1 Ɔlaa di Tiro suoto:

Oo, Tarsis seklo, biwi kaku!

Diekye Tiro ntɔɔwɔɔ

leyo ee oklo kayilakɔ kafɔɔ nsinnaa.

Kipro kasɔ di

ɔlaa nwu lekye kuɔwa ma.

2 Bilo kanana, aye lekpo kotoko basiɛtɛ

ku aye Sidon basaasunsuntɛ

di lekpo ɔkyɛ ntɔɔta ye ni lɛlɛ.

3 Minfe di lekpo suoto

minwako Sihor atitabi;

Nil okle kotoko alesaa niale Tiro koto lɛwɛ kakyekɔ,

ni aabakple nnle asaa kasunsũkɔ nɛ.

4 Sinunsɔ sikpɛ fɔ, Oo Sidon, ku afɔ, Oo lekpo katanikokɔ,

diekye lekpo ntɔɔkakatɛ:

"Diidii lɛmɛ diinu mi ee nlofo;

diidii ninyu babisuɔtɔbi ee babisankobi asi bamuɔ."

5 Nse ɔlaa nwu ledu Egipte yi,

bababuo sɛnyaami ta nnwɔ niekye ni Tiro oso.

6 Bitaalɛ bikyɛ Tarsis;

biwi, aye lekpo kotoko basiɛtɛ.

7 Suoto lɛyɔɔ okpoo kplɛ lee nwu nɛ,

okpoo kplɛ kofolekofole nwu,

nnwu di nkpaa nɔɔ ntɔɔkpaa nwu

diɛlaasiɛsa di kasɔ fanfa suoto nɛ?

8 Owe niabla disibu le mmle di Tiro suoto,

nnwɔ ninta ni akakoto,

di basaasunsũtɛ nɔɔ nle ni banɔɔfotii,

di asaa bayatɛ nɔɔ nle ni batii finle kaasɔ suoto?

9 SAATE wɔ Ninlenke ni niabla disibu nwu,

alɛ ɔɔwakosa dibu nimuu suoto katoo ɔtakatɛsa kasɔ

anwakosa kafɔɔ mba bamuu ninle ni batii finle kasɔ di kasɔ suoto.

10 Kpɛ kasɔ lɛfɔ fɛ Nil okle lɔɔkɔ,

O Tarsis Obisankobi,

diekye fasinnaa oklo kayilakɔ.

11 SAATE nwu ntoodiki kɔnɛɛ nɔɔ ɛɛkyɔɔ lekpo nwu suoto

ɛɛta kafɔɔ sɛka nlekɔ nɔɔ letũkũ.

Atookpee kufiofa di Kanaan suoto

alɛ bawɔɔsa ntanikokɔ nɔɔ nwu.

12 Aabuɛ alɛ, "Suoto lɛyɔɔ nsinnaa,

O Sidon Kakpeelebitɛ, batoobiɛ fɔ nunua!

"Taka, faataalɛ fasifi Kipro;

bia nfa flɔbawɛ ɔnyɛɛ ɔtɛ. "

13 Nyu Babilon batii kasɔ nwu,

nunua batii ba mmle diesindie lɛsalɛsaa!

Asiria batii niabla nwu

ɔfaafuu babɔkɛɛ kasiɛkɔ;

baatofo ayo takale lɛma,

baabibiɛ nwu ntanikokɔ baatɛ kaasɔ

baabla nwu ofukuti ku nyiɛkuu.

14 Aye Tarsis seklo, biwi kaku;

batoobibiɛ ntanikokɔ lee!

15 Di obe nwu nkpo kamɛ babayee Tiro alɛɛ afosi-akuɛnsĩ, fɛ ɔka nkpa alɛɛ. Kafɔɔ di alɛɛ afosi-akuɛnsĩ nwu kalookɔ, dibawa di Tiro suoto fɛ sɔnɔkpeetɛ onu kamɛ alɛ:

16 "Yɔ sanku, faakyɛ fakyi okpoo kplɛ nwu,

O sɔnɔkpeetɛ batooyee ni;

fɛ sanku nwu nwaa, sa sinu kpinwu,

di mmle babanyuma fɔ ni."

17 Di alɛɛ afosi-akuɛnsĩ kalookɔ, SAATE nwu kamanyuma Tiro. Abakple ansifi lɛsɔnɔkpee nɔɔ nwu nfũ ankple ambla ɔkpɛ nɔɔ nwu ku sɛka nlekɔ mmuu di kasɔ ka mmle nwu suoto. 18 Kafɔɔ babadiki Tiro lɛsaawɛ ku nfasũ nɔɔ mantɛ lete manta SAATE nwu; blɔbasiisa batɛ ee bakookaa. Nfasũ nɔɔ kamasifi mba ninsi ni di SAATE nwu anu, alɛ alesaa kpinwu ku aklesaa biene kawɛ ma.