1 "Kafɔɔ nunua kpɛmblatɛ nii Yakob, nu,

Israel, nnwɔ lediki ni.

2 Nnya ɔlaa wɔ di SAATE nwu-

nnwɔ niɛbla fɔ ni, eeloso fɔ ni di olofofɔtɔ kamɛ,

abakyakaako fɔ ni kobuɛ ni:

Tanyɛkɛ, O, kpɛmblatɛ nii Yakob,

Yesurun*, nnwɔ lediki ni.

3 Kamanyɛɛnɛ ntu nkpete di kasɔ ka di ɔtukɔnsɔ nkle ni suoto,

nta seklenyii ntaa di kasɔ kosole suoto;

Kamanyɛɛnɛ Ninwuna nii nkpete di babi lɛfɔ suoto,

ku lɛtɔtɔlɔ nii di banantii lɛfɔ suoto.

4 Babakɔntɔ fɛ lɛkpɛnyi di ntu kasɔ,

fɛ owidifɔɔkɛtɛ di seklenyii se ninkobiɛ sinfe ni ɔlɔɔkɔ.

5 Otii owo kamabuɛ alɛ, ‘Saate nwu ole nle’;

ɔbamba kafɔɔ kamayɔ Yakob leyooto antika suoto;

ɔbamba nkpana antika di kɔnɛɛ alɛ, ‘Saate ole’

an-yɔ Israel leyooto antika suoto.

6 Nnya ɔlaa wɔ di SAATE nwu-

Israel Ɔka ku Dikitɛ, SAATE wɔ Ninlenke ni kobuɛ ni:

Ami ninle ɔkasale, Ami kafɔɔ ninle ɔnyɛntɛle;

ami kamaa, Yaa kuonwii nsinnaa.

7 Owe ninte fɛ ami? Bitɔɔ adiki abuɛ.

Biɛtɔɔ adiki atuo, aayɔ atɛ mi di anu

lɛsaa le niawa ni di obe wɔ ladiki saa batii nii lase ni,

ku lɛsaa le nimawa ni-

nwaako, bitɔɔ abuɛ atɛ lɛsaa le nimawa ni.

8 Tantũtũkũ, tanyɛkɛ.

Diele ami niabuɛ ɔlaa wɔ mmle, ni labuɛ latɛ kofokofoko?

Aye ninle mi kamaabayilatɛ. Ami kamaa, Yaa owo lekple akpe?

Oowo, Difuɔnkpaa kuninwii nsinnaa; Nin-ye kuninwii."

9 Batii ba bamuu nimbla ni afiɔ diedie lɛsalɛsaa,

asaa ya kafɔɔ boonyu alɛ eefũ ni kɔya diedie lɛsalɛsaa.

Batii ba nimbuɛ nya ni sɛlaa anu lebiɛ ma;

baaye lɛsalɛsaa, sinunsɔ kamakpɛ ma.

10 Owe nimbla afiɔ, anwola letembi lewo

le ninamawako nwɔ ni lɛsalɛsaa?

11 Nnwɔɔ ku bawo nɔɔ babakpee ma sinunsɔ;

mba ninwola nya ni batii bale, baasinle lɛsalɛsaa.

Bita bamuu lɛma basi, baadie babayila; difu kamapɛ ma ku sinunsɔ.

12 Dikyĩ kpɛmblatɛ n-yɔ lɛbɔɔsaa

ankpee di akaa ɔtɔ kamɛ;

ankyɛkyɛsa afiɔ ku ɔmankyĩ,

ambla nya ku kɔnɛɛ nɔɔ osie.

Kɔka nklee nwɔ, osie nɔɔ kafɔɔ nloo;

otukɔnsɔ nklee nwɔ, ansinwɛ ɔnyɛɛ kafɔɔ.

13 Kowoso asaa wolatɛ nklapoosa

ankya sele andiki antika ku lɛkpanasaa;

an-yɔ lɛfɛmbi anwola andiki

ku aklapoosaa.

Anwola kũ andiki di otii letembi kanya,

di otii letembi nimu kamɛ,

alɛ diasiɛ di lɛkplɛyo.

14 Aabudi sedar awoso

ee loobia sipres awoso ee awosokplɛ.

Aata nya aamuɔ di lepoo awoso kamɛ,

ee aasɔ pine awoso, ni di kanto lata nya aamuɔ nɛ.

15 Nimakple ɔtɔ dikutasaa ninta otii;

an-yɔ kowo kafɔɔ ankutaa ɔtɔ anwɔfɔ,

ankutaa kowo kafɔɔ anfiɛ bloblo.

An-yɔ kowo kafɔɔ ambla afiɔ antɔ nya;

an-yɔ kowo kafɔɔ ambla letembi lewo, anwa kasɔ anta ni.

