1 "Fafaa osie kanya, tandiɛ.

Takatɛ sɛlɔ lɛfɔ katoo fɛle dikyukyoo.

Tɔkɔ batii nii ɔtanlolaa ɔbla lɛma

faatɔkɔ Yakob leyo kamɛ kafɔɔ sikpile lɛma.

2 Diekye dii biala boowolaa mi;

boomiɛ alɛ batofo sisuku nii osie kanya,

fɛ kale ka nimbla ni nle ninlɛ nii

manankyi ni kafɔɔ di Yaa lɛma afiofa kamaa.

Mankaalɛ mi lɛka tinini

boomiɛ ni kafɔɔ alɛ Yaa atɛɛtɛɛ ma nii.

3 Mambuɛ alɛ, ‘Be oso buonii ni kanya

di afɔ faanya?

Be oso buawakosa ni suoto kasɔ

di afɔ fatatofo?

Kafɔɔ di kanya onii lee dii suoto mimbla nle niesiɛko ye nii

mintafaa kafɔɔ bakpɛmblatɛ lee bamuu.

4 Minloo kanya onii lee nwu ku nlɔ ku nkpɛ

mimpɛ bawo ku amumu aklɔɛklɛ.

Bilaafuo kanya onii fɛ mmle biɔbla ni miɛ

minnyu bilɛ baanu ye sɛlɔ di osi.

5 Kanya onii wɔ mmle komiɛ nɛ,

dii ninwii lete di otii mawakosa suoto kasɔ?

Disi kasɔ ɔwakosa fɛle lɛnwaakɛ lete

ku ote di leboko ku ntɔ́ suoto dile?

Nni nkpo biɔlɛɛ kanya onii,

dii le niebuo ni SAATE nwu anu nɛ?

6 "Diele kanya onii wɔ mmle lefũ lekpee:

alɛ biadiki mba ninsi ni di sɛkpɛnkyɛ

minfukuti kafɔɔ mba bɛɛpɛ ni akpo sikũ,

minta mba boonyinka ni nwɛ suoto osiɛko

minfefee kafɔɔ lekpo biala?

7 Diele alɛ faasɛ alesaa lɛfɔ ku kɔkakleetɛ

faata kafɔɔ piitɛ wɔ nikɔlalaa ankyi ni kasiɛkɔ-

nse fɛɛnya lɛkyɔtɔ otii faatɔɔ lɛsaa anklee,

alɛ falaakyisa kamaa kafɔɔ faata suoto sina ku ntɔ lɛfɔ mmu?

8 Ni lɛkpa lɛfɔ makpa nwaa fɛle kolesɛtũ,

ofiɛ lɛfɔ kafɔɔ mayɔɔ fɔ wla;

ni ɔsaabla tinini lɛfɔ maleko fɔ katũ,

SAATE nwu lɛkpa kafɔɔ kamayila fɔ kamaa.

9 Ni fabalɛɛ SAATE nwu, antuna anta fɔ kafɔɔ;

fabawi fambie lɛkyakaako, ni ababuɛ alɛ: Nnyɛɛ.

"Nse feetekete atoo nyinkale nwu,

ku lɛnɛɛ ɔkyɔɔ ku lɛkakatɛ nyakatãa,

10 biɛyɔ alesaa lee kafɔɔ biɛta otii wɔ di kɔka nkle ni

fɛɛta kafɔɔ nnwɔ boonyinka ni abiesaa lebuo nwɔ anu yi,

ni lɛkpa lɛfɔ kamakpa di ditunu kamɛ,

kakyɛ lɛfɔ kafɔɔ kamakple fɛle kakũ kplamatãa.

11 SAATE kamanyu fɔ obe lele;

abata abiesaa lɛfɔ ankpanko fɔ kɔnɛɛ di kasɔ ka di kufĩ kɔpɛ ni suoto

abasiensa kafɔɔ akufi lɛfɔ.

Fabate fɛle kɔba ko beekpete ni ntu nwaa,

fɛle ntu kataakɔ ka di ntu nɔɔ ninsɔɔ ni diidii.

12 Batii lee makple manse saa sekpoo nwu obudi

fantakatɛsa leyo asɔse kofole nwu;

babalɛɛ fɔ alɛ Seyoyiɛ Biɛbiɛle Tofotɛ,

Sisuku ku Nsiɛkɔ Lolaatɛ.

13 "Nse faata nkpaa lɛfɔ didiki dilalaasa Lɛnyɛɛtɛyi

fanambla nle niesiɛko fɔ ni di dii klekle nii suoto,

nse fɛɛlɛɛ Lɛnyɛɛtɛyi nwu suoto lɛyɔɔ

ku SAATE nwu dii klekle nwu falɛ dibu,

fɛɛta ni dibu alɛ faakyɛ di afɔ omu osuku suoto

fanambla nle niesiɛko fɔ ni ee fakakatɛ sɛlaakuu yi,

14 ni fabawɛ suoto lɛyɔɔ di SAATE nwu kamɛ,

mata fɔ kafɔɔ fanaadu kasɔ nwu ntakalekɔ

fanle kafɔɔ ɔwa lɛfɔ Yakob atesaa."

SAATE nwu kanya niebuɛ.