1 Yɔɔsa Efraim lɛkakoto, batasiɛntɛ lɛkanta nwu,

di atoto ya nitɔɔyɔɔ ni, lɛkpa nɔɔ nwu nikɔlɛ ni onyu,

ditika ni di ɔtaata kasɔ biene disi-

diɛta ni okpoo kplɛ, mba di nta lɛkanta lɛwakosa ni kasɔ!

2 Nyu, SAATE nwu nkpe otii wɔ ninkpe ni osie ku ɔnyɛɛ.

Fɛle ditubakanii ku kɔfɛɛfɔ ko ninlalaasa ni asaa,

fɛle kanto siene ɔnɔɔ ku atukɛ kplɛ obiɛ ofe,

abafuki nwu osie kanya antɛ kaasɔ.

3 Lɛkakoto nwu nkpo, Efraim batasiɛntɛ lɛkanta nwu,

babananafu ni ku nkpaasɔ.

4 Atoto ya nitɔɔyɔɔ ni nkpo, lɛkpa nɔɔ nwu nikɔlɛ ni onyu,

ditika ni di ɔtaata kasɔ biene disi,

dibate fɛle dibue le ninkasa ni ɔsɛɛ fiɛ di abule ɔtɛsɛbee nnwo nii-

olele niɛkasa ni ɔnya ɛɛtɛsɛ ni ku kɔnɛɛ nɔɔ,

an-yɔ ni anle ku nkye.

5 Di dii nwu nkpo SAATE wɔ Ninlenke ni

kamale lɛkakoto le niɛkpa ni,

disi niniisaa le nikɔlɛ ni onyu

ninta ni batii nɔɔ ba niebu nii.

6 Abale lɛkanko ninwuna

anta otii wɔ ninsi ni di kakankɔ,

ku osie

anta mba niekplesa ni kakpɛ di kayoko nwu.

7 Mba mmle kafɔɔ kosiɛ ku nta

bɔɔkpankpa ni ku nta siene:

Olebatatɛ ku ɔlaababuɛtɛtɛ kosiɛ ku nta siene

batɔɔkpɔkpɔtɔ ku nta;

bɔɔkpankpa ku nta siene,

boosiɛ di obe wɔ bɔɔnya ni odiki otuo,

bɔɔkpankpa di obe wɔ boodiki ni lɛbɛ ku lɛpɔɔ.

8 Sipunu simuu letĩi ku alaa

lɛba kuninwii diebu ninɔɔkpɛ ni oyududu.

9 "Owe oomiɛ alɛ atuo asaa?

Owe oodiki ɔlaa nɔɔ kasɔ anta?

Babisɔ ba nintoodiɛ ni lɛnyɛɛ ɔnyɛɛfu,

sɛɛ mba batoobudisa ni lɛnyɛɛ?

10 Diekye nni ninle alɛ:

Ɔbla di ɔbla, ɔbla di ɔbla,

kufiofa di kufiofa, kufiofa di kufiofa;

kɛɛkɛɛ ninfũ, kɛɛkɛɛ ninfa."

11 Nwaako diɛtɛ dile, ku bafɔɔ anyasibi ku sɛkplalomii fɔle

Yaa kamakakatɛ anta batii ba mmle,

12 mba aatɔkɔ ni alɛ,

"Nnya ɔnyɛɛ katɛkɔ, bita mba ditoobuo ni batɛ ɔnyɛɛ";

diɛkyakaa ni, "Nnya kanwunakɔ"-

kafɔɔ batanu.

13 Nioso, SAATE nwu ɔlaa nwu kamawa kunta ma:

Ɔbla di ɔbla, ɔbla di ɔbla,

kufiofa di kufiofa, kufiofa di kufiofa;

kɛɛkɛɛ ninfũ, kɛɛkɛɛ ninfa-

alɛ babakple sɛmaasɛmaa mannɔɔ,

manfũ nkɔ, okũ ndiki ma, mamufũ ma kafɔɔ.

14 Nkpo oso binu Saate nwu ɔlaa, aye batii bamantɛ

ba ninkole ni sɛka di batii ba mmle suoto di Yerusalem.

15 Biɔkanta bilɛ, "Butoonii kanya ku kukpi,

ku ɔkya butɔɔbla onwii.

