Sion Leyooto Fɔle
1 Ta Sion oso namalo kanana,
ta Yerusalem oso namamaasa kanya,
diediki ɔsaabla tinini nɔɔ lɛkpa fɛle kolesɛtũ,
didiki nɔɔ kafɔɔ fɛle kaka ka nikɔkɛsɛɛ ni.
2 Nnle nwu kamanya ɔsaabla tinini lɛfɔ,
baka bamuu kafɔɔ kamanya lɛkpa lɛfɔ;
leyooto fɔle babalɛɛ fɔ
di SAATE nwu kanya mata fɔ ni.
3 Fabale lɛkakoto le nikɔlɛ ni onyu di SAATE nwu kɔnɛɛ,
lɛkakoto di Yaa lɛfɔ kɔnɛɛ kamɛ.
4 Blɔbasinlɛɛ fɔ otii wɔ Beesĩ nii,
ee batika kasɔ lɛfɔ leyooto alɛ Kafukuti.
Kafɔɔ babalɛɛ alɛ Hefsiba,62.4 Hefsiba lɛsɔdiki ninle suoto lɛyɔɔ nii nsi kaamɛ lɛfɔ
kasɔ lɛfɔ kafɔɔ alɛ Beula;62.4 Beula lɛsɔdiki ninle santɛ nɛ
diekye SAATE nwu manya suoto lɛyɔɔ di kamɛ lɛfɔ,
babayɔ kasɔ lɛfɔ nwu fɛ mmle man-yɔ ni ɔsanko.
5 Fɛ mmle di okosopo n-yɔ ni okpeele,
nkpo di babisuɔtɔbi lɛfɔ dilɔbabla di suoto lɛfɔ nɛ;
fɛ mmle di ɔkafɔɔsa nnya ni suoto lɛyɔɔ di ɔkafɔɔ nɔɔ suoto yi,
nkpo di Yaa lɛfɔ manya suoto lɛyɔɔ di suoto lɛfɔ nɛ.
6 Oo Yerusalem, ntɔɔkaasa asaa banyuntɛ di seyoyiɛ lɛfɔ;
diidii blɔbalo kanana kakũ ee kakyɛ.
Aye ba ninlɛɛ ni SAATE nwu,
bitantɛ ɔnyɛɛ,
7 bitantɔɔ kafɔɔ aatɛ ɔnyɛɛ dilaase di obe wɔ abatɛ ni Yerusalem
ambla nwɔ ni kasɔ nwu katansa.
8 SAATEnwu ntɔɔka ntam ku koletanɛɛ nɔɔ
ku kɔnɛɛ nutũle nɔɔ:
"Diidii namasin-yɔ atitabi lɛfɔ
nta balo lɛfɔ fɛ alesaa,
diidii kafɔɔ bafɔɔ dilɔbasinnyi nta fɔle
be suoto ditoobuo fɔ nii;
9 kafɔɔ mba nimafee nya ni male nya
man-yɔ katansa manta SAATE nwu,
mba kafɔɔ ninsiisa ni awosobi nwu kafɔɔ manyi nya nta
di lɛkpaayo klekle nii nflɔnkɔ."
10 Bibuo bife, bibuo bife di n-yoko nwu
Bilolaa osuku bita batii.
Bibla, bibla osuku kplɛ nwu!
Bikyisa afuɔ nwu.
Bitakatɛsa flankaa bita nnle nwu.
11 SAATEnwu ntooyie lɛkya
ɛɛlaadu kasɔ nwu nyɛntɛlekɔ:
"Tɔkɔ Sion obisankobi falɛ,
‘Nyu, Dikitɛ lɛfɔ kɔwa!
Nyu, akle letota nɔɔ,
akyɛsaa nɔɔ kafɔɔ nkyakaa.’ "
12 Babalɛɛ ma alɛ Batii Klekle,
mba di SAATE nwu Lediki nii;
babalɛɛ fɔ kafɔɔ alɛ Nnwɔ Boowolaa ni,
Okpoo Kplɛ Wɔ Manamasinsĩ nii.