1 SAATE nwu latɔkɔ mi alɛ, "Yɔ lɛkpanafuɔ kplɛ faakpana ku kakpanawsee fatika ni di suoto falɛ: Mahe-Salal-Has-Bas.* 2 Kamalɛɛ Uria oletatɛ nwu ku Yeberekia obisuɔtɔbi, Sakaria fɛ kamaabayilatɛ biene mantɛɛ."

3 Ninfɛ lakyɛ ɔsɔfɔ nii Yaa ɔlaabuɛtɛtɛ-sanko nfũ, ni aalaka lɛmɛ, ni aalofo obisuɔtɔbi nɛ. Ni di SAATE nwu latɔkɔ mi alɛ, "Tika nwɔ leyooto Mahe-Salal-Has-Bas. 4 Fiɛ di osuɔtɔbi nwu mafuo ni obuɛ alɛ, ‘Teete nii’ ee ‘Mma nii’ yi, Asiria ɔka nwu kamatuka Damasko lɛsaawɛ ku Samaria kakpɛ asaa ansifiko."

5 SAATE nwu lakple aakakatɛkoe alɛ:

6 "Diekye batii ba mmle ntoosĩ ni

Siloa ntu nwu nikobiɛ ninfe ni buɛɛ

bɔɔnya ni suoto lɛyɔɔ kafɔɔ di Resin

ku Remalia obisuɔtɔbi suoto yi,

7 nkpo oso Saate nwu nfɛ kamawako

Eufrat Okle kplɛ nwu ntu di suoto lɛma-

ninle ni Asiria ɔka ku osie nɔɔ omuu.

Okle nwu kamabiɛ kunfe di nfenkɔ nɔɔ mmuu,

kunyii kunwaalɛ atokosi ninwu,

8 kunfe kafɔɔ kunaadu Yuda, kunkpee lɛkpankyila kunkyi nwu,

kunfe nwu kaamɛ kunaadu nwu simu.

Afoko nɔɔ difukuti kamatĩi kasɔ lee lɛblɛfɛ,

O Imanuel!"*

9 Aye nnle, bikpee kakpɛ onu, di difu dipɛ ye kafɔɔ!

Binu, aye nsɔ be mmuu ninkpe ni fanfa.

Bilolaa suoto bita kakpɛ, di difu dipɛ ye!

Bilolaa suoto bita kakpɛ, di difu dipɛ ye!

10 Bibla disibu lee, kafɔɔ babalalaasa;

bibabla disibu lee, kafɔɔ dilɔbawa kaanya,

diekye Yaa nsiko wo.*

11 SAATE nwu lakakatɛkoe di obe wɔ di kɔnɛɛ nɔɔ siene latika mi ni di suoto, aasĩ ɔlaa aatɛɛ alɛ ntantikanko batii ba mmle osuku. Aabuɛ alɛ:

12 "Bitanlɛɛ kanwube

lɛsaa biala di batii ba mmle nlɛɛ kanwube;

bitanyɛkɛ lɛsaa le manyɛkɛ nii,

ditanle ye lɛyɛkɛsaa kafɔɔ.

13 SAATE wɔ Ninlenke ni, ninle nnwɔ bianyu ni klekle,

nnwɔɔ ninle nwɔ biayɛkɛ nii,

nnwɔɔ ninle nnwɔ nikale ye ni lɛyɛkɛsaa,

14 nnwɔɔ kafɔɔ nimale olekatakɔ;

kafɔɔ di ayo nwu anyɔ di Israel yi, nnwɔɔ nimale

difuɔ le nimata batii ntuula ni

ku difuɔ le nimata ma mannɔɔ nii.

Kafɔɔ di Yerusalem batii suoto yi, nnwɔɔ nimale

okũ ku dikyĩ anta ma.

15 Kpinwu lɛma kamatuula;

babanɔɔ manfefee kafɔɔ,

babakyɔɔ ma okũ mamufũ ma."

16 Nii kamaa oyila ɔlaa nwu

tĩi kafɔɔ kufiofa kanya di basaateketɛ nii kamɛ.

17 Kamasoko SAATE nwu,

nnwɔ nikowofasa ni anu nɔɔ di Yakob leyo suoto.

Kamatika nwɔ disi.

18 Nnyɛɛ ninfũ, ku babi ba di SAATE nwu ntɔɔtɛɛ ni. Bule atuosaa ku nsũ atɛsaa di Israel, buokye ni SAATE wɔ Ninlenke ni nfũ, nnwɔ ninsi ni di Sion Kobokote.

19 Nse batii lɛtɔkɔ ye alɛ bilaakaalɛ asaa di babɔmpɛtɛ ku bakpi anwuna nfũ binu, mba nimbibiɛ ni sinwu mantoonwununuu nii, ni batii nwu dilaawolaa asaa di Yaa lɛma nfũ? Be oso mankaalɛ asaa di bakpi nfũ di batii ba ninkpe ni nkpa disi? 20 Bikple bisifi kufiofa ku kamaa oyila ɔlaa nwu nfũ. Nse baakakatɛ di mmle okle di ɔlaa nwu nte nii, ni badinya lɛkpa. 21 Batii nwu makyɛ mantookyi kaasɔ nwu, dibuo ku kɔka maklee ma. Nse kɔka kolo ma yi, babanya ɔblɔ, mankplesa anu katoo mankpaani ɔka lɛma ku Yaa lɛma. 22 Nni kamaa babanyu kasɔ, kafɔɔ dibuo lete babanya ku ditunu ku ditunu yɛkɛle, babatukusa ma kafɔɔ mankpee di ditunu tunutunu kamɛ.