1 Nnya lɛsaa le di Amos obisuɔtɔbi, Yesaya lanya ni di Yuda ku Yerusalem suoto:

2 Di ayi yɛntɛle kamɛ

kobokote ko ninle ni SAATE nwu leyo kamayila

kubataka kunlenkee abokote bule;

babatakasa kũ kunlenkee akpenkpe,

nnle mmuu kafɔɔ kamawa nimasi di suoto nikũ.

3 Batii kpinwu kamawa mamabuɛ alɛ,

"Biwa, buɔkata bukyɛ SAATE nwu kobokote,

di Yakob Yaa leyo.

Abatuo wo sisuku nɔɔ,

mmle buakyɛ ni di nnafukpaa nɔɔ suoto."

Kufiofa nwu madie kunkye Sion,

SAATE nwu ɔlaa kafɔɔ makye Yerusalem.

4 Abaka nnle ku nnle ntɛɛ ɔlaa

abalolaa kafɔɔ batii kpinwu ntɛɛ sɛlaa.

Bababɛntɛ mpamii lɛma mambla anwa,

ataa lɛma kafɔɔ mambla sɛsɔsɔ.

Kale dilabasin-yɔ kapamii di kale suoto,

ee bakple batekete kakpɛ diidii.

5 O, Yakob leyo, biwa,

biɛta bukyɛ di SAATE nwu lɛkpa kamɛ.

6 Fatoodiɛ batii lɛfɔ fɛɛtɛ,

Yakob leyo nwu.

Diekye batooyii pɔ ku ofũ onu ateate niekye ni kufĩ katunkɔ;

bɔɔpɛ sɛbɔ fɛle Filisti batii

beekpee nnɛɛ kafɔɔ kpinkpi ku bafiɔtɛ.

7 Koto fututu ku koto sɛɛle leyii kasɔ lɛma pɔ;

lɛsaawɛ lɛma nnaa kaloo.

Bapɔnkɔ leyii kasɔ lɛma pɔ;

bakeke lɛma ba di bapɔnkɔ nnanafi ni nnaa kaloo.

8 Kasɔ lɛma leyii ku afiɔ pɔ;

manwa kasɔ manta asaa ya bɛɛyɔ nnɛɛ lɛma bɛɛbla nii,

asaa ya di anɛɛbi lɛma lɛbla nii.

9 Nioso babawakosa otii kasɔ,

manwakosa batii kafɔɔ kasɔ-

tan-yɔ faakyɛ ma.

10 Buo di afuɔntuu kamɛ,

faawofa di kasɔ kamɛ

di SAATE nwu lɛyɛkɛ suoto

di nimuɔ nɔɔ ku sɛlɛ oso!

11 Babawakosa batii ba ninkanta ni anu kasɔ,

mba nintakatɛsa ni suoto katoo kafɔɔ mawa kasɔ;

SAATE nwu lete babatakasa katoo di dii nwu nkpo.

12 Saate wɔ Ninlenke ni nkpe dii ɛɛtɛ

ɛɛta batii ba bamuu ninkanta ni ku mba nintakatɛsa ni suoto katoo,

ku asaa ya amuu niɛtaka ni katoo

(babawakosa ma kasɔ),

13 di sida awoso amuu di Lebanon, atakale ku alenkeele,

ku akpɛ awoso di Basan,

14 di abokote takale amuu

ku akpenkpe takale amuu,

15 di leyo takale biala

ku oyoyiɛ siene biala,

16 di oklo biala mamblako ni ɔkpɛ

ku lɛkpɛnsaa biala nikɔlɛ ni onyu.

17 Babawakosa otii lɛkanta kasɔ

batii suoto katoo ɔtakatɛsa kafɔɔ nwakasɔ;

SAATE nwu lete babatakatɛsa katoo di dii nwu nkpo,

18 afiɔ kafɔɔ kamayɛ klekle.

19 Batii kamatoso mansifi sifuɔntuu kamɛ

ku atuɛ di kasɔ kamɛ

mandie di SAATE nwu lɛyɛkɛ nfũ

di nimuɔ nɔɔ ku sɛlɛ oso,

nse ɛɛtaka alɛ ootukunsa kasɔ.

20 Di dii nwu nkpo kale batii mayɔ

koto fututu afiɔ ku koto sɛɛle afiɔ lɛma,

bɛɛbla alɛ bɔɔtɔ nii,

manfuki man-yu nfusu ku apãa.

21 Babatoso mansifi sifuɔntuu kamɛ

ku afuɔ takale kamɛ

mandie di SAATE nwu lɛyɛkɛ nfũ

di nimuɔ nɔɔ ku sɛlɛ oso,

nse ɛɛtaka alɛ ootukunsa kasɔ.

22 Nioso tansintika otii wɔ,

nikonwuna anfenko ni di anwunfie disi.

Kɔmɛn-ya eefũ?