Nse dibuo kplɛ lewo lɛwa,

dilɔbafuo wo ɔkpanko,

diekye butɔɔyɔ sɛlaa ku afunu buɔbla katanikokɔ loo

kakyɔnkyɔ kafɔɔ kawofakɔ loo."

16 Nioso nnya ɔlaa wɔ di SAATE Kplɛ nwu kobuɛ ni:

"Nyu, lese difuɔ di Sion,

difuɔ le bɛɛsɔ beenyu nii,

leyokɔ difuɔ finle diɛta ni lɛsɔse le niewo nii;

otii wɔ nietika nwɔ ni disi yi, diidii sinunsɔ dilɔbakpɛ nwɔ.

17 Kamayɔ lɛkanko mbla lɛklapoosaa okũ

ɔsaabla tinini kafɔɔ asaa oyilasa okũ;

atubakanii kamafiɛ katanikokɔ lee, sɛlaa ku afunu nwu,

ntu kafɔɔ kamabiɛ nin-yii kawofakɔ lee nwu.

18 Kanya ka bienii ni ku kukpi kamalalaa;

onwii lee ɔbla ku ɔkya dilɔbayila.

Nse dibuo kplɛ lewo lɛwa,

dibapɛ ye nintɛ kaasɔ.

19 Fɛ mmle okle dibatɔɔwa ni wlawla dibatuka ye ninsifiko;

olesɛ ku olesɛ, di kakũ ku kakyɛ,

dibafiɛ ninfe."

Ɔlaa wɔ mmle lɛsɔnu

kamawako lɛyɛkɛ kplɛ.

20 Atensaa nwu lesii ɔbla kunkudu alɛ baate manlɔnsa,

kuntu nwu lesii ɔbla wlɛlɛ alɛ aatĩi ye ankyi.

21 SAATE nwu kamataka anyila fɛ mmle aabla ni di Perasim Kobokote,

abatakatɛsa suoto fɛ mmle aabla ni di Gibeon Ɔtaata nwu-

ababla ɔkpɛ nɔɔ, ɔkpɛ nɔɔ wɔ niekyi ni lete,

ambla kafɔɔ ɔsaabla nɔɔ, ɔsaabla nɔɔ wɔ niekyi nii.

22 Nunua bidiɛ sɛma lee nwu,

nse diele nkpo akpo lee nwu kamawɛ onutũ ankyakaa;

SAATE nwu, SAATE wɔ Ninlenke ni, ntɔɔtɔkɔ mi

kawɔɔ nwu nkpo atɔɔtɛ ni di kasɔ nwu kamuu suoto.

23 Bikyɔɔ atoko bienu mi sɛlɔ;

bilo kanana bienu ɔlaa wɔ kobuɛ ni.

24 Nse fekpɛntɛ kɔkpɛ anta asaa ɔpɛ, ɔkpɛ antɔɔkpɛ obe lele?

Obe lele antɔɔfɛ aku, antoopukupukusa kasɔ?

25 Nse atɔɔkyɛkyɛsa kasɔ eeloo,

ampɛ alesaa kubi asa kafɔɔ sɛfa kubi?

Ammpɛ akpaa di mpɛkɔ ninya,

atitabi di mpɛkɔ ninya,

di kofe nwu kamɛ?

26 Yaa nɔɔ lɛka nwɔ

eetuo nwɔ kafɔɔ osuku biene wɔ suoto aabla nwu nii.

27 Mann-yɔ keke baafiɛlɛ alesaa kubi,

ee bayɔ keke kɔkpaa bafenko di sɛfa kubi suoto;

kawosokuu man-yɔ mampɛ alesaa kubi mandiki,

sɛfa kafɔɔ kawesee man-yɔ mampɛ kubi mandiki.

28 Alesaa kubi dikpenii beekuɔ bɛɛbla alesaa;

nioso kuonwii dilɔbasinkyɛ alaatoofiɛlɛ nya dinaa ni koloo.

Nu anwa keke nɔɔ nwu ninfiɛlɛ ni nkpaa aafenko nya di suoto,

bapɔnkɔ nɔɔ ninkuɔ nya.

29 N-ya mmle amuu kafɔɔ lekye SAATE wɔ Ninlenke ni nfũ,

disibu nɔɔ ɔta lɛbla ɔkpɛ ninumbe nɔɔ kafɔɔ lemuɔ.