16 An-yɔ kowoso nwu kakyɛ ankutaa ɔtɔ;

nnwu suoto anwa alesaa nɔɔ nɛ,

anfiɛ sina kafɔɔ anwee amiɛ nɛ.

Anwɔfɔ ɔtɔ kafɔɔ ambuɛ alɛ,

"Aa! Ditoofila mi; ɔtɔ nwu lebuo mi akpoo."

17 An-yɔ kowoso nwu yɛntɛle ambla yaa nɔɔ, anwola afiɔ;

anwa kasɔ anta nya, antɔ nya kafɔɔ.

Ampɛ ɔlaa anta nya ambuɛ alɛ,

"Diki mi; afɔ ninle mi yaa."

18 Batii nwu nkpo okle baaye lɛsaa, boloonu lɛsalɛsaa kasɔ;

beetĩi ma anu nioso bɔɔlɔɔnya,

asibu lɛma kafɔɔ lefuu nioso boloonu kasɔ.

19 Kuonwii ninsiɛ aabu diisi,

kuonwii nnaa lɛsaatofo ee lɛsɔnu aabuɛ alɛ,

"Lɛyɔ kowoso nwu kakyɛ lekutaa ɔtɔ;

layɔ kũ akaa bia lafiɛ bloblo

lafiɛ sina kafɔɔ lawee.

Ni kayɔ nko niebu ni mbla diyududusaa?

Ni kawa kasɔ nta kawosokuu?"

20 Oole ntɔ̀, otu nɔɔ lɛkyɔnkyɔ nwɔ eeyu;

ɔlɔbafuo suoto nɔɔ odiki ee abuɛ alɛ,

"Diele sɛlaa ku afunu nkle di koletanɛɛ nii nɛ?"

21 "Oo Yakob, nyuma asaa ya mmle

Oo Israel, diekye kpɛmblatɛ nii fale.

Ami niɛbla fɔ, kpɛmblatɛ nii fale;

Oo Israel, namayee fɔ.

22 Ntɔɔyɛɛsa ɔtanlolaa ɔbla lɛfɔ fɛ alokonkyɛ,

Sikpile lɛfɔ fɛle oblokyi.

Kple fawa ɔkyɛ nii,

diekye ntoodiki fɔ."

23 Oo osi, sa suoto lɛyɔɔ onu, diekye SAATE nwu nintɔɔbla nle mmle;

oo kasɔ nkyofokɔ, biyiisa kudu.

Aye abokote,

aye apoo ku awoso amuu bikpee sinu,

diekye Saate nwu ntoodiki Yakob,

atootuo dibu nɔɔ di Israel.

24 "Nnya ɔlaa wɔ di Saate nwu kobuɛ ni-

dikitɛ lɛfɔ wɔ niɛbla fɔ eekpee ni di olofofɔtɔ kamɛ:

"Ami ninle SAATE nwu,

nnwɔ niɛbla ni asaa amuu,

nnwɔ lete niananfi ni osi nwu,

nnwɔ niablɛfɛsa ni kasɔ nnwɔɔ omu nɔɔ,

25 "Nnwɔ ninkpɔkpɔtɔsa ni balaatɛ Yaa ɔlaa babuɛtɛ atuosaa

anta kafɔɔ babɔmpɛtɛ mbuu nii,

nnwɔ ninfuki banumbentɛ lɛsaa tekete anyu ni,

anta ni kafɔɔ ninkple ni dibuusaa,

26 nnwɔ ninta kpɛmblatɛ nɔɔ ɔlaa nnwa ni kaanya

anta kafɔɔ batɔkyɛntɛ nɔɔ ɔlaa wɔ beebuɛ bɛɛtɛ ni nnwa kaanya,

"Nnwɔɔ niabuɛ di Yerusalem suoto alɛ, ‘Batii kamasiɛ nwu kaamɛ,’

di Yuda sekpoo suoto alɛ, ‘Babasesĩ letofo,’

di obiɛ lɛma suoto kafɔɔ alɛ, ‘Kamasesĩ lelolaa,’

27 nnwɔɔ niatɔkɔ ntu nkyofokɔ alɛ, ‘Bisɔɔ,

kamasɔɔsa seklenyii lee kafɔɔ,’

28 nnwɔɔ niatɔkɔ Kores alɛ, ‘Ale mi ni bafosokpatɛ

ababla dibiesaa nii nimuu kafɔɔ fanyɛntɛ;

ababuɛ di Yerusalem suoto alɛ, "Ta base nwu letofo,"

di olekatakɔ nwu kafɔɔ suoto alɛ, "Ta base lɛsɔse nini." ’