1 "Babilon Kakpeelebitɛ ka ninanye ni osuɔtɔ,

soo fasiɛ di kudu kamɛ;

siɛ kaasɔ di lɛkakpomii nnaa ni,

Babilon batii Obisankobi

Blabasinlɛɛ fɔ

okpeele wɔ nikɔlɛ ni onyu ku ee baalolaa manklee nii.

2 Yɔ kukuɔ faakuɔ nnaafũ;

faadiki anu ditĩisaa lɛfɔ nwu.

Kpaa awu ninkpaa,

faataalɛ seklenyii.

3 Babadiki fɔ lɛkyɔtɔ

babanya sinunsɔ lɛfɔ kafɔɔ.

Kamabla nkyisa;

namadiki kuonwii kaamɛ."

4 Dikitɛ loo-ninle Israel Klekletɛ nwu-

leyooto nɔɔ ninle SAATE wɔ Ninlenke ni nɛ.

5 "Siɛ kloklo, sifi ditunu kamɛ,

Babilon batii Obisankobi;

blabasinlɛɛ fɔ

nnle Ɔkasanko.

6 Lanya ɔblɔ lakpeeko batii nii

ni lasĩ atesaa nii nɛ;

layɔ ma lakpee fɔ ninnɛɛ kamɛ,

ni fatanya ma nyaami nɛ.

Bia mba nintoobe nii

faatukasa ma atoo nutũle.

7 Faabuɛ falɛ, ‘Dinaa ni kaloo kamale-

Ɔkasanko nwu obe lele!’

Kafɔɔ fatabu asaa ya mmle disi

ee fabuo di suoto lefɔ kamɛ fanyu falɛ be nimafuo ɔwa sɛɛmaa.

8 Kafɔɔ nunua, nu, afɔ wɔ nimbɔmbɔ ni nkpa ole,

foonyu falɛ fakpe ni kamaa kakpɛkɔ

foobuɛ kafɔɔ fantɔkɔ ni suoto falɛ,

‘Ami nɛ, kuonwii nsinnaa akyakaa di ami.

Diidii namale kpisɔfɔ

ee namayu obi kuonwii.’

9 Nkpo oso asaa ya mmle anyɔ kamawa di suoto lɛfɔ.

Di obe kakuii kamɛ di dii ninwii kamɛ:

Babi kamayu fɔ fankple kpisɔfɔ.

Abawa fɔ di suoto niimu kamɛ

nu fakpe babɔmpɛtɛ kpinwu

ku mblɛ lɛfɔ nwu siene mmuu.

10 Fakpɛ di disi osie lɛfɔ suoto

foobuɛ falɛ, ‘Kuonwii dilɔɔnyɛɛ.’

Ninumbe ku lɛsaatofo lɛfɔ koyunsa fɔ

di obe wɔ fɔɔtɔkɔ ni suoto falɛ,

‘Ami nɛ, kuonwii nsinnaa akyakaa di ami.’

11 Nioso ɔlaa kpile kamawa fɔ di suoto,

falabafuo nwu ɔfaa ku afa lɛfɔ kukple.

Anyale kamawa fɔ di suoto

alɛ flɔbafuo kuonwii koto ɔta falɛ atososa nya;

kawɔɔ ka fananye ni kamawa fɔ di suoto

kabafua fɔ.

12 "Yila kpinkpĩ nfɛ ku mblɛ lɛfɔ nwu

ku babɔmpɛtɛ kpinwu lɛfɔ nwu nkpo,

fatɔɔbla ni ɔkpɛ diɛyɔ ni bia sibisɔ lɛfɔ.

Loobia fabafuo olenkee,

loobia fabafuo balo lɛfɔ lɛyɛkɛ lewo okpee.

13 Asibu ya amuu fatoofũ ni ntootuudi fɔ!

Ta kufĩ ku awɛntrɛbi bateketetɛ lɛfɔ bawa,

kufĩ ku awɛntrɛbi banyuntɛ ba nimbuɛ lɛsaa le nimawa ni di kɔwɛntɛ biala mantɛ ni yi,

ta ma badiki fɔ bakyeko lɛsaa le nikɔwa fɔ ni di suoto.

14 Nwaako nkpo bate fɛ sibuu nɛ;

ɔtɔ nwu kamafiɛ ma.

Balabafuo bia suoto lɛma odiki

di ɔtɔ nwu osie kamɛ.

Diekye diele akaa ɔtɔ baawɔfɔ nii;

diele akyikye kamɛ ɔtɔ baasiɛ nwu ni di ɔlɔɔkɔ.

15 Nle mmle lete babafuo fɔ ɔbla ɔta nɛ-

ku nle mmle ditoobuo fɔ nii

biesunsũ ni asaa bia sibisɔ.

Obiala lɛma kamayɔ osuku nɔɔ;

kuonwii lɛma nnaa abadiki fɔ nii.