1 Ɔlaa wɔ di Amos obisuɔtɔbi, Yesaya lanya ni di Babilon suoto:

2 Bise flankaa di kobokote finile nsintɛɛ,

biɛfaa bilɛɛ ma;

biewii kɔnɛɛ bilɛɛ ma

baabuo di banɔɔfotii okpoo nwu kamɛ.

3 Ntɔɔtɔkɔ batii klekle nii;

ntookpee bakpɛtɛ nii nlɛ badiki ɔblɔ nii kayi-

mba ninnya ni suoto lɛyɔɔ di lelenkee nii kamɛ.

4 Binu, kudu di abokote nwu osi,

fɛle batii ɔlambu kplɛ kole!

Binu, kudu di sɛka nlekɔ nwu kamɛ,

fɛle nnle nikosiisa bawo!

SAATE wɔ Ninlenke ni nikosiisa

bakpɛtɛ anta kakpɛ.

5 Beekye nnle fanfa,

di kolo nnyɛntɛlekɔ-

SAATE nwu ku ɔblɔ nɔɔ akpɛsaa

alɛ ɔlaawɔɔsa kale nwu kamuu.

6 Biwi, diekye SAATE nwu dii ntɔɔtɛɛtɛɛ;

dibawa fɛle sientɛ wɔ Ninlenke ni asaa ɔlalaasa okle.

7 Ta nle mmle oso, nnɛɛ mmuu kamafefee,

otii biala otu kamakpa.

8 Lɛyɛkɛ kamapɛ ma,

kakpɔkpɔtɔ ku dibuo kamamufũ ma;

babakɛ kakyɛkakyɛ fɛle ɔsanko nikolofo.

Babatoonyu bawo di anu tuĩi,

anu lɛma nyila ɔtɔ.

9 Nyu, SAATE nwu dii kɔwa

-disi osie, ɔblɔ yakayaka ku kafutu kamɛ ɔtɔ dii dibale-

alɛ aata kasɔ nwu nte kafukuti

anwɔɔsa kafɔɔ bakpileblatɛ ba ninsi ka ni kaamɛ.

10 Awɛntrɛbi di kolo ku osi asaa kpale

dilɔbakpa.

Nse kufĩ letũ kubawɔfɔ

kɔwɛntɛ kafɔɔ dilɔbakpa.

11 Kamananfi kayi kootoko ta ɔsaabla kpile ninwu oso,

basiesientɛ di sikpile lɛma suoto.

Kamata mba ninkanta ni lɛkanta nloo

kamawakosa kafɔɔ mba nintakatɛsa ni suoto katoo lalaale kasɔ.

12 Kamata otii nfĩ anlenkee koto sɛɛle nwaa,

abafĩ nwaa anlenkee Ofi koto sɛɛle.

13 Nkpo oso kamata osi ntũkũ;

kasɔ kafɔɔ kamatũkũ di kayilakɔ ninka

di SAATE wɔ Ninlenke ni ɔblɔ yɛkɛle nwu,

di ɔblɔ yakayaka nɔɔ dii nwu suoto.

14 Dibate fɛle kafɛ nikɔkyɔɔ kayi atoko,

fɛle bafoso di kpatɛ nnaa nii,

obiala kamakple ansifi batii nɔɔ bamu nfũ,

obiala kamatoso ansifi okpoo nɔɔ.

15 Olele niebuo nnɛɛ babatofo nwɔ lɛsaa;

mba beemufũ ni bamuu kamanɔɔ di kapamii kanya.

16 Babalaasa babifɔɔle lɛma di asaa suoto di anu lɛma;

babalɛ leyo lɛma asaa mantenko basɔfɔ lɛma kafɔɔ.

17 Nyu, kamakpee Mede batii ɔtɔ mantaka manyila ma di suoto,

manankle ni koto fututu ɔlaa,

banaa ni kafɔɔ koto sɛɛle kayaa.

18 Ataa lɛma kamatofo bakosopo mannɔɔ;

blɔbanya babifɔɔle nyaami

ee babisɔ ɔlaa kunu ma kafutu.

19 Babilon, nlɛ sekpeele di sɛka nlekɔ,

Babilon batii dibu lɛkanta nwu,

Yaa kamatekete ni an-yu

fɛle Sodom ku Gomora.

20 Kuonwii dilɔbasinwɛ ninfa diidii

ee asiɛ nwu kaamɛ, diɛyɔ ni kɔɔna diɛlaase ni kɔɔna;

Arab* otii kuonwii dilɔbapɛ lɛkpaayo ninfa,

bafosokpatɛ kuonwii dilɔbata bafoso nɔɔ batɛ ɔnyɛɛ ninfa.

21 Kafɔɔ ɔfaafuu babɔkɛɛ nimatoote ninfa,

lepoo kamɛ baweewee nimayii ayo nɔɔ kamɛ

asukusuku nimasiɛ ninfa,

nfa kafɔɔ di nkpĩni kamakyɛ nintoofe katoo ku kala nɛ.

22 Lepoo kamɛ baweewee kamakumii di okpoo nwu baka nsiɛkɔ,

lepoo kamɛ baweewee nwu kamasiɛ di okpoo nwu akayo ya manle ni nkpa.

Obe ninwu ntɔɔtɛɛtɛɛ,

ayi nɔɔ kafɔɔ dilɔbasinfe sɛmaa.