1 Di dii nwu nkpo,

SAATE nwu kamayɔ kapamii,

kapamii nɔɔ yɛkɛle kplɛ nwu ku osie,

annanfi Lefiatan* kɔsaanwu kɔnkɔnle nwu kootoko

Lefiatan kɔsaanwu kakatule nwu;

abalo boso nwu di lekpo kamɛ.

2 Di dii nwu nkpo, SAATE nwu mabuɛ alɛ,

"Bisa onu di nta awosobi kofe biene suoto:

3 Ami, SAATE nwu, nikonyu kũ;

nkpete kũ ntu obe lele.

Nnyu kũ kakũ ku kakyɛ

alɛ otii kuonwii dilaalalasa kũ.

4 Ɔblɔ diloofiɛ mi.

Nse lɛnya akuna ku siwuu n-yɛ mi di suoto!

Kamataka kakpɛ di suoto lɛnya;

kamakpee nya amuu ɔtɔ.

5 Diediki bɛɛwa bɛɛbataniko mi;

bɛɛbla atoko ɔkyɛ ole ku ami,

nwaako, babla atoko ɔkyɛ ole ko ku ami."

6 Obe kɔwa di Yakob kamataa ni sidu,

Israel kamadie sɛla antika kafɔɔ atoto

anyii kayi kamuu kafɔɔ ku abi.

7 Saate nwu ntoodipɛ Israel

fɛ mmle aapɛ ni mba niapɛ ma ni?

Atodilo ma

fɛ mmle aalo ni mba nialo ma ni?

8 Kakpɛ faayɔ faakpaa ma faasifiko bafɔɔ kasɔ-

ku kɔfɛɛfɔ yɛkɛle nɔɔ aayɔ aatososa ma aadiki,

fɛ di dii le di kufĩ katunkɔ kɔfɛɛfɔ lafɛ ni.

9 Di nle mmle kamɛ, ni babayɔ Yakob lɛpɔɔ okpi mankyɛ nwɔ nɛ,

nle mmle kafɔɔ nimale sikpile nɔɔ simuu otekete abi nɛ:

Nse ɛɛta afuɔ oleɔta akyikye nwu amuu

lete fɛle akaaloo afuɔ beebibiɛ ni kɔkyɛɛkɔkyɛɛ,

Asera afiɔ sewoso ee olufui oleɔta akyikye

dilɔbabu ayila.

10 Okpoo kplɛ siene nwu mate ofukuti,

batii dilɔbasinsiɛ nwu kaamɛ, babadiɛ nwu kunte fɛle ɔfaafuu;

anankyuebi kamawee sɛfa ninfa,

mante ninfa;

manwee nwu sewosola.

11 Nse sɛla ninwu lekoso, manfefee sĩ mandiki

basanko kafɔɔ nwa mamakpee sĩ ɔtɔ.

Diekye kale ka batii ninan-ye ni lɛsaa bale;

nioso Blatɛ lɛma nnaa nyaami ɔnya ɛɛta ma,

Nnwɔ niɛwako ma ni kayi kafɔɔ diloole ma sibualɛ.

12 Di dii nwu nkpo, SAATE nwu kamasiisa ankyeko di Eufrate okle nikobiɛ kunfe ni anaadunko Egipte Okle katɛnklɛkɔ, O, aye Israel batii, babasiisa ye onwii, onwii. 13 Di dii nwu nkpo kafɔɔ, dikyukyoo kplɛ kanya kamadie. Mba niatɔɔwɔɔ ni di Asiria ku mba niale ni bafɔɔ di Egipte kamawa mamasumu SAATE nwu di kobokote klekle nwu suoto di Yerusalem.