1 Di ayi nwu nkpo kamɛ, Yesekia labuo okpifiɛ. Amos obisuɔtɔbi Yesaya Yaa ɔlaabuɛtɛtɛ lakyɛ ɔkyɛ nɔɔ aalaatɔkɔ nwɔ alɛ, "Nnya ɔlaa wɔ di SAATE nwu kobuɛ ni: Lolaa leyo lɛfɔ kamɛ asaa fatɛ, diekye fɔɔwa ɔbakpi; flɔbataka di ofiɛ."

2 Ninfɛ di Yesaya lamunikĩisa anu aakyɔɔ oyoyiɛ ni aapɛ ɔlaa aata Saate nwu aabuɛ alɛ, 3 "Oo SAATE nyuma mmle okle lakyɛ ni ku onukwale di anu lɛfɔ ku otu wɔ niawo ni nimu, labla kafɔɔ lɛsaa le ninlɛ ni di anu lɛfɔ." Ninfɛ di Yesekia lawi kaku blɔblɔblɔ nɛ.

4 Ninfɛ di SAATE nwu ɔlaa lawa kuata Yesaya alɛ: 5 "Kyɛ faalatɔkɔ Yesekia falɛ, ‘Nnya ɔlaa wɔ di SAATE nwu, teete lɛfɔ Dawid Yaa nwu kobuɛ ni: Ntoonu fɔ ɔlaa ɔpɛ, lɛnya kafɔɔ nnumɛɛ lɛfɔ; kamakyakaa lefosi alɛɛ anɔɔ di nkpa lɛfɔ. 6 Kamadiki fɔ kafɔɔ ku okpoo kplɛ wɔ mmle nkyeko Asiria ɔka nnɛɛ kamɛ. Kamayila okpoo kplɛ wɔ mmle kamaa.

7 " ‘Nnya nle mmle ninle SAATE nwu dituosaa diɛta fɔ ni alɛ SAATE nwu kamabla di ɔlaa wɔ eebuɛ ɛɛtɛ ni kanya: 8 Kamata oyududu nkpukuti kunsifi sɛɛmaa nkpaa didiki lefosi kunkyɛ di olomu katuokɔ ka di Ayas latofo ni di kufĩ lɛkaatɛɛ.’ " Nioso kufĩ oyududu lakpukuti nkpaa didiki lefosi di olomu katuokɔ ka kuayila nii.

9 Lɛsaa le di Yesekia, Yuda ɔka lakpana ni di ofiɛ nɔɔ ku ɔtaka sɛmaa:

10 Labuɛ nlɛ, "Di nkpa nii osiɛ ladu ni ntɛɛntɛɛ

dikpeni nse nsifi ɔkya kamɛ

ni babakpafɛ alɛɛ nii bule manfũ mi ninnɛɛ?"

11 Labuɛ nlɛ, "Namasinkple nnya SAATE, nwu

Saate , nwu di nkpa basiɛtɛ kasɔ suoto;

ntabasinnya batii,

ee nkpɔtɔɔ ku mba ninsi ni kaasɔ ka mmle suoto.

12 Beebiɛ mi kasiɛkɔ beekpukutisa ka di ɔkyɛ nii

fɛ mmle mankpa ni bafosokpatɛ lɛkpaayo.

Fɛ mmle diibula losotɛ ntɔɔkatu ni dibula, ntɔɔkatu nkpa nii,

atoobudi mi kafɔɔ di dibula kaflɛ nwu suoto;

kakũ ku kakyɛ fɔɔta nkpa nii nwa kaloo.

13 Latɛ suoto kaasɔ lasoko kakyɛ kamuu dialaadu kolesɛtũ

kafɔɔ fɛ kyata aabibiɛ akufi nii amuu;

kakũ ku kakyɛ fɔɔta nkpa nii nwa kaloo.

14 Kowi fɛ yaakɔɔkɔ ee katĩitĩi,

kokumii fɛle lɛlaapɔɔ.

Anu nii ntoonyu osi ditoobuo nya.

Oo Saate , nsi di nimiina kamɛ, wa fabakyakaakoe!"

15 Be ninkpe mi kabuɛ?

Atoobuɛ ɛɛtɔkɔ mi, nnwɔɔ omu nɔɔ kafɔɔ niɛbla nle mmle.

Kamamufũ suoto nkpee di ɔnɛɛfɔɔ kalɔ di alɛɛ nii amuu kamɛ

diekye ɔkla nii nsi diibuo kamɛ.

16 Saate , asaa ya mmle oso di otii nsiɛ nkpa;

ɔkla nii kafɔɔ lɛwɛ nkpa di nnya kamɛ.

Yɔɔsɛɛ ofiɛ

faatɛɛ nsiɛ nkpa.

17 Nwaako lɛlɛ nii

oso lafe di ninyinyi le mmle kamɛ.

Di lɛbɔmbɔ lɛfɔ kamɛ

feediki mi di kawɔɔ dibiɔ kamɛ;

fɛɛyɔ sikpile nii simuu

feefuki feeyu sɛɛmaa lɛfɔ.

18 Diekye ɔkya dilabafuo fɔ ɔtansa,

kukpi dilabafuo fɔ katansa sinu ɔsa;

mba nintoosifi ni ɔkya kamɛ

dilabafuo anu otika di onukwale lɛfɔ suoto.

19 Banyu, banyu-mma nintansa fɔ nɛ,

fɛ mmle kɔbla ni miɛ;

bate nindiki onukwale lɛfɔ

mantɔkɔ babi.

20 SAATE nwu kamadiki mi,

nioso bubasa sinu ku sikũ basanku

di nkpa loo mmuu osiɛ kamɛ

di SAATE nwu olekatakɔ kamɛ.

21 Yesaya labuɛ alɛ, "Bakuɔ abue batika di didiesaa nwu suoto, ni dibayɔɔ nwɔ."

22 Yesekia lakaalɛ alɛ, "Be nimale dituosaa alɛ kamakyɛ SAATE nwu olekatakɔ?"