpile,

amumu ɔbla kafɔɔ nsi di nnɛɛ lɛma.

7 Nkpaa lɛma ntoso nimbuo di sikpile kamɛ;

mampɛsɛwa alɛ boowii ntɔ be ninankpi ni lɛpɔɔ.

Asibu lɛma nle asibu kpile;

kasaalalaasa ku kawɔɔ ntɛ sisuku lɛma nsũ.

8 Baaye atoko ɔkyɛ ole osuku;

lɛka tinini nnaa di nkpaa lɛma sisuku suoto.

Beemunikĩisa sĩ bɛɛbla sisuku kɔnkɔnle;

Olele niɛkyɛ di sisuku nwu dilɔbawɛ atoko ɔkyɛ ole.

9 Nioso lɛka tinini lekyo ku awo,

ɔsaabla tinini kafɔɔ nindu wo.

Mumbie ɔtɔ, kafɔɔ nimuu nle ditunu;

buobie lɛkpa, kafɔɔ munkyɛ di ditunu tunutunu kamɛ.

10 Buɔlɔlɔfɔ nnɛɛ di oyiyiɛ fɛle numbiɛtɛ,

buowlaa osuku loo fɛle batii ba ninaa ni anu.

Muntuula ku kakũ fɛ kakyɛ kale;

busi di nkpa batii kamɛ fɛle bakpi bule.

11 Bamuu loo munkumii fɛle okiti;

munwi sɛnyaami kanya fɛle alaapɔɔ.

Mumbie onukwale, kafɔɔ munnwɛ kuonwii;

mumbie didiki, kafɔɔ diekyo.

12 Diekye akpilesaa loo mpɔ di anu lɛfɔ,

sikpile loo kafɔɔ kodiki wo sinta.

Akpilesaa loo nsi kaamɛ loo obe lele,

buye ɔtanlolaa ɔbla loo kafɔɔ:

13 buɔbla otokopĩ buɔtaka buoyila di SAATE nwu suoto,

buomunikĩisa mmaa loo buɔta Yaa loo,

amumu lɛkakatɛ ku kudú okpee,

mumbuɛ sɛlaa ku afunu amɛ ya di situ nlaka nii.

14 Nioso lɛka tinini nfɛ nte sɛmaa,

ɔsaabla tinini kafɔɔ n-yila kaakyonkɔ;

onukwale obuɛ di akpaka nsinaa,

nwaako ole dilɔbafuo obuo;

15 Onukwale nsinnaa kaakɔkaakɔ,

olele kafɔɔ niesĩ sikpile nkple bɔkɛɛ mufũ le.

SAATE nwu lanyu, ditamɛnɛmɛnɛ nwɔ

alɛ lɛka tinini nsinnaa.

16 Aanya alɛ otii kuonwii nnaa,

diabla nwɔ ɔkpɛ alɛ otii kuonwii nnaa aakpanaa nii;

nioso kɔnɛɛ nɔɔ kumu labla didiki ɔkpɛ kuatɔɔ,

ɔsaabla tinini nɔɔ omu kafɔɔ laklee nwɔ.

17 Eekpee ɔsaabla tinini fɛ kubidifunsaa,

didiki abɔɔsaa lɛkoto kafɔɔ di disi nɔɔ;

eekpee ɔbla okyisa akpeele

nnwɔɔ omu ɛɛkpa okyiini fɛ dibula.

18 Di nle baabla ni kanya,

nkpo abata koto ankyisa

anta balo nɔɔ ku ɔblɔ

lɛtoko naanfi kafɔɔ anta bakyiditɛ nɔɔ;

abata kasɔ ka di ntu lɛmana diekyi ni koto lɛma ko niesiɛko ma ni ankyisa.

19 Batii mayɛkɛ SAATE nwu leyooto di kufĩ kamɛɛkɔ,

babayɛkɛ leklekle nɔɔ kafɔɔ di kufĩ katunkɔ.

Diekye abawa fɛle ntu yiile nikɔwa ni ku osie

di SAATE nwu kɔfɛɛfɔ kɔfɛ kunsifiko ni.

20 "Dikitɛ nwu mawa Sion,

anwa mba ninkpe ni di Yakob beekyi ni di sikpile lɛma suoto nfũ,"

SAATE nwu niebuɛ.

21 SAATE nwu alɛ "Ami fɛ ami, nle mmle ninle kanya ninii nii ku ma nɛ, Ninwuna nii le ninsi fɔ ni kaamɛ, ku sɛlaa nii se lɛyɔ lekpee ni di kanya lɛfɔ dilɔbadie di kanya lɛfɔ, ee babi lɛfɔ nnya, ee banantii lɛfɔ nnya diɛyɔ ni di nua diesifi ni dinaa ni kaloo."