1 Ɔlaa di Odiki otuo Ɔtaata suoto:

Be nikokpee ye kubuɛ nunua,

bitooyie biesifi akya osi,

2 Oo okpoo wɔ nieyii ni ku kudu,

Oo okpoo kplɛ ku kudu kplɛ ku kakpɔkpɔtɔ?

Bakpi lɛfɔ nwu batalo ma ku kapamii,

ee bakpi kafɔɔ di kakpɛ kamɛ.

3 Batunletɛ lɛfɔ bamuu latoso kɔkpaa kunwii,

baamufũ ma batablako ni kɔtaa ɔkpɛ.

Mba bamuu baamufũ nii, baasiisa ma baatɛ leeyo,

nu baatoso baasifi di balo lawɛ ni sɛɛmaa fanfa.

4 Nkpo oso labuɛ nlɛ, "Diɛ mi;

faatɛɛ nwi blɔblɔblɔ.

Tankpee mi kɔnɛɛ kaafutu

di batii nii kawɔɔ suoto."

5 SAATE nwu, SAATE wɔ Ninlenke ni, nkpe dii

ɛɛta kudu kplɛ ku ɔnanafu ofe ku lɛyɛkɛ

di Odiki otuo Ɔtaata nwu,

akpe dii ɛɛta seyoyiɛ obiɛ ɔtɛ kaasɔ

ku kaku owi di abokote nwu suoto.

6 Elam layɔ kɔtaa kotofo,

ku bakeke ba di bapɔnkɔ nnanfi ni basiɛtɛ ku bapɔnkɔ;

Kir batii ladiki kubiafunsaa kayi.

7 Sɛtaata lee biene nwu leyiipɔ ku bakeke ba di bapɔnkɔ nnanfi nii,

bapɔnkɔ basiɛtɛ kafɔɔ n-yɛ di okpoo kplɛ nwu kayoko;

8 beeklee Yuda kanyu kɔba asaa bɛɛkpa beeyu.

Di dii nwu nkpo faanyu

akpɛsaa katɛkɔ bɔɔlɛɛ ni Lepoo Leyo;

9 faanya falɛ Dawid Okpoo kplɛ nwu

atuɛ kpinwu nfɛ nte di kanyu kɔba nwu suoto;

biemufũ ntu biekpete ni

di Kala Lɛpanta nwu.

10 Biaka ayo nwu di Yerusalem

ni biabibiɛ ayo nwu biatɛ bilɛ bibayɔ minsiensa seyoyiɛ nwu nɛ.

11 Biotofo ntu kakpetekɔ di eyoyiɛ ɛnyɔ nwu obo

minta Lɛpanta Kofole ntu,

kafɔɔ biemunikĩi binyu Nnwɔ niabla mi nii,

ee biwɛ dibu bita Nnwɔ niabla ni disibu nwu kofokofoko.

12 SAATE nwu, SAATE wɔ Ninlenke ni,

kɔlɛɛ ye di dii nwu nkpo

anta kaku owi ku sɛnyaami owi,

alɛ bianwiɛ asi lee minnyukũ kafɔɔ aboko.

13 Kafɔɔ nyu, suoto lɛyɔɔ ku ole owee ninkpe,

boolo banankyue ku bafoso,

boowee sina manyi nta!

Biobuɛ bilɛ, "Bita bule buonyi

diekye kɔsɛɛ bubakpi!"

14 SAATE wɔ Ninlenke ni labuɛ aakpee mi kootoko alɛ: "Blabayɔ okpile wɔ mmle bakyɛ ye fiɛ di dikpiyi lee kamawo," SAATE nwu, SAATE wɔ Ninlenke ni niɛbuɛ.

15 Nnya ɔlaa wɔ di SAATE nwu, Saate wɔ Ninlenke ni lebuɛ ni:

"Tɔɔkyɛ, faalaatɔkɔ saanyuntɛ wɔ mmle,

Sebna wɔ nin-yɛ ni di lɛkayo kanya falɛ:

16 Be fɔɔbla ninfũ, owe kafɔɔ niɛta fɔ osuku

alɛ faakutu ɔkya fanta suoto lɛfɔ ninfũ,

feekutu ɔkya lɛfɔ di katakalekɔ

foowola ɔnyɛɛ katɛkɔ lɛfɔ di difuɔnkpaa kamɛ?

17 "Lolaa fanyu, O afɔ otii sientɛ nwu,

SAATE nwu nfɛ kamamufũ fɔ kpinkpĩ, anfuki fɔ an-yu.

18 Abamunumunusa fɔ kpinkpĩ fɛle bɔɔlo

anfuki fɔ an-yu di kale kplɛ kamɛ.

Nfa fabakpi nɛ,

nfa kafɔɔ di bakeke lɛfɔ biene ba di bapɔnkɔ nnanfi ni kamaka-

fanle sinunsɔ fanta saate lɛfɔ leyo nɛ!

19 Kamatososa fɔ di ɔkpɛ lɛfɔ kamɛ,

mankpakatɛ fɔ kafɔɔ di kayilakɔ lɛfɔ.

20 "Di dii nwu nkpo kamalɛɛ kpɛmblatɛ nii Hilkia obisuɔtɔbi, Eliakim. 21 Kamayɔ akpeelekyɔ lɛfɔ nwu nkpee nwɔ, n-yɔ ofiamɛ lɛfɔ kafɔɔ nnii nwɔ ɔtɔ, n-yɔ otumi lɛfɔ nkpee nwɔ ninnɛɛ. Abale kote anta mba ninkpe ni di Yerusalem ku Yuda leyo. 22 Kamayɔ Dawid leyo kamɛ saafĩi ntika nwɔ di nimuusi; nle ɛɛsɛkɛtɛ nii, kuonwii dilɔbafuo ɔsɛɛ, nle ɛɛsɛɛ ni kafɔɔ, kuonwii dilɔbafuo ɔsɛkɛtɛ. 23 Kamase nwɔ fɛle leyee di lɛba kpinkpĩ; abale dibu lekpomii anta ote leyo kamɛ. 24 Dibu le nimuu di leyo lɛma kamɛ kamatika nwɔ di suoto: babi ku bawa- leyo nwu akpɛnsaa yɛntɛle, diɛyɔ ni di abɛsibii diɛlaase ni di sipũ simuu. 25 SAATE wɔ Ninlenke ni lebuɛ alɛ, "Di dii nwu nkpo, leyee nwu bɛɛmɛɛsa ni di lɛba kpinkpĩ nwu kamata osuku; bababɔkɔtɛ ni ninnɔɔ, atoo ya kafɔɔ ninsaka ni ni di suoto kamakpa anwii kaasɔ." SAATE nwu niebuɛ.