1 Ɔlaa di Egipte suoto:

Nyu, SAATE nwu nsi di lelokonkyɛ suoto ku nkye

ɔɔwa Egipte.

Egipte afiɔ kamatũtũkũ di anu nɔɔ,

Egipte batii situ kafɔɔ ntɔɔkpa di suoto lɛma kamɛ.

2 "Kamata Egipte otii ntaka di Egipte otii suoto-

obilɛma kamakpɛko obilɛma,

siɛwo di siɛwo suoto,

okpoo kplɛ di okpoo kplɛ suoto,

sɛka kalekɔ di sɛka kalekɔ suoto.

3 Nnɛɛ kamafee Egipte batii,

kamakpɔkpɔtɔsa disibu lɛma kafɔɔ;

babawolaa asaa kamɛ di afiɔ ku bakpi nfũ,

di babɔmpɛtɛ ku bafatɛ nfũ.

4 Kamayɔ Egipte batii nkpee

di saate siensietɛ osie nnɛɛ,

ɔka wɔ niɛyakayaka ni kafɔɔ nimale sɛka di suoto lɛma,"

SAATE nwu, SAATE wɔ Ninlenke ni niebuɛ.

5 Ntu di okle kamasɔɔ,

okle kafenkɔ nwu kafɔɔ kamakoso nimbla wakalaa.

6 Situkplo kamakpete;

kokleyii di Egipte kamabubudi sinsɔɔ.

Lɛtaani ku lɛkpɛnyi kamayɔɔ,

7 lɛsaa lele kafɔɔ bɛɛpɛ di Nil ɔlɔɔkɔ

di okle kotoko.

Kofe biale bɛɛpɛ asaa di Nil okle ɔlɔɔkɔ

kamakoso wakalaa, kɔfɛɛfɔ ntuka ansifiko dilɔbasinwɛ kafɔɔ.

8 Kɔkpaku badikitɛ kamawi sikududu ku sɛnyaami,

batii ba bamuu nintaa ni dadiwa di Nil okle kamɛ;

mba nintaa ni asawu di ntu nwu kamɛ

nnɛɛ kamafee ma.

9 Nnɛɛ kamafee mba nimblako ni sɛleteku ɔkpɛ,

abula fututu fɛnɛnɛɛ balosotɛ kamayu osuku onyu.

10 Nnɛɛ kamafee abula bakpɛmblatɛ,

mba kafɔɔ bamuu ninfũ ni kɔwɛntɛto situ kamabiɛ.

11 Soan banɔɔfotii nwu diele lɛsalɛsaa dilenkee babuutɛ;

Farao disibu batatɛ banumbentɛ nwu lɛta dibuu disibu.

Lɛ biatɔkɔ Farao bilɛ,

"Banumbentɛ onwii lɛma nle,

saa baka nwu saateketetɛ "?

12 Ɔfɛ di banumbentɛ lɛfɔ nwu nkpe?

Tama batuo fɔ baata fɔ kafɔɔ fatofo

disibu le di SAATE wɔ Ninlenke ni

ntɔɔbla ni di Egipte suoto.

13 Soan banɔɔfotii nwu ntookple babuutɛ,

Batɔɔkyɔnkyɔ Memfis batunletɛ;

batii ba ninle ni okpoo nwu nkpo ninu

ntɔɔkpaa Egipte beeyunsa.

14 SAATE nwu ntɔɔnyɛɛnɛ

dikyiko ninwuna eekpete ma kaamɛ;

batɔɔta Egipte kosiɛ di asaa ya amuu ɔɔbla ni suoto,

fɛ tasiɛntɛ nikosiɛ nta ankyi ni nnwɔɔ omu alaa.

15 Lɛsalɛsaa nnaa di Egipte kafuo ni ɔbla-

ɔnɔɔfo ee obisɔ, osuɔtɔ ee ɔsanko.

16 Di dii nwu nkpo Egipte batii kamate fɛle basanko. Babakyako otũtũkũ ku lɛyɛkɛ di lɛklɔklɔɛ le di SAATE wɔ Ninlenke ni kamamu ankyɔɔ ma ni suoto. 17 Yuda kasɔ nwu kamata Egipte batii lɛyɛkɛ; Egipte otii lele nfũ bɛɛlɛɛ Yuda leyooto kamayɛkɛ, ta disibu le di SAATE wɔ Ninlenke ni kɔbla ni di suoto lɛma oso.

18 Di dii nwu nkpo ekpoo kplɛ ɛnɔɔ di Egipte kamabuɛ Kanaan sele manka ntam manta SAATE wɔ Ninlenke nii. Babalɛɛ onwii ninwu alɛ Kawɔɔ Okpoo Kplɛ.

19 Di dii nwu nkpo oleɔta akyikye kamawɛ anta SAATE nwu di Egipte okpoo ntɛɛ, nsũ ɔtɛ difuɔ kafɔɔ mate di kɔmɛ nɔɔ ninta SAATE nwu. 20 Dibale nsũ lɛtɛsaa ku kamaadiyilasaa ninta SAATE wɔ Ninlenke ni di Egipte kasɔ suoto. Alɛ nse beewi bɛɛlɛɛ SAATE nwu ta mba ninyinka ma mantɛ ni kaasɔ oso yi, aakyesee ma dikitɛ ku funtɛ, amadiki ma. 21 Nioso SAATE nwu kamadiki suoto antuo Egipte batii, di dii nwu nkpo babatofo SAATE nwu. Babasumu nwɔ ku oleɔta ku alesaa asaaɔta; babaka ntam manta SAATE nwu manle ntam nwu kafɔɔ. 22 SAATE nwu kamapɛ Egipte ku ofiɛ; abapɛ ma ankple anyɔɔsa ma ofiɛ. Babamunikĩi manyu Saate nwu, nnwɔɔ kafɔɔ abanu ma lekoto otikiti anyɔɔsa ma ofiɛ.

23 Di dii nwu nkpo, osuku kplɛ kamate kundie di Egipte kunsifi Asiria. Asiria batii kamakyɛ Egipte, Egipte batii kafɔɔ kamakyɛ Asiria. Egipte batii ku Asiria batii kamasumu di lɛba ninwii. 24 Di dii nwu nkpo, Israel kamale otiɛfa ankyakaa di Egipte ku Asiria manle lɛtɔtrɔ kaasɔ suoto. 25 SAATE wɔ Ninlenke ni kamawii ma lɛyɔɔ ambuɛ alɛ, "Lewii fɔ lɛyɔɔ Egipte batii nii, Asiria kɔnɛɛ nii kamɛ ɔkpɛ, ku Israel atesaa nii."