1 Kamasa onu nta otii wɔ nimbɔbɔ ni

onu di nta awosobi nɔɔ kofe suoto:

Bɔmbɔtɛ nii nkpe nta awosobi kofe

di lekpenkpe kasɔ ka ninlɛ ni suoto.

2 Aafuu kasɔ aadiki afuɔ kaamɛ

ni aapɛ nta awosobi biene nɛ.

Ni aatofo lɛba takale manyila man-nyu ni kamɛ nɛ,

ni aabla lɛba le manka ni nta nwu nɛ.

Ni aatoonyu osuku alɛ abatɛsɛ nta awosobi biene nɛ,

kafɔɔ abi lɛlaale lete aatika.

3 "Nunua aye Yerusalem basiɛtɛ ku Yuda batii,

bika bita ami ku nta awosobi nii nwu kofe.

4 Be niebu baakple mambla manta nta awosobi nii nwu kofe

dilenke nle ntɔɔbla lɛta kũ ni?

Konyu osuku nta ni nta awosobi biene,

be oso aatika abi lɛlaale lete?

5 Nunua kamatɔkɔ ye

lɛsaa le kamabla ni nta awosobi nii nwu kofe:

Kamaklee kũ kɔba nkpakpaa,

manlalaasa kũ;

kamabiɛ kũ seyoyiɛ,

mannanafu kũ.

6 Kamabla ka kasɔ ka ninte ni kafukuti,

blabakpaasa ka ee bakpɛ ka,

akuna ku siwuu kafɔɔ nimayie ninfa.

Kamakpee alokonkyɛ kufiofa

alɛ kanto dilaanɔɔ akpete ka."

7 SAATE wɔ Ninlenke ni nta awosobi kofe nwu

ninle Israel leyo nwu,

Yuda batii nwu kafɔɔ

ninle kɔba nɔɔ ko ambɔmbɔ ni nɛ.

Aatoomiɛ lɛkanko biene, kafɔɔ ntɔ owii aanya;

aatoomiɛ ɔsaabla tinini, kafɔɔ aanu ninyinka nku owi.

8 Biyɔɔsa aye ba nikotofo ayo minkyakaa ni di ayo suoto

biɔblɛfɛsa ni kafɔɔ afe minkyakaa ni di afe

ninaase di obe wɔ kaakɔkaakɔ ninsimbu nii

di lete lee ninsiɛ ni di kasɔ nwu suoto.

9 SAATE wɔ Ninlenke ni ntoobuɛ eekpee mi kootoko kamɛ alɛ:

"Nwaako ayo kplɛ kamate afukuti

ayo biene kamate di basiɛtɛ nnaa nii.

10 Nta awosobi kofe ba-eka bakuɔ mata nta bagalon bakuɔ,

nse bɛɛpɛ atitabi abɛsibii lefosi, lɛbɛsibii ninwii babawɛ."

11 Bayɔɔsa mba nintaka ni ku kolesɛtũ

manwolaa ni nta osuku,

mansiɛ manaadu ni nkyɛntɛɛ

alɛ nta kakpee ma ni difila di suoto.

12 Di dii nlekɔ lɛma manklee bakyitaa ku basanku,

akasaa ku akyukyoo ku nta,

kafɔɔ banaa disibu bɛɛta SAATE nwu sɛsaabla,

banaa dibu bɛɛta nnɛɛ nɔɔ ɔkpɛ ɔbla.

13 Nkpo oso batii nii kamasifi sɛlanle kamɛ

diekye banaa lɛsɔnu;

kɔka kamalo batii finle lɛma

otukɔnsɔ kamalo batii lɛma kpinwu.

14 Nkpo oso ɔkya ntɔɔblɛfɛsa owolonwo nɔɔ

kuɔbɛ kanya foo kuɔtɛ;

di batii finle ku batii kpinwu kamasoo mambuo nii,

ku adu bakpeetɛ lɛma bamuu ku batasiɛntɛ.

15 Nioso babawakosa otii kasɔ

manwakosa kafɔɔ batiinyu kasɔ,

manwakosa mba niɛtakatɛsa ni suoto katoo anu kasɔ.

16 Kafɔɔ SAATE wɔ Ninlenke ni matakatɛsa suoto katoo di lɛkanko tinini nɔɔ kamɛ,

Yaa klekle nwu kafɔɔ kamatuo suoto nɔɔ klekle di ɔsaabla tinini nɔɔ kamɛ.

