1 "Nnya kpɛmblatɛ nii wɔ lemufũ nkle ni,

nnwɔ lediki ni oobuo mi ni anu;

kamayɔ Ninwuna nii nkpee nwɔ kaamɛ

abayɔ lɛkanko biene anwako nnle.

2 Alabayiisa kudu ee afaa.

ee atakatɛsa sɛlɔ nɔɔ katoo di lɛkpaka.

3 Alabafee lɛkpɛnyi le niefũ ni kakɔ,

alabaniisa kafɔɔ kandiɛ wɔ okũ nintooloo nii.

Di onukwale ole kamɛ abawako lɛkanko biene;

4 alababla alalaasa ee nnɛɛ difee nwɔ

diɛlaase di obe wɔ eenyu alɛ lɛkanko biene lɛbla ni ɔkpɛ kaasɔ.

Nsɔ be di ntu lɛmana diekyi ni kamatika anu di kufiofa nɔɔ suoto."

5 Nnya ɔlaa wɔ di SAATE nwu kobuɛ ni-

nnwɔɔ niɛbla osi ɛɛnanfi mi ni kafɔɔ,

nnwɔɔ niɛblɛfɛsa kasɔ ku asaa ya amuu niɛkɔntɔ ni di suoto nika,

nnwɔɔ niɛta batii ba ninsika ni di suoto ninwuna

ku mba ninkyɛ ka ni di suoto nkpa:

6 "Ami SAATE nwu, niɛlɛɛ fɔ di ɔsaabla tinini suoto;

kamamufũ fɔ kɔnɛɛ nklee.

Kamanyu fɔ, mbla fɔ kafɔɔ

fɛ kanya ninii nta batii nwu

ku lɛkpa nta nnle di kayi,

7 fantikiti banumbiɛtɛ anu,

fandiki mba ɛɛtɛ ni laayo

alɛ faadiki kafɔɔ mba ninsi ni di ditunu leyo katenkɔ.

8 "Ami ninle Saate nwu, nni ninle mi leyooto nɛ!

Namayɔ dibu nii nta otii bamba

ee katansa nii nta afiɔ.

9 Nyu, sekofolaa nwu labuɛ latɛ ni ntɔɔwa kaanya,

asaa fɔle nfɛ kobuɛ;

fiɛ abawa ni kaanya,

kamatɔkɔ ye nya ntɛ."

10 Bisa onu fɔle bita SAATE nwu,

katansa nɔɔ kakye kasɔ nyɛntɛlekɔ nwu,

aye ba ninkyɛ ni lekpo ku asaa ya amuu ninsi ni kaamɛ

aye nsɔ be di lekpo lɛmana diekyi ni ku aye bamuu ninsi ka ni di suoto.

11 Bita ɔfaafuu ku sekpoo kplɛ lɛma batakatɛsa sɛlɔ lɛma katoo;

bita nkpayotũ be di Kedar batii nsi ni banya suoto lɛyɔɔ.

Bita Sela batii basa onu ku suoto lɛyɔɔ;

Bita ma bayiisa kudu di abokote osi.

12 Bita ma bayɔ dibu bata Saate nwu

baadiki katansa nɔɔ kafɔɔ babuɛ di nsɔ be di lekpo lɛmana diekyi ni.

13 SAATE nwu kamadie fɛ sientɛ,

fɛ kpɛtɛ, abasɛnkɛsa ɔblɔ nɔɔ;

abafaa ankpee kakpɛ onu

anlenkee balo nɔɔ kafɔɔ.

14 "Ntoolo kanana diɛklɛ,

lɛmaasa kanya lemufũ suoto.

Kafɔɔ nunua, fɛ ɔsanko wɔ nikɔkpɛ ni kolofo,

kamafaa, nnwuna nklee, ntoonwuna fɛkɛfɛkɛ.

15 Kamata abokote ku akpenkpe nte afukuti

nta apoo kɔɔnle lɛma amuu nkoso;

kamata sekle nkple nsɔ be di lekpo lɛmana diekyi nii

nta ntu apanta kafɔɔ nsɔɔ.

16 Kamakpaa banumbiɛtɛ nfenko di sisuku se suoto mananye nii,

nfenkɔ be manan-ye nii, kamakpaa ma nfenko;

kamata ditunu nkple lɛkpa di anu lɛma

nta aba ya kafɔɔ niɛkakyakakya ni nkylɔkylɔ.

N-ya mmle ninle asaa ya kamabla ni nɛ;

namadiɛ ma nnɛɛ.

17 Kafɔɔ mba nietika ni afiɔ disi,

bɔɔtɔkɔ afiɔ alɛ, ‘Afɔ ninle wo ni yaa’,

babakple nkpaamaa ku sinunsɔ kplɛ.

18 "Nu, aye batokotĩitɛ;

aye, banumbiɛtɛ, bitakatɛsa anu bienyu!

19 Owe di anu lebiɛ fɛ kpɛmblatɛ nii,

owe kafɔɔ di atoko letĩi fɛ tɔkyɛntɛ wɔ lekpee ni kɔtɔ?

Owe di anu lebiɛ fɛ nnwɔ niɛyɔ suoto ɛɛtɛɛ ni,

di anu lebiɛ nwɔ ni fɛ Saate nwu kpɛmblatɛ?

20 Fatɔɔnya asaa kpinwu, kafɔɔ faatɛ nsũ fabla;

atoko lɛfɔ letikiti kafɔɔ faanu lɛsalɛsaa."

21 Dilɛ SAATE nwu

ta ɔsaabla nɔɔ tinini oso

alɛ aatakatɛsa kufiofa nɔɔ katoo dibu kafɔɔ ntika kũ di suoto.

22 Nnya batii ba batooyu beefũ ma ni asaa kafɔɔ ninnɛɛ,

bamuu lɛma abiɔ lemufũ ma fɛ okũ

ee beewofa di ayo katenkɔ.

Batookple batii ba beefũ ni asaa ninnɛɛ,

di otii kuonwii nnaa aafũ ma nii;

batooyu ma

di otii kuonwii nnaa aabuɛ alɛ, "Bikplesa ma biwako nii."

23 Owe kaamɛ lee nimanu ɔlaa wɔ mmle

ee ankyɔɔ atoko nwaa di obe wɔ ninkɔwa ni?

24 Owe niayɔ Yakob aata alɛ bayu nwɔ,

ee aayɔ Israel aata alɛ bafũ nwɔ asaa?

Diele Saate wɔ

suoto buabla ni okpile?

Diekye batatikanko sisuku nɔɔ;

batale nwɔ afiofa.

25 Nioso aanyɛɛnɛ ɔblɔ yakayaka nɔɔ aakpete ma di suoto,

dile ni kakpɛ ɔblɔ.

Kaamana ma kaakyi fɛ ɔtɔ, kafɔɔ ditabudi ma;

kuafifiɛ ma, kafɔɔ ditakpanko ma otu.