1 Bikpukuti biwa, aye nnle batii, bienu;

Bikyɔɔ atoko, aye batii!

Bita kasɔ kanu, ku asaa ya amuu ninsi ni kaamɛ,

kayi ka mmle ku asaa ya amuu nindie ankye ni kamɛ!

2 SAATE nwu ntɔɔnya ɔblɔ di nnle mmuu suoto;

ɔblɔ yakayaka nɔɔ ntika di bakpɛtɛ lɛma bamuu suoto.

Abawɔɔsa ma klekle,

abayɔ ma anta manlo.

3 Blɔbakookaa mba niɛka ni kaakpɛ,

bakpi nwu kamakpete osie kanya;

abokote kamabuu ku ntɔ lɛma.

4 Awɛntrɛbi amuu di osi kamayɛlɛfɛ

kolo kafɔɔ kamakatu fɛle kukũ;

osi asaa ya amuu ninkpa ni kamakpakpaa

fɛle afata ya niɛyɔɔ ni di nta awosobi kowoso suoto,

fɛle abue mɔmɔtĩle di abue kowoso suoto.

5 Kapamii nii ntoosiɛ nta di osi;

nyu, koosoo ku lɛkanko di Edom suoto,

batii ba ntɔɔwɔɔsa ni klekle.

6 SAATE nwu kapamii ntookpe ntɔ,

lɛla ntootĩi ka-

afosobi ku batie ntɔ,

lɛla di akunumuu akɛɛ suoto.

Diekye SAATE nwu nkpe oleɔta di Bosra

ku batii olo kplɛ di Edom.

7 Bakɔkɔ suɔtɔ manɔɔ ku mma,

banankye-suɔtɔ abi ku banakyue kplɛ.

Kasɔ lɛma kamabuu ku ntɔ,

kɔtɛ kafɔɔ kamamɛ lɛla.

8 Diekye SAATE nwu nkpe dii ɛɛta letota,

ɔbla okyisa lɛlɛɛ dile, alɛ bɔɔkpɛ manta Sion.

9 Edom seklenyii kamakple ama,

kɔtɛ nɔɔ kamakple ama fiɛle

kasɔ nɔɔ kamakple ɔtɔ ama!

10 Kulɔbanii kakũ ku kakyɛ,

kɔyɔ nɔɔ kamataka dinaa ni kaloo.

Diedie ni di kɔna diesifi ni kɔna kabate kafukuti;

kuonwii dilɔbasinkple afe ka di suoto diidii.

11 Ɔfaafuu asukusuku ku asukusuku ya nin-wi ni osie kanya nimasiɛ ninfa;

asukusuku kplɛ ku bakwakwalobi kamabla ayo ninfa.

Yaa kamananfi

kakpɔkpɔtɔ lɛklapoosaa afenko di Edom suoto

ku lɛsɔtannu okũ alɛ kuakple okpoo biɛle.

12 Batii finle nɔɔ dilɔbawɛ lɛsalɛsaa ninfa baalɛɛ ni sɛka kalekɔ,

banɔɔfotii nɔɔ bamuu kamayɛ.

13 Siwuu kamayie di nwofakɔ nɔɔ,

kunyii ku akpofoe di ntanikokɔ nɔɔ.

Abakple kasiɛkɔ anta lepoo kamɛ baweewee,

leyo anta asukusuku.

14 Ɔfaafuu babɔkɛɛ ku banantiayi kamakyaka ninfa,

nkpĩni kamawi manlɛɛ bawo ninfa;

nfa kafɔɔ di kakyɛ ayɛkɛsaa kamasiɛ nɛ

mammiɛ aba manta suoto kafɔɔ diɛta ni ɔnyɛɛ ɔtɛ.

15 Disukusuku kamabla leyo ninfa nin-fa afuɔ,

ambiɛ nya, anyu abi di afoko nɔɔ kunyii kalɔ;

nfa kafɔɔ di nkyɛ kamasi nɛ,

dibiala ku ɔsa.

16 Nyu di SAATE nwu kukũ kamɛ faaka:

Kuninwii nini dilɔbayu,

kuninwii dilɔbawɛ alɛ dinaa ni kɔsa.

Diekye kanya nɔɔ niekpee kufiofa nwu,

Ninwuna nɔɔ kafɔɔ kamasiisa ma.

17 Nnwɔɔ niata ma aba lɛma;

kɔnɛɛ nɔɔ niasɛ nya ku lɛklapoosaa okũ.

Kabale ma kale dinaa ni kaloo

mansiɛ ninfa diɛyɔ ni di kɔna diesifi ni kɔna.