17 Nioso bafoso mawee sɛfa fɛ mma bamu sɛfa kaweekɔ;

afosobi kamale alesaa di saawɛntɛ okpoo biɛle nwu kamɛ.

18 Bayɔɔsa mba niekpee okpile okũ bɔɔnanfi ni ku kakyɔnkyɔ,

ku disi osie fɛ bakeke ba di bapɔnkɔ nnanfi ni sikũ,

19 mba nimbuɛ ni alɛ, "Bita Yaa apɛsɛwa,

bitɔɔ apɛsɛwa abla ɔkpɛ nɔɔ

alɛ buanya nwu ni.

Bita nwu kuwa,

bita Israel Klekletɛ Nwu disibu diwa,

alɛ buanya ni."

20 Bayɔɔsa, mba ninlɛɛ ni okpile alɛ dibiene

dibiene kafɔɔ alɛ okpile,

man-yɔ ditunu mambla ni lɛkpa

lɛkpa kafɔɔ mambla ni ditunu,

man-yɔ lelonle mambla ni lɛmɛnɛfɛle

lɛmɛnɛfɛle kafɔɔ mambla ni lelonle.

21 Bayɔɔsa mba nikonyu suoto lɛma alɛ beebe ni anu

diɛkpa ma ni kafɔɔ di suoto lɛma simu kamɛ.

22 Bayɔɔsa mba ninle ni baka di nta onyi kamɛ

ku basientɛ di nta ɔkpɔtɔɔsa kamɛ,

23 mba nindiɛ lɛpɔɔ bakpitɛ manfũ ni ditunu kamɛ asaa,

kafɔɔ mansĩ ni mba ole ninkpe ni lɛbɛ ɔyɔ ɔta.

24 Nkpo oso, fɛ mmle di ɔtɔ ɔkplalomii nfiɛ ni sibuu

ku mmle kafɔɔ di lɛkpɛnyi nfiɛ ni di ɔtɔ,

nkpo di sidu lɛma kamabuu

atoto lɛma kafɔɔ nflɛlɛtɛ ansifi fɛle kudu nɛ;

diekye batoosĩ SAATE wɔ Ninlenke ni afiofa

baanyu kafɔɔ Israel Klekletɛ Nwu ɔlaa nyakatãa.

25 Nkpo oso ɔblɔ kofiɛ SAATE nwu di batii nɔɔ suoto;

ɛɛtakatɛsa kɔnɛɛ nɔɔ katoo ɛɛpɛ ma ɛɛtɛ kaasɔ.

Abokote letukũ,

ni di bakpi nkpete fɛle aku di akpaka nɛ.

Kafɔɔ di n-ya mmle amuu kamɛ, ɔblɔ nɔɔ diiyɔɔ,

kɔnɛɛ nɔɔ lekple kukpe di osi.

26 Abawii kɔnɛɛ anlɛɛ nnle di nkyonkɔ,

abafɛ ofiko anlɛɛ mba ninkpe ni di kasɔ kayɛntɛlekɔ.

Babawa,

nkyenkye ku otoso!

27 Dilɔbabuo kuonwii lɛma ee atuula,

kuonwii dilɔbakpa sɛkyɔsĩ ee akyɔsĩi;

ofiamɛ dilɔbafukuti di ɔtɔ,

katokota okũ dilɔbabudi.

28 Kɔtaa lɛma nkpe abe,

akplɔ lɛma amuu ntoololaa suoto;

bapɔnkɔ lɛma akpɔbi nte fɛle lɛkpankplabukii,

bakeke lɛma ba di bapɔnkɔ nnafi ni nkpaa nte fɛ kakitikɔ.

29 Dikumii lɛma nte fɛle kyata lele,

bookumii fɛle kyata abi;

manaayu mammufũ babɔkɛɛ lɛma

di otii kuonwii kafɔɔ nnaa aafuo ma ni ofũ.

30 Di dii nwu nkpo babakumii di suoto ninya

fɛle lekpo dikumii.

Nse otii owo lenyu kasɔ nwu,

abanya ditunu ku sɛnyaami;

bia lɛkpa nwu alokonkyɛ kamatĩi ni ninwɔfɔ.