1 Lɛflɛkɛ kamataa nindie di Yese leke suoto;

di odu nɔɔ kamɛ Ɔla kamatika abi.

2 SAATE nwu Ninwuna kamatika nwɔ di suoto

ninumbe Ninwuna ku lɛsɔnu,

disibu ɔta Ninwuna ku osie

lɛsaatofo Ninwuna ku SAATE nwu lɛyɛkɛ-

3 dibale nwɔ suoto lɛyɔɔ kafɔɔ di SAATE nwu ɔyɛkɛ.

Alɔbakanko nle ɛɛnya ni ku anu nɔɔ,

ee abla disibu di nle eenu ni ku atoko nɔɔ;

4 kafɔɔ di ɔsaabla tinini kamɛ abakanko mba dinaa nii,

ku lɛbɛ ɔta biene abata disibu bapiitɛ di kasɔ ka mmle suoto.

Abapɛ kayi ku kanya nɔɔ kamɛ kawesee;

abalo basiensietɛ ku anyasibi nɔɔ kɔfɛɛfɔ.

5 Ɔsaabla tinini nimale nwɔ ofiamɛ

onukwale ole kafɔɔ kamale lɛtapo nimamana nwɔ ɔtɔ ninkyi nii.

6 Kaketeku kamasiɛ ku lefosobi,

ɔkplɛle kamate di tie ɔlɔɔkɔ,

lɛnankyuebi ku kyata ku lɛbɔkɛɛbi le ninsi ni lɛla kamale alesaa di lɛba ninwii;

obisɔ biibii kafɔɔ nimatɔkpa ma.

7 Nankyue ku okiti kamawee sɛfa,

abi lɛma kamate mankpɔtɔɔ,

kyata kafɔɔ kamawee sɛfa fɛle nankyue-suɔtɔ.

8 Obifɔɔle kamakpee kɔkyɔ di kɔwɛɛfɛɛko kutuɛ kanya,

obi bisɔ kafɔɔ kamakpee kɔnɛɛ di akotia kasiɛkɔ.

9 Blɔbabla ma dikpile ee bawɔɔsa ma

di kobokote klekle nii kumuu suoto,

diekye kasɔ kamayii pɔ ku SAATE nwu lɛsaatofo

fɛ mmle di ntu n-yii ni lekpo.

10 Di dii nwu nkpo, Yese Odu nwu kamayila fɛ flankaa anta batii nwu; nnle kamamana nwu mankyi, ɔnyɛɛ katɛkɔ nɔɔ kafɔɔ kamalɛ onyu ku dibu. 11 Di dii nwu nkpo Saate nwu kamakple ananfi kɔnɛɛ nɔɔ lɛnyɔɔfa andiki batii nɔɔ basɛɛ ba niebu ni di Asiria, di Egipte Kala, Egipte katoo, Kus, Elam, Babilonia, Hamat ku nsɔ be di lekpo lɛmana diekyi ni kamɛ.

12 Abatakatɛsa flankaa anlɛɛ nnle nwu

ansiisa kafɔɔ Israel batii ba baasiifiko ni sɛfɔɔkpoo;

abakple ansiisa Yuda batii ba niasasami nii

di kasɔ asi nwu ana.

13 Efraim sɛsɔfɔwo kamaloo,

Yuda balo kafɔɔ kamaloo;

Efraim dilɔbasinkpɛko Yuda sɛsɔfɔwo,

ee Yuda ataka ayila di Efraim suoto.

14 Babataka nkyenkye mansoo mankyɛ Filisti batii nfũ di kufĩ kamɛɛkɔ;

babasi kanya manfũ kufĩ katunkɔ batii asaa ninnɛɛ.

Babataka di Edom ku Moab suoto,

Amon batii kafɔɔ kamasiɛ ma kaalɔ.

15 SAATE nwu kamasɔɔsa

Egipte batii lekpo nwu antɛ osuku;

ku kɔnɛɛ nɔɔ kɔfɛɛfɔ filale abafiɛ kasɔ lɛma nwu

anfenko di Eufrat Okle nwu.

Abasɛ nwu ambla koklenyii ekuɛnsĩ

alɛ batii kamakpee ntokota mantaalɛ.

16 Kubale osuku kplɛ kunta batii nɔɔ basɛɛ

ba niebu ni di Asiria,

fɛ mmle diate diata ni Israel batii

obe wɔ baadie ni di Egipte.