1 "Oo, ɔlɛma-sanko sa sinu,

afɔ wɔ ninanlofo ni;

sa onu, faayiisa kudu ku suoto lɛyɔɔ,

afɔ wɔ koolofo ditanu ni;

diekye okyolopo ɔsanko nwu babi kamapɔ

manlenkee nnwɔ ninkpe ni kɔsa,"

SAATE nwu niebuɛ.

2 "Muɔsa lɛkpaayo lɛfɔ nwu,

fukuti lakpaayo lɛfɔ abula nwu fablɛfɛsa,

tanfenko sɛmaa;

faananfi sikũ lɛfɔ

faata ayee lɛfɔ kafɔɔ awɛ osie.

3 Diekye fabakpɛ fanfe oletanɛɛkyɛ ku ɔmɛntukyɛ;

banantii lɛfɔ kamafũ nnle nwu

mansiɛ kafɔɔ di sekpoo kplɛ lɛma nwu niate ni sifukuti.

4 "Tanyɛkɛ; flabafũ sinunsɔ.

Tanta anu lɛfɔ labla biɔɔ; sinunsɔ dilabakpɛ fɔ.

Fabayee sekpeele lɛfɔ sinunsɔ

flabasinyuma ninyu nyakatãa le faawɛ ni di sikpisɔfɔ lɛfɔ kamɛ.

5 Diekye Blatɛ lɛfɔ ninle fɔ kɔsa-

SAATE wɔ Ninlenke ni ninle nwɔ leyooto-

Israel Klekletɛ Nwu ninle fɔ Dikitɛ;

nnwɔɔ bɔɔlɛɛ kasɔ kamuu Yaa nɛ.

6 Diekye SAATE nwu kamakple anlɛɛ fɔ

fɛ ɔsɔfɔ faale eediɛ ɛɛtɛ diɔkpɛko nwɔ niinwuna kamɛ-

kakpeelebitɛ ka niɛyɔ ni kɔsa wla

beediɛ ka bɛɛtɛ nii," Yaa lɛfɔ niebuɛ.

7 "Obe kakuii kamɛ lediɛ fɔ lɛtɛ,

kafɔɔ ku nyaami ɔnya kplɛ, kamakple nkpaa fɔ nwako.

8 Di ɔblɔ wla ɔnya kamɛ

ni lawofasa anu nii di suoto lɛfɔ di obe kakui kamɛ nɛ,

kafɔɔ ku sifutulɛ se ninaa ni kaloo yi

kamanya fɔ nyaami,"

SAATE Dikitɛ lɛfɔ nwu niebuɛ.

9 "Di ɔkyɛ nii, nle mmle nte fɛ Noa ayi nwu,

di obe wɔ laka ntam nlɛ Noa ntu nwu dilabasinyii ni diidii ditĩi ni kasɔ.

Nkpo oso nunua ntɔɔka ntam nlɛ nɔmasinya ɔblɔ nkpeeko fɔ nɛ,

nɔmasinsĩ ɔlaa kafɔɔ nta fɔ diidii nɛ.

10 Kuntɛ abokote kamatũkũ

akpenkpe kafɔɔ kamakyɛ yi,

lɛbɔmbɔ nii le ninnaa ni kaloo dilabakyɛ di suoto lɛfɔ

ee atoko ɔkyɛ ole kanya ninii nii nwu dilabakyɛ,"

SAATE nwu nyaami nyatɛ lɛfɔ niebuɛ.

11 "Oo okpoo kplɛ wɔ baabla ni amumu, di afɛɛfɔ siene lasa ni batakpee nwu ni kɔnɛɛ kaafutu,

kamatofo fɔ ku afuɔ ya niefũ ni kɔya manlɛɛ ni turkuoise,

lɛsɔse lɛfɔ kafɔɔ ku safir.

12 Kamabla kakpɛkɔ lɛfɔ ku afuɔ sɛɛle

n-yoko lɛfɔ ku afuɔ ya nikomumuna nii,

seyoyiɛ lɛfɔ kafɔɔ simuu ku afuɔ finle.

13 SAATE nwu nimatuo babisuɔtɔbi lɛfɔ bamuu asaa,

babi lɛfɔ kafɔɔ atoko ɔkyɛ ole kamamuɔ.

14 Ɔsaabla tinini babayɔ manse fɔ sidu:

Amumu ɔbla kamakyo fɔ;

flɔbayɛkɛ lɛsalɛsaa.

Difu kamakyo fɔ;

dilabatɛɛtɛɛ fɔ saa.

15 Nse otii owo lɛtaka fɔ di suoto, diele ami niekpee nwɔ;

olele kafɔɔ niedieko fɔ, abanɔɔ ta afɔ oso.

16 Nyu lo, ami niɛbla dikyĩ kpɛmblatɛ

wɔ ninkpee ni ɔtɔ

antufu ni lɛkpɛnsaa le niesiɛko diɛta ni ɔkpɛ nini ɔbla.

Ami kafɔɔ niɛbla saalalasatɛ wɔ ninlalaasa ni asaa;

17 lɛkpɛsaa lele beetufu ta afɔ oso, dilababla ɔkpɛ,

fabalo ɔkplalomii biala kafɔɔ niɛtaka fɔ di suoto lɛpɔɔ.

Nle mmle ninle SAATE nwu kpɛmblatɛ kalekɔ nɛ.

Nle mmle ninle lɛbɛ lɛma le niekye ni ɔkyɛ nii nɛ,"

SAATE nwu niebuɛ.